হোম / মহৈ-মশিং / অঙাংশীংগী কোর্নর / ব্লু হ্ৱাল চেলেঞ্জ গেমদগী চেক্সিনবা
শেয়র
Views
  • ষ্টেট শেমদোক্নবা হাংদোকউ

ব্লু হ্ৱাল চেলেঞ্জ গেমদগী চেক্সিনবা

তোপিক অসিনা ব্লু হ্ৱাল সুসাইদ গেমগা মরি লৈননা অঙাংশীংনা খংজিনগদবা ইনফোর্মেসন পীরি।

ব্লু হ্ৱাল চেলেঞ্জ হায়বসি করিনো অমসুং গেম অসিগী মতাংদা মমা-মপা ওইবশীংনা করিগীদমক পুক্নিং চংফম থোক্লিবনো?

  1. ব্লু হ্ৱাল চেলেঞ্জ (Blue Whale Challenge) অসি ওনলাইন গেম অমনি। করিগুম্বা মতমদা হ্ৱালশীংনা সমুদ্রগী খোংবান্দা মশা মথন্তগী অপাম্বগা লোয়ননা কাখৎলক্তুনা শীজৈ, অমসুং থৌওং অসিগী মতুংইন্না গেম অসিগী মমীং অসি থোনখিবনি।
  2. গেম অসিদা, ওনলাইন এদমিনিষ্ট্রেটর অদুনা মসিগী পার্টিসিপেন্টশীংদা থবক খরা পাংথোক্নবা শীন্নৈ। পার্টিসিপেন্টশীং অদুদা থবক অমমম লোয়শিন্নবা নুমিৎ 50নিগী মতম পী। পার্টিসিপেন্টশীং অদুনা চেলেঞ্জ অদু পাংথোক্লি হায়বগী ফোটোশীং কাপ্পা তাই অমসুং ক্যুরেটরগী এপ্রুভেল লৌনবগীদমক প্রুফ ওইনা মখোয়দু অপলোদ তৌবা তাই। খ্বাইদগী অরোয়বা চেলেঞ্জ অদুদি মশা মথন্তা শীজবসিনি। গেম অসিগী প্লেয়রশীং অসিনা গেম অসি শান্নবা লেপ্পা ঙমদে মরমদি মখোয়দা গেম অদু মপুং ফাহন্নবা ব্লেক মেল অমসুং সাইবর বুল্লি তৌই (black mailed and cyber bullied)।

মীবু শিহনবা য়াবা গেম অসি মালেম শিনবা থুংনা শন্দোকখ্রে, অমসুং ভারত্তা ব্লু হ্ৱাল চেলেঞ্জগা মরি লৈননা, অঙাংশীংনা মশা মথন্তা শোকহঞ্জবা অমসুং মশা মথন্তা শিজবগী থৌদোক খরা ফাউবা লৈখ্রে হায়বগী রিপোর্ট লৈরে। চয়োল অনিগী মতম পরিং অমদা, গেম অসি শান্নরুবদগী চহি 12দগী 19 ফাউবগী মনুংদা লৈবা অঙাং তরুক্তগী হেনবনা মশা মথন্তা শীজখি।

অঙাংশীংনা গেম অসি মফম কদাইদা শান্নবা য়াবগে?

ব্লু হ্ৱাল অসি ফ্রি ওইনা দাউনলোদ তৌবা য়াবা গেম, এপ্লিকেসন নত্ত্রগা সোফ্টৱায়র অমা নত্তে। মসি অঙাংশীংনা মখোয়গী স্মার্টফোনশীংদা এপ ষ্টোর নত্ত্রগা ফেসবুককুম্বা সোসিএল মিদিয়া প্লেটফোর্মশীংগী খুত্থাংদা এক্সেস তৌবা য়াদে। মসি অরোনবা গ্রুপশীংগী (secretive groups) মরক্তা সোসিএল মিদিয়া নেটৱার্কশীংদা অমগা অমগা পীনবনি। মসি শেম্লিবা মীওইশীং (creators) অদুনা মখোয়গী প্লেয়রশীং/ ভিক্টিমশীং খন্দোকই অমসুং মখোয়দা জোইন তৌবীনবগীদমক ইনভাইটেসন অমা থাই।

প্লেয়রশীংনা গেম অসিদা করম্বা মখলগী চেলেঞ্জশীং থেংনবগে?

গেম অসিদা য়াউরিবা চেলেঞ্জ খরা মখাদা পীরি। মসি চেলেঞ্জশীংগী ষ্টেন্দর্দ ওইবা লিষ্ট অমদি ওইদবা য়াই অমসুং ক্যুরেটরশীং (curators) অদুনা অনৌবা মখল কয়া পুথোরকপগী ওইথোকপসু লৈ।

  1. কোই কক্নবা অথৌবা থাং অমনা (razor) নহাক্কী নখুত্তা “f57” হায়না হকউ, অমসুং ক্যুরেটরদা (curator) ফোটো অমা থাউ।
  2. অয়ুক্কী পুং 4.20 দা হৌগৎলু অমসুং ক্যুরেটরনা নঙোন্দা থারকপা ৱাখল নুংঙাইনিঙাই অমসুং কিনিঙাই ওইবা (psychedelic and scary) ভিদিওশীং অদু য়েংউ।
  3. নহাক্কী নপাম্বোমদা, শিংলিগী (veins) পরিং ইন্দুনা কোই কক্নবা অথৌবা থাং অমনা কা-হেন্না লুহন্দবা মওংদা, অহুমথোক্না (3 cuts) লেল্লু, অমসুং ফোটো অমা ক্যুরেটরদা থাউ।
  4. চেবাং অমদা হ্ৱাল অমা য়েকউ, অদুগা ফোটো অমা ক্যুরেটরদা থাউ।
  5. করিগুম্বা নহাক্না “হ্ৱাল অমা ওইবা” (“become a whale”) য়ারে হায়রবদি, নহাক্কী নখোংদা “য়েস” থাউ। করিগুম্বা পামদ্রগনা/ য়াদ্রগনা, নশামকপু থাংনা কয়ারক হন্না লেল্লু (নশামকপু চৈরাক পীজৌ)।
  6. অরোনবা কোদ অমদা (cipher) থবক তৌ।
  7. নহাক্কী নখুত্তা “f40” হায়না হকউ, অদুগা ফোটো অমা ক্যুরেটরদা থাউ।
  8. নহাক্না নহাক্কী অকিবদু লাকশিঞ্জবা তাই।
  9. অয়ুক্কী পুং 4:20দা হৌগৎলু অমসুং য়ুমথক্তা কাখৎলু (হেন্না ৱাংখৎলিবমখৈ হেন্না ফৈ)।
  10. নহাক্কী নখুত্তা কোই কোক্নবা অথৌবা থাং অমনা হ্ৱাল (whale) অমা হক্তুনা য়েকউ, অমসুং ফোটো অমা ক্যুরেটরদা থাউ।
  11. নুমিৎ চুপ্পা ৱাখল নুংঙাইনিংঙাই অমসুং কিনিংঙাই ওইবা ভিদিওশীং য়েংউ।
  12. “মখোয়”না (ক্যুরেটরশীং) নঙোন্দা থারকপা ম্যুজিক অদু মুন্না তাউ।
  13. নহাক্কী চিনবান অদু লেন্থৎলু।
  14. নহাক্কী নখুৎ অদু য়েত্তুম অমনা কয়ারক হন্না থিল্লু।
  15. নশাদা নাবা ফাউহনগদবা থবক খরা পাংথোকউ, নশামকপু অনাবা (sick) ওইহল্লু।
  16. নহাক্না খংবা খ্বাইদগী হেন্না ৱাংবা য়ুমথক অদুদা কাখৎলু, অদুগা য়ুমথক্কী মপান (edge) অদুদা মতম খরা লেপ্পু।
  17. থোং অমদা চৎলু, মদুগী মপান্দা লেপ্পু।
  18. ক্রেন (crane) অমদা কাখৎলু নত্ত্রগা য়ামদ্রবদা মদু পাংথোক্নবা হোৎনৌ।
  19. ক্যুরেটর (curator) অদুনা, নহাক অসি থাজবা য়াবা মীওইরা হায়বদু চেক তৌই।
  20. “হ্ৱাল অমগা” (নহাক্কুম্বা অতোপ্পা প্লেয়র অমা নত্ত্রগা ক্যুরেটর অমা) স্কাইপ (Skype)তা ৱারি শান্নৌ।
  21. য়ুমথক্তা কাখৎলু অমসুং মদুগী মপান্দা নহাক্কী নখোংশীংদু য়ান্থদুনা ফম্মু।
  22. ক্যুরেট অদুনা নহাক্না শিগদবা তাং অদু হায়রক্কনি অমসুং মদু নহাক্না য়াবা তাই।
  23. অয়ুক্কী পুং 4:20দা হৌগৎলু অমসুং রেল লম্বীদা (নহাক্না থীবা ফংবা রেললম্বী লৈফম অমহেক্তদা চৎলু) চৎলু।
  24. নুমিৎ চুপ্পা মীওই অমত্তগা ৱারি-ৱাতাই শান্নগনু।
  25. নহাক্না নুমিৎ খুদিংগী অয়ুক পুং 4:20দা হৌগৎলু।
  26. অকি-অখংগী (horror) ভিদিওশীং য়েংউ।
  27. “মখোয়”না থারকপা ম্যুজিক অদু মুন্না তাউ।
  28. নোংমদা নহাক্কী হকচাংদা অমুক্তি (1 cut) লেল্লু।
  29. অৱাংবা বিল্ডিং অমদগী চোংথৌ। নপুন্সিদু লোয়শিঞ্জৌ।

গবর্ণমেন্টনা ইন্টরনেট কম্পনিশীংদা গেম অসি থীংজিন্নবা খংহনখ্রে। মসি ওইরবসু মমা-মপা ওইবশীংনা চেক্সিনবা মথৌ তারিব্রা?

গবর্ণমেন্টনা গুগল, ফেসবুক, হ্ৱাটসএপ, ইনষ্টাগ্রাম, মাইক্রোসোফট অমসুং য়াহুনচিংবা কম্পনিশীংদা মীওইবগী পুন্সিবু মাংহনবা ঙম্বা গেম অসিগী লিঙ্ক  খুদিংমকপু খুদক্তগী লৌথোক্নবা খংহল্লবসু, কম্পনিশীং অসিনা মতৌ করম্না গেম অসি ফংহল্লোইদগে (inaccessible) হায়বসি ময়েক শেংদ্রি। মসিগী মরমদি  গেম অসি পাক-শন্না মীয়ামদা ফংহনবা নত্তে অমসুং ফ্রি ওইনা দাউনলোদ তৌবা য়াবসু নত্তে। মসিদি ক্লোজ সোসিএল মিদিয়া গ্রুপশীংদা (closed social media groups) লোন্না থুপ্না পাংথোকপা ৱারি-ৱাতাইগী খুত্থাংদা চত্থবা সোসিএল মিদিয়াগী থৌওং অমনি। করিগুম্বা এদমিনিষ্ট্রেটর অমনা নঙোন্দা কন্তেক্ট তৌরক্লবা অমসুং নহাকপু হ্ৱাল, নত্ত্রগা কেন্দিদেট অমা ওইবা য়ারে হায়না লিষ্ট তৌরক্লবা মতমদতা নহাক্না গেম অসিগী শরুক অমা ওইবা য়াগনি।

মসিগী মথক্তা, মসি হৌজিক্তি, এ সাইলেন্ট হাউস (A Silent House), এ সি ওফ হ্ৱাল (A Sea of Whale) অমসুং ৱেক মি অপ এট 4:20 AM  (Wake Me Up at 4:20 AM) হায়বা তোঙান-তোঙানবা মমীংশীংদা ফংলে। মসি নত্তবা, অতোপ্পা মসিগা মান্নবা গেমশীংসু ফংলম্বা য়ারি।

গেম অসিদা শরুক য়াখিবা য়াই হায়বগী খ্বাইদগী চেক্সিন্নিংঙাই ওইবসি করম্বা চহি মতাংনো?

ইনখৎলকপা চহি মতাং অমসুং মরক্কী চহিশীং (হায়বদি, চহি 12দগী 19 ফাউবগী মরক্তা লৈবা চহিশীং) অসি সোসিএল মিদিয়া খ্বাইদগী হেন্না শিজিন্নবা গ্রুপশীংনি, অমদি মখোয় অসি ব্লু হ্ৱাল চেলেঞ্জগী লাংদা খ্বাইদগী থুগনবা কাংলুপনি।

ইনখৎলক্লিবা নহাশীংনা, মখোয়না গেম অসিদা পুক্নিং থীংজিনবা হৌরে হায়বা তাকপা য়াবা খুদমশীং অদু করি করিনো?

অঙাং অমনা মশা মথন্তা নাইতোম লৈনিংবা ফাউরবা, মহাক্কী ইমুং-মনুং অমসুং মরুপ-মপাংশীংগা ৱারি-ৱাতাই তৌবা লেপ্লবা, য়ুমদগী চেন্নবগী নত্ত্রগা শিবগী ৱারি তোইনা শারবা, নত্ত্রগা চাবগী অমসুং/ নত্ত্রগা তুম্বগী হৈনবীশীংদা অহোংবা লাক্লবদি, খুদক্তা অখন্ননা পুক্নিং চংবীগদবনি। মখোয় অসি, অঙাং অমনা ওনলাইন গেম অসিদা শরুক য়ানবগী পুক্নিং থীংজিনবা হৌরে তাকপা মরুওইবা সিম্পটমশীংনি।

মতৌ করম্না মমা-মপা ওইবশীংনা মখোয়গী অঙাংশীংবু অসিগুম্বা মীশী-মীনা থোকহনবা য়াবা ওনলাইন গেমশীংদা শরুক য়াবা থীংগদগে নত্ত্রগা মীৎয়েং চংগদগে?

মতৌ করম্না নহাক্কী অঙাং অদুবু ওনলাইন শিজিন্নবদা শাফনা (safe) থমগদগে হায়বগী তৌগদবা থবক খরা পীরি:

  • ইসু অমগী মতাংদা অচুম্বা ইনফোর্মেসন অমা লৈবা হায়বসি খ্বাইদগী হেন্না মরুওই। হৌখিবা মতম খরসিদা থোকখিবা মশা মথন্তা শীজবগী থৌদোকশীংদা ব্লু হ্ৱাল চেলেঞ্জশীংনা লৌরিবা শক্লোন অদুগী মতাংদা ভেরিফাই তৌদবা মরম্না, ইসু অসিগী মতাংদা পীরিবা মিদিয়াগী রিপোর্টশীংসি ময়েক শেংদে। ইসু অসিগী মতাংদা মিদিয়ানা চংলিবা মীৎয়েংশিংনা মরম ওইদুনা নহাক্কী অঙাং অদুনা ব্লু হ্ৱাল চেলেঞ্জগী মতাংদা খংবা ওইরম্বসু য়াই।  খুদোংথীবা থৌদোক থোকহন্দনবগীদমক্তা, অকক্নবা থৌরাং খরদি (certain measures) অঙাংশীংদা খংহন্দুনা ৱারি-ৱাতাই শাবা মথৌ তাই।
  • নহাক্কী অঙাং অদুনা, লমচৎ চুমদবা নত্ত্রগা হিংসাবু প্রোমোট তৌদবা মশাগী চহি মতাংগা চুনবা ওনলাইন সাইটশীংখক্তমক শীজিন্নহন্নবা কুপ্না য়েংশিনগদবনি।
  • মতম পুম্নমক্তা নহাক্কী অঙাং অদুনা, ইমুংগী ওইনা থম্বা মফমদা (family space) লৈবা কম্প্যুটর অমদগী ইন্টরনেট শিজিন্নহনগদবনি।
  • নহাক্কী অঙাংগা তোইনা ৱারি-ৱাতাই শান্নগদবনি। ওনলাইন ৱার্ল্ড অদু পুন্না খংমিন্নৌ অমসুং মওং চুম্বা অমসুং শাফবা ওনলাইনগী লমচৎ উত্তুনা পুক্নিং নুংঙাইনিংঙাই ওইবা এক্টিভিটিশীং পাংথোকমিন্নগদবনি।
  • নহাক্কী অঙাংনা শিজিন্নরিবা দিভাইস পুম্নমক্তা পেরেন্টেল কন্ত্রোলশীং শিজিন্নৌ। কম্প্যুটর শিজিন্নবগী মতম কুপ্না য়েংশিল্লু অমসুং মহাক্কী ওনলাইন এক্টিভিটিশীংদুদা মীৎয়েং চংগদবনি।
  • নহাক্কী অঙাংগীদমক ফিদম্নিঙাই ওইবা মীশক (role model) ওইবীয়ু। নহাক নশাগী ওনলাইন এক্টিভিটিশীংদুসু খংজিনবীগদবনি (conscious)।
  • অতোপ্পা মমা-মপাশীংগসু ৱারি-ৱাতাই শাবীয়ু, করিগুম্বা সমস্যা লৈরবসু তান্নবীয়ু অমসুং নহাক্কী অঙাংশীংবু মতেং পাংনবগী খ্বাইদগী ফবা লম্বীশীংদু খন্নবীয়ু।
  • হৌজিক চৎনরিবা ইন্টরনেটকী মওং-মতৌ অদু নশামকসু খংজিন্নবা হোৎনৌ।
  • নহাক্কী অঙাংগী মওং-মতৌ অদু কুপ্না য়েংউ। তুমিন লৈগনবা, ৱারি-ৱাতাই কয়া তৌদবা, লাইরিক-লাইশুদা হৈনিংবা পোক্তবা অমসুং গ্রেদ হন্থরকপগী থৌওংনচিংবা মহৌশাগা মান্নদবা অহোংবশীং লৈরকপ্রা হায়বদু কুপ্না শেন্নগদবনি। করিগুম্বা নহাক্না অসিগুম্বা অহোংবা অমহেক্তা লৈরকপা উরবদি, মহাক্কী ওনলাইন এক্টিভিটিশীংদু কুপ্না য়েংউ, স্কুল ওথোরিটিশীংগা ৱারি-ৱাতাই তৌ নত্ত্রগা চাইল্ড সাইকোলোজিষ্ট অমগা তান্নৌ।
  • করিগুম্বা নহাক্কী অঙাং অদুনা হান্ননা ব্লু হ্ৱাল চেলেঞ্জ শান্নরে হায়বা নহাক্না খংলবদি, খুদক্তা মহাকপু দিভাইস অমহেক্তদগী ইন্টরনেট শিজিন্নবা লেপহনগদবনি।
  • থোকখিবা থৌওংশীংদুগী মতাংদা নহাক্কী লোকেল পুলিস ওথোরিটিদা পাউ পীয়ু অমসুং মথংদা পায়খৎকদবা সেফটিগী থৌরাংশীংগী মতাংদা মখোয়গী পাউতাক লৌ।

ওজাশীংনা মতৌ করম্না মতেং পাংবা য়াবগে?

  • ছাত্রশীংগী সোসিএল বিহেবিয়র অমসুং মখোয়না গ্রেদ তাথরকপগী (falling grades) মতাংদা ওজাশীংনা মীৎয়েং চংবা মথৌ তাই।
  • মখোয়না অঙাং খুদিংমক্কী লমচৎ-শাজৎশীং কুপ্না য়েংশিনবা মথৌ তাই।
  • মখোয়না এন্টি-সোসিএল বিহেবিয়রশীংবু কুপ্না য়েংশিনগদবনি, অতৈ অঙাংশীংগা ৱারি-ৱাতাই তৌদবা নত্ত্রগা তোৎন-তিন্নগন্দবা অঙাংশীংবু, মখোয় মশামক্না হকথেংননা লনাই ওইনা ৱারি-ৱাতাই শাগদবনি।
  • করিগুম্বা মখোয়না চিংননিংঙাই ওইবা নত্ত্রগা চেক্সিন্নিংঙাই ওইবা থৌওং অমা হেক উরকপগা খুদক্তা স্কুল ওথোরিটিদা পাউ পীগদবনি।
  • মখোয়না অঙাংশীংবু মতম মতমগী ওইনা ইন্টরনেটকী কান্নবা অমসুং কান্নদবশীংগী মতাংদা তাকপী-তম্বীগদবনি।

সোর্স : নেসনেল কমিসন ফোর প্রোটেক্সন ওফ চাইল্ড রাইটস

2.7
অদোমগী সজেসন পোষ্ট তৌরো

(মথক্কী কন্টেন্ট অসিদা অদোমগী কমেন্ট/সজেসন অমা লৈরবদি মসিদা পোষ্ট তৌবিয়ু).

Enter the word
Back to top