শেয়র
Views
  • ষ্টেট শেমদোক্নবা হাংদোকউ

অরথ্রাইটিস

কাখল অসিদা অরথ্রাইটিস থোকহল্লকপগী মরম, লাইওং অমসুং মেনেজমেন্টকীদমক্তা পাংথোক্কদবা থবকশীংগী মতাংদা নৈনরি।

অরথ্রাইটিস হায়বসি করিনো?

অরথ্রাইটিস হায়বগী অর্থদি “শরু তাং (joint) অমা পোমদুনা নাবা (inflammation)” হায়বনি। শরু তাংশীং চপ তিংবা (Stiffness) অমসুং পোমথোকপা (swelling) য়াউগনি। অরথ্রাইটিসকী মনুংদা তোঙান-তোঙানবা রিয়ুমেটিককী লায়না (rheumatic diseases) 100দগী হেন্না য়াউই অমসুং মসিগী মনুংদা খ্বাইদগী কমন ওইরিবসি ওষ্টিওঅরথ্রাইটিস (osteoarthritis) হায়রিবা লায়না অসিনি।  য়াম্না তোইনা উবা ফংবা অরথ্রাইটিসকী অতৈ মওংশীংগী মনুংদা রিয়ুমেতোইদ অরথ্রাইটিস, লুপুস, ফিব্রোমিয়ালজিয়া (fibromyalgia) অমসুং গাউট অসিনি। কমন ওইবা লাইওংশীংগী মনুংদা শরুশীংদা নত্ত্রগা মসিগী অকোয়বদা নাবা, চিকপা, চপ তিংবা অমসুং পোমখৎপসিনি। রিয়ুমেতোইদ অরথ্রাইটিস অমসুং লুপুসকুম্বা অরথ্রাইটিসকী মওং খরনা ওর্গান কয়া শোকহন্দুনা লাইওং কয়া থোকহল্লকপা য়াই। অরথ্রাইটিস অসি চহি 65 নত্ত্রগা মসিগী মথক্কী মীওইশীংদা হেন্না তোইনা নারবসু, চহি মখল কয়াগী মীওইশীংদা (অঙাংশীংসু য়াউনা) নাহনবা য়াই। অরথ্রাইটিসনা শোকহল্লবা মীওইশীংগী শরুক অহুম থোকপগী অনিমুক্তি চহি 65দগী হন্থবা মীওইশীংনি। অরথ্রাইটিস অসি চহিগী কাংলুপ খুদিংমক্কী মীওইশীংদা য়েংলগদি, মসি নুপাদগী (18.7%) নুপীদনা (24.3%)) হেন্না নাই অমসুং মসিনা জাতি-বিজাতি পুম্নমক্কী মীওইশীংবু শোকহল্লি। অরথ্রাইটিস অসি নোর্মেল ওইনা লুম্বা নত্ত্রগা লুম্বা হন্থবা মীওইশীংদগীদি কা-হেন্না নোইবা (obese) মীওইশীংদনা হেন্না নাই।

অরথ্রাইটিসকী খ্বাইদগী কমন ওইবা মখল অহুমদি মখাগীসিনি:

  1. রিয়ুমেতোইদ অরথ্রাইটিস (Rheumatoid Arthritis)
  2. ওষ্টিওঅরথ্রাইটিস (Osteoarthritis)
  3. গাউট (Gout)

অরথ্রাইটিসকী লাইওংশীং

লাইওংশীংগী মওং অমসুং মফম অসি অরথ্রাইটিস মখল অদুগী মখা পোনগনি। মহৌশানা, অরথ্রাইটিসনা শোকহল্লবা মীওইশীংনা শরু তাং অমা নত্ত্রগা মসিদগী হেনবা মফমশীং অমসুং মসিগী অকোয়বদা নাবা অমসুং চপ তিংদুনা লেং-ওৎপা য়াদবা য়াউই। অরথ্রাইটিসকী লাইওং অসি তপ্না-তপ্না নত্ত্রগা খংহৌদনা লাকপা য়াই। অয়াম্বা মতমদা অরথ্রাইটিস অসি কুম লায়না (chronic disease) ওইগল্লি, মরম অদুনা লাইওংশীং অসি লাক্লগা অমুক মাংখিবা য়াই, নত্ত্রগা মতম শাংনা লৈবসু য়াই।

  • শরু তাং অমদা নাবা নত্ত্রগা নারি-নারি তৌবা (প্রেসর পীবা মতমদা নাবা) ফাউরকই অমসুং মদু চৎপা, চৌক্রিদগী হৌগৎপা, ইবা, তাইপ তৌবা, পোৎ অমা পায়বা, মনা-মশীং ককপনচিংবা মতমদা হেন্না নারকপা য়াই।
  • শরু তাংদা পোমথোকপা, চপ তিংবা, ঙাংশিনবা, অমসুং/ নত্ত্রগা শাবুং-শাবুং তৌবা।
  • মরুওইনা অয়ুক্তা চপ তিংবা (Stiffness) ফাউবা।
  • শরু তাংশীং থেক্তোক-থেকচিন য়াদবা।
  • শরু তাং লেং-ওৎপা ৱাবা।
  • শরু তাংগী ফিভম শোয়বা (Deformity)
  • হকচাংগী অরুম্বা হন্থরকপা অমসুং চোকথবা ফাউবা
  • অকক্নবা মওং লৈতনা লাইহৌ হৌবা
  • ক্রেপিটস (Crepitus) (অরথ্রাইটিসনা নারবা শরু তাংশীংনা লেং-ওৎপা মতমদা মখোল থোকপা)

অরথ্রাইটিসনা নারে হায়বা খংদোকপা (Diagnosis of arthritis)

অরথ্রাইটিসনা নারে হায়বা খংদোকপদা হৌজিক্কী অমসুং হৌখিবদা লৈখিবা লাইওংশীংগী অকুপ্পা মেদিকেল হিষ্টরি অমা লৌবা, ফিজিকেল একজামিনেসন, x-রে, অমসুং ঈগী চাংয়েং তৌবা মথৌ তাগল্লি। মতম অমত্তদা অরথ্রাইটিসকী মওং অমদগী হেন্না নাবগী ওইথোকপসু লৈ।

রিস্ক ফেক্টরশীং

অরথ্রাইটিসকী রিস্ককা অকক্নবা ফেক্টর খরগা লোয়নবা উবা ফংই। অসিগুম্বা রিস্ক ফেক্টরশীং অসিগী মনুংদা খরদি শেমদোকপা য়াই অদুগা খরদি য়াদে।

শেমদোকপা য়াদবা রিস্ক ফেক্টরশীং (Non-modifiable risk factors)

  • চহি: অয়াম্বা অরথ্রাইটিসকী মখল থোরকপগী রিস্ক অসি চহি য়ামশিল্লকপগা লোয়ননা হেনগৎলকই।
  • নুপা-নুপী কাংলুপ: অরথ্রাইটিসকী অয়াম্বা মখলশীং অসি নুপীশীংদনা হেন্না কমন ওই; অরথ্রাইটিসনা নাবা মীওই পুম্নমক্কী মনুংদা 60%দি নুপীনি। গাউট অসিনা নুপাদা হেন্না কমন ওই।
  • পারি-পুরিদগী থংথরকপা (Genetic): অকক্নবা জিন খরদি (Specific genes) রিয়ুমেতোইদ অরথ্রাইটিস (RA), সিষ্টেম লুপুস এরিথেমেতস (SLE), অমসুং এঙ্কিলোসিং স্পোন্দিলাইটিস (ankylosing spondylitis)কুম্বা অরথ্রাইটিসকী অকক্নবা মখলশীংগী অহেনবা রিস্ককা লোয়নৈ।

শেমদোকপা য়াবা রিস্ক ফেক্টরশীং (Modifiable risk factors)

  • হকচাংগী অরুম্বা হেনবা অমসুং কা-হেন্না নোইবা (Obesity): হকচাং কা-হেন্না লুম্বনা খুউগী ওষ্টিওঅরথ্রাইটিস (knee osteoarthritis) থোকহল্লক্নবা অমসুং হেঞ্জিন্নবগী মচাক ওইরকপা য়াই।
  • শরু তাংদা শোক-পনবা: শরু তাং অমদা শোক-পনবা থোকপনা শরু তাং অদুদা ওষ্টিওঅরথ্রাইটিস থোকহল্লক্নবগী মচাক অমা ওইহনবা য়াই।
  • ইনফেক্সন: মাইক্রোবাইএল এজেন্ট কয়ানা শরু তাংশীংদা ইনফেক্ট তৌদুনা অরথ্রাইটিসকী মওং কয়া ওইহল্লকপা ঙম্মী।
  • শিনফম: হঞ্জিন-হঞ্জিন্না খুউ কোনশিনবা অমসুং খুউনা ঙাকপগী (squatting) মথৌ তাবা অকক্নবা শিনফম খরদি খুউগী ওষ্টিওঅরথ্রাইটিসনা নাহনবা য়াই।

অরথ্রাইটিসপু কোকহন্নবা করি তৌবা য়াবগে?

  • হকচাং খিংনা লৈগদবনি: অরথ্রাইটিসনা শোকহল্লবা মীওইশীংগী ওইনদি, চৎপা, সাইকল থৌবা অমসুং ঈরোইবগুম্বা ফিজিকেল এক্টিভিটিশীং অসিনা নাবা হন্থহনবা অমসুং ফিজিকেল ফঙ্কসন, মেন্তেল হেলথ অমসুং পুন্সিগী মগুন হেনগৎহনবা য়াউনা কান্নবা কয়া ফংহল্লি। চয়োল অমদা য়ামদ্রবদা নুমিৎ 5নিদি মোদরেট ওইবা ফিজিকেল এক্টিভিটি অসি য়ামদ্রবদা মিনট 30দি পাংথোক্কদবনি। নহাক্না মিনট 10 কান্নরগা শাজেল পাংথোকপা য়াই।
  • হকশেল ফগদবা হকচাংগী অরুম্বা লৈহন্দুনা নহাক্কী শরু তাংশীংদু ঙাকথোকপা য়াই: হকচাংগী অরুম্বা কন্ত্রোল তৌবা অমসুং শোক-পন থোকহন্দনবা থৌরাং লৌখৎপনা মীওই অমদা ওষ্টিওঅরথ্রাইটিস থোকহল্লকপগী চাং হন্থহনবা ঙম্মী। হকচাংগী অরুম্বা হন্থহনবনসু খুউগী ওষ্টিওঅরথ্রাইটিসনা নাবা অরুম্বা হেনবা মীওইদসু লাইওং হন্থহনবা ঙম্মী। শুপ্নগী পাউন্দ 11খক হন্থহনবনা খুউগী ওষ্টিওঅরথ্রাইটিস নৌনা নাহল্লকপগী চাং হন্থহনবা ঙম্মী অমসুং অরুম্বা খরা (55) হন্থহনবনা নাবা হন্থহনবা অমসুং শোয়নাইবদগী ঙাকথোকপা ঙম্মী।
  • ফিজিসিয়ান অমগা তান্নবীয়ু: অরথ্রাইটিস মখল অয়াম্বগী মপুং ফানা নাবা ফহন্নবগী পাম্বৈ লৈত্রবসু, ঙন্না খংদোকহৌবা অমসুং চুনবা মওংগী মেনেজমেন্ট অসি য়াম্না মরুওই। মরুওইনা মসি চিকপা-নাবা মখলগী অরথ্রাইটিসকীদমক্তদি য়াম্না কান্নৈ। খুদম ওইনা হায়রবদা, লায়না-শেমদোক্নবগী (disease-modifying) হিদাক-লাংথকশীং ঙন্না শিজিন্নহৌবনা রিয়ুমেটোইদ অরথ্রাইটিস নাহন্দবদা মতেং পাংই। করিগুম্বা নঙোন্দা অরথ্রাইটিসকী লাইওং লৈরবদি দোক্টরগা তান্নৌ অমসুং নহাক্কী ফিভমদুগা চুনবা মেনেজমেন্ট পায়খৎলু।
  • নহাক্কী শরু তাংশীং ঙাক-শেল্লু: শরু তাংদা শোক-পনবা তৌবনা ওষ্টিওঅরথ্রাইটিস থোকহল্লকপা য়াই। শান্ন-খোৎনবা নত্ত্রগা শিনফমনা অশোক-অপন নংহনখিবা মীওইশীং নত্ত্রগা খুউ কোনশিন্দুনা থবক শুবগী শিনফম পায়বা মীওইশীংদা ওষ্টিওঅরথ্রাইটিসনা নাগল্লি। নঙোন্দা ওষ্টিওঅরথ্রাইটিসনা নাবগী রিস্ক লৈহন্দনবগীদমক শরু তাংদা য়ারিবমখৈ শোকহল্লোইদবনি।

মতৌ করম্না অরথ্রাইটিসপু লাইয়েংগদগে?

অরথ্রাইটিসপু লাইয়েংবগী মীৎয়েং অসি নাবা কন্ত্রোল তৌবা, শরু তাং শোক-পনবা হন্থহনবা, অমসুং পুন্সিগী ফঙ্কসন অমসুং ক্বালিটি ফগৎহনবা হায়বসিনি। অরথ্রাইটিসকী লাইয়েংদা মখাগীসিংশী পাংথোকপা য়াই:

  • হিদাক-লাংথক পীজবা।
  • নন-ফার্মাকোলোজিক থেরাপিশীং।
  • ফিজিকেল নত্ত্রগা ওক্যুপেসনেল থেরাপি।
  • স্প্লিন্ট নত্ত্রগা শরু তাং ঙাক্নবা পোৎশকশীং (joint assistive aids)।
  • পেসেন্ট এজুকেসন অমসুং সপোর্ট।
  • হকচাংগী অরুম্বা হন্থহনবা।
  • সর্জরি।

মওং চুম্বা মেনেজমেন্ট অমসুং ইফেক্টিভ ওইবা লাইয়েংনা অরথ্রাইটিসনা নাবা মীওইশীংবু নুংঙাই-য়াইফনা লৈহনবদা মতেং পাংই।

  • অরথ্রাইটিসকী মরমদা খংজিনবা: অরথ্রাইটিস হায়রিবা লায়না অসিগী অমসুং মেনেজমেন্টগী মরমদা খংজিনবনা ফিভম শোয়বা (deformities) অমসুং অতৈ কমপ্লিকেসনশীংদগী ঙাকথোকপা ঙম্মী।
  • ঈ টেষ্ট তৌদুনা অমদি x-রেগী মতেংনা অরথ্রাইটিসবু মোনিটর তৌগদবনি।
  • দোক্টরনা তাকপা মতুংইন্না হিদাক-লাংথক চাং নাইনা চাগদবনি।
  • হকচাংগী অরুম্বা কন্ত্রোল তৌগদবনি।
  • অফবা চিঞ্জাক চাগদবনি।
  • দোক্টরনা তাকপা মতুংইন্না হকচাং-শাজেল চাং নাইনা তৌগদবনি।
  • হকচাং শাজেল চাং নাইনা তৌদুনা অমসুং রিলাক্সেসন টেক্নিকশীং শিজিন্নদুনা, মতিক চানা পোত্থাদুনা অমদি নহাক্কী থবক অদু প্লান তৌদুনা পুক্নিং ৱাবা (stress) অমসুং চোকথবদগী ঙাকথোক্কদবনি।
  • যোগা অমসুং অতৈ অলটরনেটিভ থেরাপিশীংনা হিদাক শিজিন্নবগী কান্নবদা হেন্না মপুং ফাহল্লি হায়না সাইন্সনা পুথোকখ্রে।

করিগুম্বা হকচাং শাজেল তৌরিঙৈদা অনাবা ফাউরক্লবদি করি তৌগদগে?

অরথ্রাইটিসনা শোকহল্লবা মীওইশীংনা হকচাং শাজেল তৌরীঙৈদা অমদি তৌবা লোয়রবা মতুংদা শরু তাং অমসুং অকোয়বদা লৈরিবা মসলশীংদা খরা নাবা নত্ত্রগা চিকপা ফাউবা হায়বসি নোর্মেলনি। মসি এক্সরসাইজ প্রোগ্রাম অমা হৌবগী অহানবা চয়োল 4 দগী 6 ফাউবদা মরুওইনা থোক্কল্লি। অদুম ওইনমক, অরথ্রাইটিসনা নাবা মীওই অয়াম্বদি এক্সরসাইজ লেপ্তনা তৌবনা মতম শাংনা নাবদগী ফবা ঙমগল্লি। এক্সরসাইজ তৌরিঙৈদা অমসুং লোয়রবা মতুংদা অনাবা খাঙনবগী পাংথোকপা য়াবা থবক খরা মখাদা পীরি:

  • নাবা ফাউবদু খরা ফগৎত্রিবা ফাউবা ফ্রিক্বেন্সি (চয়োল অমদা নুমিৎ মশীং) নত্ত্রগা মতম (সেসন অমদা লৈবা মতমগী চাং) হন্থহন্দুনা নহাক্কী এক্সরসাইজ প্রোগ্রামদু শেমদোক-শেমজিন তৌ।
  • শরু তাংশীংদা শাফু পীবা হন্থনবা এক্সরসাইজ মখল অদু হোংদোকপা -  খুদম ওইনা হায়রবদা ৱাকিংদগী ৱাটর এরোবিকতা ওন্থোকপীবা য়াই।
  • এক্সরসাইজ তৌরিঙৈ অমসুং লোয়রবা মতমদা মওং চুম্না হকচাং শাগৎহনবা অমসুং ঈংথহনবা তৌগদবনি।
  • মরাং কায়না চাউবা মফমদা এক্সরসাইজ তৌগদবনি – এক্সরসাইজ তৌরিঙৈদা নহাক্না ৱারি-ৱাতাই অমা তৌবা য়াবা মফমদা পাংথোক্কদবনি।
  • চপ-চাবা অমসুং খোংদা নুঙাইগদবা খোংউপ ওইনা তোংবীগদবনি।

নহাক্কী হেলথ কেয়র প্রোভাইদরদা নহাক্না য়েংহনগদবা খুদমশীং:

  • য়াম্না কন্না, চিক-চিক লাউনা অমসুং লেপ্তনা নাবা ফাউরক্লবা।
  • নহাক্কী খোংদু থাবা (limp) ঙম্লক্তবা মওংদা নারক্লবা।
  • এক্সরসাইজগী মতুংদা পুং 2দগী হেন্না নারক্লবা নত্ত্রগা অহিংদা হেন্না নারক্লবা।
  • অনাবদু পোত্থাবা, হিদাক-লাংথক, নত্ত্রগা অশাবা/ অঈংবা পেকশীংনা ফবা ঙম্লক্ত্রবা।
  • পোমথোকপা য়াম্না হেল্লক্লবা নত্ত্রগা নহাক্কী শরু তাংশীংদু “শাবা” নত্ত্রগা ঙাংলক্লবা।

সোর্স: দিরেক্টোরেট ওফ মেদিকেল এজুকেসন

2.76923076923
অদোমগী সজেসন পোষ্ট তৌরো

(মথক্কী কন্টেন্ট অসিদা অদোমগী কমেন্ট/সজেসন অমা লৈরবদি মসিদা পোষ্ট তৌবিয়ু).

Enter the word
Back to top