হোম / মহৈ-মশিং / পেরেন্টশীংগী কোর্ণর / ইনখৎলক্লিবা অঙাংশীংগী পুক্নিং-ৱাখল নুংঙাইনা থম্বা
শেয়র
Views
  • ষ্টেট শেমদোক্নবা হাংদোকউ

ইনখৎলক্লিবা অঙাংশীংগী পুক্নিং-ৱাখল নুংঙাইনা থম্বা

তোপিক অসিনা ইনখৎলক্লিবা অঙাংশীংগী পুক্নিং-ৱাখলবু নুংঙাইনা থম্নবগী পাংথোক্কদবা থৌওংশীং পীরি।

ইনখৎলকপা মতম (Adolescence) হায়বসি মীওইবগী পুন্সিদা, হকচাংগী, পুক্নিংগী অমসুং সমাজগী ওইবা অচৌবা অহোংবা লৈরকপা মতম অমনি। অহোংবশীং অসিনা পুক্নিংবু ৱাহনবা অমসুং খোংরাং-খোইশাউনবা পোকহনবা য়াই। চরাংনবা, অৱাবা অমসুং অশাউবা ৱাখলশীং অমসুং পুক্নিংদা ফাউরকপশীং লৈবা হায়বসি ইনখৎলকপা মতমদা থোকপা শরুক অমনি। অদুম ওইনমক, করিগুম্বা ৱাখলশীং অমসুং পুক্নিংদা ফাউরকপশীং (thoughts and feelings) অসিনা মতম শাংনা লৈথরকপা তারবদি, অমসুং মরুওইনা করিগুম্বা মসিনা মীওই অমবু মহাক্কী নোংমগী নোর্মেল এক্টিভিটশীং পাংথোকপদা অপনবা লৈহল্লবদি, মসি পুক্নিং-ৱাখলগী দিসওর্দর (mental disorder) লৈরে হায়বা তাকপা ওইবসু য়াই।

ইনখৎলকপা নহা কয়াদা পুক্নিং চরাংনবা অমসুং পুক্নিং ৱাবগুম্বা প্রোব্লেমশীং লৈবা মরমদগী মখোয়দা নুংঙাইতবা পোকহল্লি। প্রোব্লেমশীং অসিগী ফল ওইনা ইনখৎলক্লিবা নহা খরদি মখোয় মশাদা অশোক-অপন থোকহঞ্জৈ। য়াম্না নুংঙাইতবা অমা ওইনা, মশা মথন্তা শিজবা হায়বসিনা ইনখৎলক্লিবা নহাশীংগী মরক্তা অশি-অনা থোকহন্নবা মরুওইবা মরম অমা ওইরি। অদুম ওইনমক, ইনখৎলক্লিবা নহাশীংনা মখোয়গী পুক্নিং-ৱাখল অদু ফনা লৈনবা খোংথাং কয়া লৌখৎপা য়াই, অমসুং অনাবা অতৈদা তৌবগুম্না, মখোয়গী অকোয়বদা লৈবা মখোয়বু নুংশিবীবা মীওই কয়ানসু মতেং পাংলক্কনি।

পুক্নিং-হকচাংবু নুংঙাইনা থম্নবা ইনখৎলক্লিবা নহাশীংদা পীবা পাউজেলশীং

  1. ইনখৎলকপা মতম হায়বসি মীওই অমগী পুন্সিদা য়াম্না অচৌবা অহোংবা পুরকপা মতম অমনি। অহোংবশীং অসিনা পুক্নিং ৱাহনবসু য়াই।
  2. নুমিৎ খুদিংগী, নঙোন্দা পুক্নিং নুংঙাইবা ফাউবা থবকশীং তৌদুনা, নহাক্কা মত চান্নজবা মীওইশীংগা লৈমিন্নবা অমসুং পুক্নিং-ৱাখল ৱাবা হন্থহনবদা মতেং ওইগদবা থবক-ইনখাং খরা তৌদুনা মতম লেনবা।
  3. মরক-মরক্তা পুক্নিং ৱাবা, নুংঙাইতবা নত্ত্রগা অশাউবা ফাউবা হায়বসি নোর্মেলনি। মরুপ-মপাংশীং, নহাক্কী ইমা-ইপাশীং নত্ত্রগা অতৈ থাজবা য়াবা মীওইশীংগা ৱারি-ৱাতাই শান্নবা হায়বসি য়াম্না কান্নগনি। মখোয়না নঙোন্দা পুক্নিং নুংঙাইহনবা অমসুং সপোর্ট পীগনি, অমসুং সমস্যাশীং শেংনা খংদোকপদা মতেং পাংগনি।
  4. নঙোন্দা পুক্নিং ৱাবা, নত্ত্রগা ৱাখল চরাংনবা, ৱাখল নুংঙাইতবা নত্ত্রগা অশাউবা লৈরকপা মতমদা, মদুবু কোকহন্নবা পাম্বৈ অমা ওইনা হিদাক মনা, য়ু নত্ত্রগা অতৈ নিশা শিজিন্নরোইদবনি। য়ু অমসুং অতৈ নিশাশীংনা ৱাখল ৱাবা অমসুং ৱাখল চরাংনববু হেন্না শোকচিলহনবা য়াই। নিশাশীং অসিগী হৈনবী থাদোকপা ঙমদবা মীওই (addicted) অমা ওইরকপসু য়াই।
  5. নঙোন্দা পুক্নিং ৱাবা, নুংঙাইতবা নত্ত্রগা অশাউবা লৈরকপা নত্ত্রগা প্রেসর পীরকপা মতমদা হাথু-হাথুনা নত্ত্রগা খন্থদবা মওংদা থবক তৌরোইদবনি। অসিগুম্বা পুক্নিংদা ফাউরকপশীং অসি থেংননবগীদমক্তা নঙোন্দা মীগা খৎননিংবা নত্ত্রগা মোটোরসাইকল অমা য়াংনা থৌনবা পুক্নিংদা ফাউরকপা য়াই। মসিনা নহাক অমসুং অতৈবুসু অশোক-অপন থোকহন্নবগী মচাক ওইহল্লকপা য়াই।
  6. করিগুম্বা নঙোন্দা পুক্নিং নুংঙাইতবা, চরাংনবা নত্ত্রগা অশাউবা অসি নুমিৎ খুদিংগী মতম শাংনা ফাউরক্লবা, মরুওইনা করিগুম্বা মখোয় অসিনা নহাক্কী নুংতিগী থবক-থৌরমশীংদা অকায়বা পিরক্লবা (খুদম ওইনা, নহাক্কী স্কুলগী থবক্তা), নত্ত্রগা করিগুম্বা নহাক্না নশামকপু নত্ত্রগা অতৈবু অশোক-অপন থোকহন্নবগী ৱাখল লাক্লবদি, হেলথ ৱার্কর অমদগী মতেং লৌগদবনি।

ইনখৎলক্লিবা নহাশীংগী পুক্নিং-হকচাংবু নুংঙাইনা থম্নবা মমা-মপাশীংদা পীবা পাউজেলশীং

নহাক্না খংজিনবা মথৌ তাবশীং

  1. ইনখৎলকপা মতম হায়বসি নহা ওইরিবা মীওইশীংনা মনিংতম্বা মপুং-মরৈ ফারবা মীওই অমা ওইবদা চংবা স্কিলশীং তমশিন্নবগী মতম শরুক অমনি। হায়রিবা মতম অসিদা, ইনখৎলক্লিবা নহা কয়াদি মখোয়গী মমা-মপাশীংগী লমজিং-লমতাকশীংবু ইন্দবগুম্না উই, অমসুং মখোয়না চহি নৌরিঙৈদা লৈখিবা মমা-মপাশীংগা নক্না লোয়নবগী মওং অদুদগী লাপথোরকপা উই। মসি মমা-মপাশীংনা য়াবা ঙমদে। অদুম ওইনমক, ইনখৎলক্লিবা নহা পুম্নমক্না, মমা-মপাশীংগী লমজিং-লমতাক অমসুং সপোর্টকী মথৌদি অদুম তাই অমসুং মসিদগী কান্নবা কয়াসু ফংলিবনি। ইমুং অমদা চৎনরিবা লোনচৎ-শাজৎশীংনা নহা ওইরিবা মীওই অমবু পুক্নিং নুংঙাইনবা লৈনবগী পোজিটিভ ওইবা ৱাখল্লোন অমা পীবা ঙম্মী।
  2. পুক্নিং ৱাবা অমসুং অশাউবা পোকপনচিংবা পুক্নিংগী ঈহুলশীং অসিগা লোয়ন-লোয়ননা, নুংতিগী ওইবা পুন্সিদা লৈরিবা ৱাখলগী চরাংনবা অমসুং নুংঙাইতবশীং অসি মওং চুম্বা লম্বী অমদা লাকশীন্নবা স্কিলশীং, ইনখৎলক্লিবা নহাশীংনা শেমগৎপা মথৌ তাই। মখোয় মশানা থেংনবা ঙমদ্রে হায়বা খংলবদি মখোয়না মখোয়গী মমা-মপাশীংগী মতেং লৌগদবনি হায়বসিমসু খংজিনবা মথৌ তাই।
  3. থুনা দাইগ্নোস তৌবনা অমসুং মতিক চাবা লাইয়েং পীবনা, পুক্নিং-ৱাখলগী প্রোব্লেমগা শাগোন্নরিবা ইনখৎলক্লিবা মীওই কয়ানা হকশেল ফনা অমসুং মশক থোকপা পুন্সিদা অমুক হন্না লাকপা ঙমগনি।

নহাক্না করি করি পাংথোকপা তাবগে

  1. নচানুপা নত্ত্রগা নচানুপী অদুগা পাউ ফাউদোক্ননবা কন্না হোৎনগদবনি। মখোয়বু মখোয়গী আশা অমসুং অপাম্বশীং, অকিবা অমদি পুক্নিংদা খল্লিবশীংদু খংমিন্ননবা পুক্নিং থৌগৎকদবনি। মখোয়গী থবক-থৌরমশীং অমসুং মতশীংদা পুক্নিং চংবা উৎপীগদবনি। নহাক্কী ৱাহৈ অমসুং থবক্কী খুত্থাংদা মখোয়বু নহাক্না পুক্নিং চংলি হায়বদু উৎকদবনি। মথৌ তারকপা মতমদা নহাক্না মখোয়বু সপোর্ট তৌনবা মতম চুপ্পদা লেপ্লি হায়বদু মখোয়দা খংহল্লু। ইমুংগী অমসুং কম্যুনিটিগী থবক-থৌরমশীংদা শরুক য়ানবা মখোয়বু পুক্নিং থৌগৎপীগদবনি।
  2. নহাক্কী নচানুপা নত্ত্রগা নচানুপীদুদা, নুংতিগী ওইবা পুন্সিদা থেংনরিবা ৱাখল ৱাবা অমসুং নুংঙাইতবশীংবু থেংননবা মওং চুম্বা লম্বীশীংগী মতাংদা, হায়বদি মখোয়গী পুক্নিংবু পোত্থাহনগদবা থবক-থৌরমশীং পাংথোকপা, মখোয়গা চান্নবা মীওইশীংগা লোয়নবা, অমসুং ফিজিকেল এক্টিভিটি খরা পাংথোকপনচিংবগী মতাংদা ৱারি-ৱাতাই তৌগদবনি।
  3. হিদাকমনা, য়ু অমসুং অতৈ নিশাশীংবু, নত্তবা ৱাখল অমসুং পুক্নিংগী ঈহুলশীং ফাথনবা পাম্বৈ অমা ওইনা শিজিন্নবগী খুদোংথীবশীং মখোয়দা খংহনগদবনি। মসিগী মথক্তা, মখোয়না ৱাখল নুংঙাইতবা মতমদা অতোপ্পা মীওইগা ফুনবা নত্ত্রগা খুদোংথীনিঙাই ওইবা মওংদা গারি থৌবনচিংবা থবকশীং পাংথোকপনা মখোয় মশাদতা নত্তনা অতৈ মীওই কয়াদসু অশোক-অপন থোকহনবা য়াই হায়বদু খংহনগদবনি। মখোয় মশানা মখোয়গী প্রোব্লেমশীংদু থেংনবা ঙম্লোয় হায়না মখোয়গী পুক্নিংদা ফাউরবদি অতোপ্পদগী মতেং লৌনবগী মতাংদা মখোয়গা ৱারি-ৱাতাই শাবীগদবনি।
  4. নহাক্কী নচানুপা নত্ত্রগা নচানুপী অদুগী মওং মতৌ নত্ত্রগা লমচৎ-শাজৎ (mood or behaviour)তা অহোংবা লাকপ্রা হায়বদু কুপ্না য়েংশিনগদবনি। মথা শাবা (পুক্নিং ৱাবা) নত্ত্রগা কোক্কী অনাবা লৈরকপগী কমন ওইবা খুদমশীংগী মনুংদা, তুম্বা-চাবগী মফম-মতম নাইরক্তবা; স্কুল কাবগী চাং নত্ত্রগা মার্ক ফংবা হন্থরকপা; পুক্নিং চংলক্তবা; হৈনিংবা লৈরক্তবা; তোইনা কপকনবা নত্ত্রগা উপাই নত্ত্রগা আশা লৈত্রে হায়না তোইনা ফাউবা উরকপা; পুক্নিং ৱাবা অমসুং লৈতাদবা; শাউদুনতা লৈবা; কোক চিকপা নত্ত্রগা পুক নারে হায়না তোইনা কমপ্লেন্ট তৌবা অমসুং য়ু নত্ত্রগা অতৈ নিশাশীং কা-হেন্না শিজিন্নবা। করিগুম্বা অহোংবশীং অসিগী মনুংদগী অমহেক্তা উরকপা নত্ত্রগা নুমিৎ কয়ানি লৈরক্লবদি, হেলথ ৱার্কর অমদগী মতেং লৌগদবনি।
  5. করিগুম্বা নহাক্কী নচানুপা নত্ত্রগা নচানুপী অদুনা মশামকপু নত্ত্রগা মী অতৈবু অশোক-অপন থোকহন্নবগী নত্ত্রগা, শিজনবা নত্ত্রগা হাৎনবগী ৱাখল লাকপা উরবদি খুদক্তা হেলথ ৱার্কর অমদগী মতেং লৌগদবনি।

হিদাকমনা, য়ু অমসুং অতৈ নিশাশীং

ইনখৎলকপা মতম হায়বসি খংনিংবা অমসুং চাংয়েং তৌনিংবগী মতম অমনি। ইনখৎলকপা নহা কয়ানা হিদাকমনা, য়ু অমসুং অতৈ নিশাশীং শীজিন্নৈ। মসি মখোয়না তোঙান-তোঙানবা মরমশীং হায়বদি, অহল শানিংবা, মরুপ ওইনবা, মপুং-মরৈ ফারবা মীওইশীংগা মান্নরে উৎনবা, নত্ত্রগা ৱাখল নুংঙাইতবা ফহন্নবা শিজিন্নৈ।

হিদাকমনা, য়ু অমসুং অতৈ নিশাশীং শিজিন্নবনা, ইনখৎলক্লিঙৈ অমসুং মপুং-মরৈ ফারবা মতম অনিমক্তা হকচাং শোকহনবগী ফল (negative health consequences) পীরকপা য়াই।

  1. হিদাকমনা শিজিন্নবনা খুৎশা, চিনবান অমসুং য়া চুহল্লি। মসিনা শ্বর মনম নমথীহল্লি। মৈখু শিজিন্নবা মীওইশীংদি মশা শোল্লি অমসুং য়াম্না থুনা শ্বর থবেৎ-থবেৎ হোনগল্লি। হিদাক মনাশীংনা অহল ওইশিল্লক্লবা মতমদা, মরুওইনা কেন্সর অমসুং থম্মোইগী লায়না লৈহল্লি।
  2. চাং য়ামদনা ওইরবসু, য়ু থকপনা ৱাখল খন্থবগী চাং হন্থহল্লি। অতেনবা মতম পরিং অমদা য়ুগী চাং য়াম্না থকপনা ন্যুরোলোজিকেল অমসুং লিভরদা মাং-তাকপা থোকহনবা ঙম্মী।
  3. কেনাবিস, হিরোইন, এম্ফেটামাইনস নত্ত্রগা কোকেইন শিজিন্নবনা ব্রেইন, লিভর, কিদনি অমসুং লংসপু, অতেনবা অমসুং অশাংবা মতমগী ওইনা শোকহনবা ঙম্মী। নিশা কাপ্পদা য়েত্তুম অমসুং সিরিঞ্জ পুন্না শিজিন্নমিন্নবনা HIV (ঐচআইভি) লৌনবগী চাং হেনগৎহল্লি।
  4. হিদাকমনা, হিরোইন, এম্ফেটামাইন অমসুং কোকেইনগুম্বা নিশাশীংনা মসিদা তাংজহল্লি। নিশাশীং অসিদা তাংজবনা নুংতিগী ওইবা থবক-থৌরমশীং পাংথোক্নবগী মপাঙ্গল হন্থহল্লি অমসুং মসিনা ইমুংগী অতৈ মীওইশীং, মরুপ-মপাংশীং অমসুং অতৈ মীওইশীংগসু ৱাখল চুশিন্নদবা থোকহল্লি। নিশাদা তাংজবা মীওই অয়াম্বদা, মসি মখোয়গী ইনখৎলকপা মতমদা শীজিন্নখিবদগী ওইগল্লি।
  5. য়ু নত্ত্রগা অতৈ নিশাশীংগী ময়াই লৈরিঙৈদা মীশীংনা, মখোয়না নোর্মেল ওইবা মতমদা তৌদবা থবক কয়া, হায়বদি খুদোংথীনিঙাই ওইবা মওংদা গারি থৌবা, চিন্না নত্ত্রগা খুৎ য়াউনা খৎন-চৈনবা, নত্ত্রগা প্রোটেক্সন য়াউদনা হক্তিন্নবগী থৌওং অসিনচিংবসি পাংথোক্কল্লি। নিশাশীং অসিগী ময়াইদগী ইনখৎলক্লিবা নহা কয়া গারি থেংজিন্নবনা মরম ওইদুনা শিহল্লি।

ইনখৎলক্লিবা নহাশীংগীদমক্তা পীরিবা পাউজেলশীং

  1. নহাক্কী অকোয়বদা লৈমিন্নরিবা মীওইশীং, টেলিভিজন্দা উৎলকপা ইমেজ অসিনচিংবনা, হিদাকমনা, য়ু নত্ত্রগা অতৈ নিশাশীং শিজিন্ননবা পীরকপা প্রেসরদা চৎলোইদবনি।
  2. করিগুম্বা কনাগুম্বা মীওই অমনা নঙোন্দা নিশা শিজিন্ননবা হৌদোরক্লবদি নহাক্কী মরুপ-মপাংশীং, নমা-নপাশীং নত্ত্রগা অতৈ থাজবা য়াবা অহলশীংদা খংহল্লু। মখোয়না নহাকপু নিশাশীংদু শিজিন্নহন্দবদা মতেং পাংগনি।
  3. করিগুম্বা নহাক্না য়ু নত্ত্রগা অতৈ নিশাশীং শিজিন্নবা হৌরবদি, নহাক্কী মরুপশীং, নমা-নপা নত্ত্রগা অতৈ থাজবা য়াবা অহলশীংদগী মতেং লৌ। নিশাশীংদু শিজিন্নবা তোকহনবদা মখোয়না নহাক্কী নতেং পাংগনি।
  4. করিগুম্বা নহাক্না ৱাখল খন্থবা ৱাৎহনবা য়ু নত্ত্রগা অতৈ নিশাশীং শিজিন্নরবদি, নহাক্না থাজবা মীওই অমগা শাফবা মফম অমদা শিজিন্নমীন্নৌ। করিগুম্বা নিশাশীং অদু নশা নথন্তা শিজিন্নরবদি ওভরদোজ ওইবা য়াবগী চাং হেল্লি, অমসুং করিগুম্বা নহাক্না শাফদবা মফম অমদা নথন্তা লৈরবদি ক্রাইম নত্ত্রগা ভাইওলেন্সকী ভিক্টিম অমা ওইবা য়াবগী চাংসু হেল্লি।
  5. করিগুম্বা নহাক্না ৱাখন খন্থবা ৱাৎহনবা য়ু নত্ত্রগা অতৈ নিশাশীং শিজিন্নরবদি মখোয়গী ময়াই লৈরিঙৈদা কার, মোটোরসাইকল নত্ত্রগা বাইসাইকল থৌদনবা হোৎনগদবনি।

মমা-মপাশীংদা পীবা পাউজেলশীং

অদোমনা করি খংবা তাবগে:

  1. নিশা শিজিন্নবগী অমাংবশীংগী মতাংদা নচানুপা নত্ত্রগা নচানুপীদা ৱাখল-লৌশীং হেনগৎহল্লু, অমসুং মখোয়গী চহি লেঙ্গাগী মীওইশীংনা অমসুং মিদিয়ানা মখোয়দা পীরকপা য়াবা ঈথীলগী মতাংদা খংহন্নবা হোৎনগদবনি, অমদি মখোয়বু নিশাদগী লাপথোক্না লৈহনবদা মতেং পাংবীগদবনি।
  2. নিশা শিজিন্নরে হায়বা ঙন্না খংদোকপা, মদুগী মথংদা হেলথ ৱার্করশীংনা কাউন্সেলিং তৌবগী থৌওং অসিনা ইনখৎলক্লিবা নহাশীংবু নিশা শিজিন্নবা থাদোকপা নত্ত্রগা মখোয়না থোকহনগদবা অমাংবশীংগী চাং হন্থহনবদা পুক্নিং থৌগৎকনি।

অদোম্না করি তৌবা তাবগে:

  1. অদোমগী নচানুপা নত্ত্রগা নচানুপী অদুদা হিদাকমনা, য়ু নত্ত্রগা অতৈ নিশাশীং শিজিন্নবনা থোকহনবা অমাংবশীংগী মতাংদা ৱারি শাবীয়ু। মসি ইনখৎলকপা মতমগী অঙনবা শরুক্তা পাংথোকপীয়ু। মখোয়না শিজিন্নবা হৌদ্রিবা ফাউবা ঙাইগনু।
  2. নচানুপা নত্ত্রগা নচানুপী অদুগা, মখোয়গী চহি লেঙ্গাগী মীওইশীংনা অমসুং মিদিয়াগী ইমেজশীংনা মখোয়বু নিশা শিজিন্নহন্নিংবগী ৱাখল পোকহল্লকপা য়াবশীংদুগী মতাংদা ৱারি-ৱাতাই শান্নবীয়ু। মখোয় মশাগীদমক্তা করিনা খ্বাইদগী হেন্না ফবগে হায়বদু লেপচবগী মরুওইবদু মখোয়দা তাকপীয়ু।
  3. নহাক্না মখোয়দগী করম্বা লমচৎ-শাজৎ আশা তৌবগে হায়বদু শেংনা খংহল্লু। অদোম ইশাগী লমচৎ-শাজৎনা মখোয়গীদমক্তা ফিদম্নফম ওইহনবীয়ু।
  4. নচানুপা নত্ত্রগা নচানুপী অদুনা নিশা শিজিন্নরব্রা হায়বদু কুপ্না য়েংশিল্লু। মদুগুম্বা হেক লৈবা উরকপগা, মদু খন্নৌ, অমসুং নখোয় পুনশীন্নদুনা হেলথ ৱার্কর অমদগী মতেং লৌ।

সোর্স : রাষ্ট্রিয়া কিশোর স্বাস্থা কার্য্যক্রম – রিসোর্স বুক বাই মিনিষ্ট্রি ওফ হেলথ এন্ড ফেমিলি ৱেলফেয়র

2.71428571429
অদোমগী সজেসন পোষ্ট তৌরো

(মথক্কী কন্টেন্ট অসিদা অদোমগী কমেন্ট/সজেসন অমা লৈরবদি মসিদা পোষ্ট তৌবিয়ু).

Enter the word
Back to top