হেদ-এক (কোক চিকপা)

হেদ-এক(কোক চিকপা)হায়বসি করিনো?

হেদ-এক হায়বসি কোক নত্ত্রগা ঙক্কী মথক্কী শরুক্তা নাববুনি। মসি হকচাংদা য়াউবা খ্বাইদগী কমন ওইবা লোকেসননি অমসুং মসিগী মরম য়াম্না লৈ।

মতৌ করম্না হেদ-এককী কাংলুপ খায়দোকপগে?

হেদ-এককী মরম অসি য়াম্মী, অমসুং ইং 2007দা ইন্টরনেসনেল হেলথ সোসাইটিনা হেদ-এককী অনৌবা ক্লাসিফিকেসন সিষ্টেম অমা য়ানখ্রে। মরমদি মশীং য়াম্লবা মীওই কয়ানা হেদ-এককী নুংঙাইতবা লৈনরি অমসুং করিগুম্বা মতমদা মসিবু লাইয়েংবসি অরুবা ওই। অনৌবা ক্লাসিফিকেসন সিষ্টেম অসিনা হেলথকেয়র প্রাক্টিসনরশীংবু হেদ-এককী অকক্নবা মখল খংদোকপা ঙমহন্দুনা হেন্না ফবা অমসুং ইফেক্টিভ ওইবা লাইয়েং অমা পীবা ঙমহনগনি হায়না থাজবা থম্নরি।

হেদ-এককী মরুওইবা কেটেগোরি অহুম লৈ:

• প্রাইমারি হেদ-এক (Primary headaches),‌
• সেকেন্দরি হেদ-এক (Secondary headaches), অমসুং
• ক্রেনিয়েল ন্যুরেলজিয়া, মায় চিকপা, অমসুং অতৈ হেদ-একশীংনি।

প্রাইমারি হেদ-এক হায়বসি করিনো?

প্রাইমারি হেদ-এক হায়বশীংসিগী মনুংদা মাইগ্রেন, টেনসন, অমসুং ক্লষ্টর হেদ-এক, অমদি অতৈ য়াম্না কমন ওইদবা হেদ-এক মখলশীং অসি চল্লি।

টেনসন হেদ-এক

মসিনা খ্বাইদগী কমন ওইবা প্রাইমারি হেদ-এক মখলনি। এদল্টশীংগী 90% ফাউবদি টেনসন হেদ-এক লৈগনি নত্ত্রগা লৈরক্কনি। টেনসন হেদ-একশীং অসি নুপাশীংদগীদি নুপীশীংদনা হেন্না কমন ওই।

মাইগ্রেন হেদ-এক

মসিনা অনিশূবা খ্বাইদগী কমন ওইবা প্রাইমারি হেদ-এক মখলনি। মীশীংগী 12% রোমদি মাইগ্রেন হেদ-এক অসি থেংনগনি। মাইগ্রেন হেদ-এক অসি অহলশীংদতা নত্ত্রগা অঙাংশীংদসু উবা ফংই। মপুং-মরৈ ফাদ্রিঙৈগী মমাংদা, মাইগ্রেন হেদ-এক অসি নুপামচা অমসুং নুপীমচাশীংদা চপ মান্ননা উবা ফংই, অদুবু মপুং-মরৈ ফারবা মতুংদদি, নুপাশীংদগীদি নুপীশীংদনা হেন্না উবা ফংই।   নুপাশীংগী মনুংদা 6% অমসুং নুপীশীংগী মনুংদা 18% ফাউবদি মখোয়গী পুন্সিদা মাইগ্রেন হেদ-এক অসি থেংনগনি।

ক্লষ্টর হেদ-এক

মসি মীশীংগী 0.1%দা (মীওই 1,000গী মনুংদা 1) শোকহল্লিবা তাংনা থোকপা প্রাইমারি হেদ-এক মখলনি। নুপীশীং অমসুং অঙাংশীংদা হেদ-এককী মখল অসি উবা ফংলবসু মরুওইনা মসিনা চহি 20গী অথেংবা শরুক অদুৱাইদা লৈবা নুপাশীংদনা হেন্না তোইনা শোকহল্লি।

প্রাইমারি হেদ-একশীংনা পুন্সিগী মগুনদা অকায়বা পীবা য়াই। মীওই খরদদি মরক মরক্তা কোক চিকই অমসুং মদু থুনা ফখি অদুবু মীওই খরদদি মপাঙ্গল হন্থহল্লি। হেদ-একশীং অসি পুন্সিবু খুদোংথীহনবা য়াবা মখল ওইদ্রবসু, মখোয়সি ষ্ট্রোক নত্ত্রগা ইন্ত্রাসেরেব্রেল ব্লিদিংগী লাইওংশীংগা লোয়নবসু য়াই।

সেকেন্দরি হেদ-এক হায়বসি করিনো?

সেকেন্দরি হেদ-এক হায়বসি কোক নত্ত্রগা ঙক্তা লৈবা ষ্ট্রকচরেল প্রোব্লেম অমনা থোকহনবা হেদ-এক অদুবুনি। ব্রেনদা ঈ থোকপা, ত্যুমর, নত্ত্রগা মেনিঙ্গাইটিস অমসুং এন্সেফেলাইটিসনচিংবদগী হৌরগা অতৈ মরম কয়ামুক্না হেদ-এক মখল অসি থোকহল্লি।

ক্রেনিয়েল ন্যুরেলজিয়া, মায় চিকপা, অমসুং অতৈ হেদ-একশীং অদু করি-করিনো?

ন্যুরেলজিয়া হায়বগী অর্থদি নর্ভ পেইন (neur= nerve + algia=pain) হায়বনি। ক্রেনিয়েল ন্যুরেলজিয়া হায়বসিনা খংনহল্লিবসি কোক অমসুং ঙক্কী মথক থংবা শরুক্তা লৈবা নর্ভশীং অদু নারকপা (inflamed) অমসুং মদুনা কোক্তা নারিবদুগী সোর্স অমা ওইরকপা হেদ-একশীংগী গ্রুপ অমবু খংনহল্লি। মায় চিকপা অমসুং হেদ-এককী থোকহল্লিবা অতৈ মরমশীং অসি কেটেগোরি অসিদা চল্লি।

করিনা টেনসন হেদ-এক থোকহনবগে?

টেনসন হেদ-দেক অসিনা খ্বাইদগী হেন্না তোইনা থোকপা হেদ-এক মখল ওইরবসু, মখোয়বু থোকহল্লিবা মরমশীং অসিদি খংবা ঙমদে। মসি থোকহনবগী খ্বাইদগী ওইবা য়াবা মরমসি স্কল (skull) অসিবু কুপশিল্লিবা মসলশীং অদু চপশিনবসিনি। স্কলবু কুপশিল্লিবা মসলশীং অসিদা ষ্ট্রেস লৈরকপা (stressed) মতমদা, মসলশীং অদু চপশিন্দুনা (spasm) নাবা ফাউহল্লকপা য়াই। কমন ওইবা মফমশীংগী মনুংদা ঙম্মী ত্রাপেজিয়স মসলশীং থীংজিনফম স্কলগী বেজ, খয়াৎ (jaw) লেংহল্লিবা মসলশীং লৈরিবা তেম্পল (temple), অমসুং লাইবক (forehead) অসিসু য়াউরি।

টেনসন হেদ-এক থোকহল্লিবা চপ চাবা মরম অসি খংদোক্নবগী রিসর্চ মতিক চানা লৈতে। টেনসন হেদ-এক অসি হকচাংদা থোক্লিবা ফিজিকেল নত্ত্রগা ইমোসনেল ষ্ট্রেসনা ওইহনবনি। ষ্ট্রেস থোকহল্লিবশীং (stressors) অসিনা স্কলবু কোয়শিল্লিবা মসলশীংদা য়া ক্রক-ক্রক লাকশিনবা (clench) থোকহন্দুনা মসল চপশিনবা (spasm) থোকহনবা য়াই। ফিজিকেল ষ্ট্রসরশীংগী মনুংদা খুৎনা থবক ৱানা অমসুং শাংনা শুবা, নত্ত্রগা মতম শাংনা কম্প্যুটর নত্ত্রগা দেস্ক অমগী মমাংদা পুক্নিং চংনা থবক তৌদুনা লৈবা অসিসু য়াউই। ইমোসনেল ষ্ট্রেসনসু স্কলগী অকোয়বদা লৈবা মসলশীং চপশিনহন্দুনা টেন্সন হেদ-একশীং অসি থোকহনবা য়াই।

টেনসন হেদ-এককী লাইওংশীংদু করি করিনো?

টেনসন হেদ-এক অমগী নাবগী লাইওংশীং মখাদা পিরি:

• নাবা অদু কোককী লুখম অমসুং ঙক্কী মথক্তা হৌরকই অমসুং মসিবু কোইশিল্লগা চপশিনবা নত্ত্রগা নম্বগুমই (band-like tightness or pressure) হায়না লৌনৈ।
• মসি পীশুম (eyebrows) মথক্তা খ্বাইদগী কন্না চিকপা অমসুং কোক্কী অকোয়বদা নম্বা (pressure) তোইনা থোক্কল্লি।
• নাবদু মহৌশানা য়াম্না কনবা ওইদে (mild) অমসুং বাইলেটরেল (কোক্কী নাকল অনিমক্তা লৈ) ওই।
• অনাবা অদু আউরা (aura), ওনিংবা, ওবা, নত্ত্রগা মঙাল অমসুং মখোন্দা সেন্সিটিভিটি লৈবগা লোয়নগন্দে।
• অনাবা অদু মতম নাইদনা (তোইনা থোক্কন্দে অমসুং চপ-চাবা মওং-মতৌ য়াউদনা থোকই) থোকই অদুবু মীওই খরদদি তোইনা অমসুং নুমিৎ খুদিংগী থোকপসু য়াউবা য়াই। মীওই অয়াম্বদদি কোক চিক্লবসু, ফাউরিবা অনাবা অদুনা মখোয়গী নোর্মেল ফঙ্কসন্দা অকায়বা পীগন্দে।

করম্বা লায়নাশীংনা সেকেন্দরি হেদ-একশীংসি থোকহনবগে?

হেদ-এক হায়বসি অনাবা কয়াগা কয়াগা লোয়নবা লাইওং অমনি। কোক নাবা অসিমক প্রাইমারি হেদ-এককা লোয়নবা ইসু অমা ওইবগা লোয়ননা, সেকেন্দরি হেদ-একশীং অসিসু লাইওং খংদোক্তুনা লাইয়েংবগী মথৌ তাবা লায়না নত্ত্রগা অশোক-অপনশীংনা ওইহল্লকপনি। হেদ-এককী লাইওং কন্ত্রোল তৌবসি মদুবু থোকহল্লিবা লায়না অদু খংদোকপগা চপ মান্নবা মতমদা পাংথোকপা তাই। সেকেন্দরি হেদ-এক থোকহল্লিবা মরম খরদি পুন্সিবু খুদোং থীহনবা য়াবা অমসুং শিহনবা ঙম্বা ওইবা য়াই। অমাং-অতা থোকপা থীংহৌনবগীদমক ঙন্না লাইওং খংদোক্তুনা লাইয়েংহৌবা হায়বসি য়াম্না তঙাইফদে। ইন্টরনেসনেল হেদ-এক সোসাইটিনা সেকেন্দরি হেদ-এককী কেটেগোরি নিপালগী লিষ্ট অমা শেম্লে। কেটেগোরি খুদিংমকপু খুদম খরগা লোয়না খংজিনবা তাই।

কোক অমসুং ঙক্কী ত্রোমা (trauma)

• কোকতা অশোক-অপন থোকপনা ব্রেনবু কোয়শিল্লিবা টিসুশীংগী মরোল (সবদ্যুরেল, এপিদ্যুরেল অমসুং সুবারাকনোইদ স্পেস)শীংগী মরক্তা লৈবা অহাংবশীংদা নত্ত্রগা ব্রেন টিসু মনুংমক্তদা ঈ-থোকহনবা (bleeding) য়াই।
• কোক্তা শোকপদা ঈ থোক্তবা মওংদা কোক্তা থোম্বা (Concussions)।
• হ্ৱিপলাশ (whiplash)গী লাইওং অমসুং ঙক্তা শোক-পনবা থোকপা।

কোক অমসুং ঙক্তা থোকপা ব্লদ ভেসেল প্রোব্লেমশীং

• ষ্ট্রোক নত্ত্রগা ত্রান্সিএন্ট ইস্কেমিক এটেক (TIA)।
• আর্টেরিওভেনস মালফোর্মেসন (AVM)না লিক (leak) ওইদ্রিঙৈদা হেদ-এক থোকহনবা য়াই।
• কেরোটিদ আর্টেরি ইনফ্লেমেসন।
• তেম্পোরেল আর্টেরিটিস (টেম্পোরেল আর্টেরিগী ইনফ্লেমেসন)।

ব্রেনদা থোকপা নন-ব্লদ ভেসেল প্রোব্লেমশীং

• ব্রেনদগী হৌরকপা প্রাইমারি নত্ত্রগা অতোপ্পা ওর্গান অমদা হৌরকপা কেন্সর অমদগী লাকপা মেটাষ্টেটিক ব্রেন ট্যুমরশীং,
• শারৈ হৌবা (Seizures),
• মমাংঙৈদা স্যুদোট্যুমরসেরেব্রি (pseudotumor cerebri) হায়না কৌনরম্বা, স্পাইনেল কেনেল মনুংদা লৈবা সেরেব্রোস্পাইনেল ফ্লুইদ মনুংদা প্রেসর কা-হেন্না ৱাংবা হায়বদি ইদিওপেথিক ইন্ত্রাক্রেনিয়েল হায়পরটেনসন (Idiopathic intracranial hypertension)।

ইনফেক্সন

• মেনিঙ্গাইটিস (Meningitis),
• এন্সেফেলাইটিস (Encephalitis),
• ঐচ আই ভি/ এইদস (HIV/AIDS),
• সিষ্টেমিক ইনফেক্সনশীং (খুদম ওইনা, ন্যুমোনিয়া নত্ত্রগা ইনফ্লুএঞ্জা)।

হকচাংগী অকোয়রোন্দা অহোংবা লাকপা

• হায় ব্লদ প্রেসর (হায়পরটেনসন)।
• দিহায়দ্রেসন।
• হায়পোথাইরোইদিজম।
• রেনেল দাইএলাইসিস।

মিৎ, নাকোং, নাতোন, খৌনাউ, য়া অমসুং ঙক্তা নুংঙাইতবা লৈবা

• সাইকিয়াত্রিক দিসওর্দরশীং।

সেকেন্দরি হেদ-একশীংগী একজামিনেসন অমসুং টেষ্টশীংদু করি করিনো?

অনাবা মীওই অদুগী হিষ্টরি অমসুং ফিজিকেল একজামিনেসন অদুনা সেকেন্দরি হেদ-এক অদু থোকহল্লিবগী মরম অদু খংদোক্নবগী অহৌবা মায়কৈ অমা পীগনি। মরম অদুনা, য়াম্না কন্না হেদ-এক লৈবা অনাবশীংনা মেদিকেল কেয়র লৌবা অমসুং মখোয়গী হেলথ কেয়র প্রাক্টিসনরশীংদা মখোয়গী কন্দিসন য়েংহন্নবগী খুদোংচাবা অমা পীবা হায়বসি য়াম্না মরুওই। হেদ-একশীং থোকহল্লিবা লায়নাশিং খংদোকপদা কান্নগদবা টেষ্টশীংগী মনুংদা  মখাদা পীরিবশীং অসি চল্লি:

• ব্লদ টেষ্টশীং।
• কম্প্যুটরাইজদ তোমোগ্রাফি (CT স্কেন)।
• কোককী মেগ্নেটিক রিজোনেন্স ইমেজিং (MRI) স্কেন।

• লম্বর পঙ্কচর (lumbar puncture)।

অকক্নবা টেষ্ট খরদি হেলথ কেয়র প্রাক্টিসনর অমসুং পেসেন্ট অদুনা কোকহনবা পাম্লিবা নুংঙাইতবশীং অদুগী মখা পোনগনি।

ব্লদ টেষ্টশীং

ব্লদ টেষ্টনা দাইএগ্নোসিস অমা খংদোক্নবা হোৎনবদা হিষ্টরি অমসুং ফিজিকেল একজামিনেসনগা লোয়নরিবা ইনফোর্মেসন পীবদা য়াম্না মতেং ওইনৈ। খুদম ওইনা, হকচাংদা লৈবা ইনফেক্সন নত্ত্রগা ইনফ্লেমেসন অমনা হ্ৱাইট ব্লদ সেল মশীং, এরিথ্রোসাইট সেদিমেন্টেসন রেট (ESR) নত্ত্রগা C-রিএক্টিভ প্রোটিন (CRP) হেনগৎহনবা য়াই। টেষ্ট অনি অসি য়াম্না অকক্ননা তাকপা (non-specific) ওইদে, হায়বদি ইনফেক্সন নত্ত্রগা ইনফ্লেমেসন অমহেক্তা লৈরকপদা মখোয় অসি এবনোর্মেল ওইবা য়াই, অমসুং এবনোর্মেল ওইরিবশীংদুনা (abnormalities) ইনফেক্সন নত্ত্রগা ইনফ্লেমেসন থোকহল্লিবদুগী অকক্নবা মরম অদু তাকপা ঙমদে।

ব্লদ টেষ্টশীংনা ইলেক্ট্রোলাইট দিসটর্বেন্সশীং, অমসুং লিভর, কিদনি, অমসুং থাইরোইদকুম্বা ওর্গানশীংগী তোঙান-তোঙানবা ফঙ্কসনশীং এসেস তৌবা ঙম্মী।

কোককী কম্প্যুটরাইজদ টোমোগ্রাফি (Computerized tomography of the head)

কম্প্যুটরাইজদ টোমোগ্রাফি (CT স্কেন)না ঈ থোকপা, পোমখৎপা, অমসুং ত্যুমরশীংবু খংদোকপা ঙম্মী। মসিনা মমাংদা ষ্ট্রোক লৈখিবগী খুদমসু পুথোকপা ঙম্মী। ইন্ত্রাভেনস কন্ত্রাষ্ট ইঞ্জেক্সনগা লোয়ননা, মসিবু ব্রেনগী আর্টেরিশীং য়েংবদা শিজিন্নবা য়াই।

কোককী মেগনেটিক রিজোনেন্স ইমেজিং (MRI)

MRIনা ব্রেন, মেনিংশীং (ব্রেন অমসুং স্পাইনেল কোর্দপু কুপশিল্লিবা মরোলশীং)গী এনাটোমিবু হেন্না কুপথনা য়েংবা ঙম্মী। মসিনা হেন্না অকক্ননা খংবা ঙম্বগা (precise) লোয়ননা, স্কেন অসি পাংথোকপদা চংবা মতম অসিসু কম্প্যুটরাইজদ টোমোগ্রাফিদগীদি শাংবা হেল্লি। স্কেন মখল অসি হোস্পিটাল পুম্নমক্তা ফংদে। মসিগীসু মথক্তা, মসি তৌবদা মতম শাংনা চংই, অনাবা মীওই অদুনা লেংদনা লৈদুনা কোওপরেট তৌবা চংই, অমসুং মখোয়গী হকচাংদা ধাতু (metal) অমত্তা (খুদম ওইনা, হার্ট পেসমেকর নত্ত্রগা মীত্তা ধাতুগী পোৎশকশীং হাপ্পা) য়াউবা য়াদে।

লম্বর পঙ্কচর (Lumbar puncture)

সেরেব্রো-স্পাইনেল ফ্ল্যুইদ কৌবা ব্রেন অমসুং স্পাইনেল কোর্দপু কোইশিল্লিবা মহি (fluid) অসি নঙ্গনগী মখাথংবা শরুক্তা লৈবা (lower back) য়াংলেন শরুদা (spine) য়েত্তুম অমা থীংজিন্দুনা লৌবা য়াই। মহি অদু চাংয়েং তৌথোকপনা ইনফেক্সন (বেক্টেরিয়া, ভাইরস, নত্ত্রগা ট্যুবরক্যুলোসিসনা থোকহনবা মেনিঙ্গাইটিসকুম্বা) নত্ত্রগা শীংলি পোকখায়বদগী (hemorrhage) ঈ লৈব্রা নত্ত্রগা লৈতব্রা হায়বদু খংদোকপা ঙম্মী। কেস অয়াম্বদা, ব্রেন্দা ঈ থোকপা, পোমখৎপা নত্ত্রগা ট্যুমর লৈতে হায়বদু খংদোক্নবা লম্বর পঙ্কচরগী মমাংদা কম্প্যুটরাইজদ টোমোগ্রাফি অসি পাংথোকই। স্পেস অদুদা লৈবা প্রেসর অদু লম্বর পঙ্কচর নিদল (lumbar puncture needle) অদু থীংজিনবা মতমদা ওনবা (measured) য়াই। প্রেসর ৱাংনা লৈবশীংদি চুনবা ফিভমগা লোয়ননা ইদিওপেথিক ইন্ত্রাক্রেনিয়েল হায়পরটেনসনগী দাইএগ্নোসিস পাংথোকপা য়াই।

সোর্স: পোর্টেল কন্টেন্ট টিম