হার্টকী লায়না থীংবা

হার্টকী লায়না অসিনা শিহনবগী মরুওইবা মরম অমা ওইবা য়াই। অদুবু, ঙসি ঐখোয়না হকশেল ফবা পুন্সি মহিং অমা লৈহন্দুনা তুংদা লাক্কদবা হার্টকী প্রোব্লেমশীংদগী ঙাকথোকপা য়াই। ঐখোয়গী নুংতিগী পুন্সিদা পাংথোকপা য়াবা হার্টকী লায়না থীংনবগী লম্বী মঙা মখাদা পীরি।

মৈখু নত্ত্রগা হিদাক মনা শীজিন্নরোইদবনি।

মৈখু শিজিন্নবা নত্ত্রগা হিদাক মনা শিজিন্নবা অসি হার্টকী লায়না লাক্নবগী খ্বাইদগী মরুওইবা রিস্ক ফেক্টরশীংগী মনুংদা অমনি। হিদাক মনাদা য়াউরিবা কেমিকেলশীং অসিনা নহাক্কী হার্ট অমসুং ব্লদ ভেসেলশীং শোকহন্দুনা আর্টেরিশীং খুজিলহল্লকপগী থৌওং (atherosclerosis) লৈহল্লকই। এথেরোস্কেলরোসিসনা হার্ট এটেক থোকহল্লকই। হার্টকী লায়না থীংবগী মতাংদদি, মৈখু শিজিন্নবা হায়বসি য়াম্না ফত্তে। মৈখু থোক্তবা হিদাক মনা নত্ত্রগা তাঙ্গোই তাদবা (low-tar) অমসুং নিকোটিন নেম্বা (low-nicotine) চুরুটশীং অসিসু রিস্ক লৈ, অমদি সেকেন্দ হেন্দ স্মোক (second hand smoke) অসিসু ফত্তে।

মসিগীসু মথক্তা, চুরুটকী মৈখুদা য়াউরিবা নিকোটিন অসিনা হার্টপু ব্লদ ভেসেলশীং খুজিলহন্দুনা অমসুং হার্ট রেট অমদি ব্লদ প্রেসর হেনগৎহন্দুনা মথৌ হেন্না তৌহল্লি। মসিনা ওক্সিজেন মতিক চানা সপ্লাই তৌহন্নবগীদমক হার্টপু নমদুনা থবক হেন্না তৌহন্দুনা ব্লদ প্রেসর হেনগৎহল্লি। “সোসিএল স্মোকিং” হায়না কৌনবা, বার নত্ত্রগা রেষ্টুরেণ্টদা মরুপ-মপাংশীং লোয়নবা মতমদতা মৈখু শিজিন্নবা অসিসু খুদোংথীনিঙাই ওই অমসুং হার্টকী লায়নাগী রিস্ক হেনগৎহল্লি। মৈখু শিজিন্নবা অমসুং অঙাং পোক্তনবগী গুলি চারিবী নুপীশীংদনা মসি শিজিন্নদবা নুপীশীংদগী হার্ট এটেক নত্ত্রগা ষ্ট্রোক তৌরকপগী রিস্ক হেল্লি। রিস্ক অসি চহি য়ামখৎলকপগা লোয়ননা, মরুওইনা চহি 35গী মথক্তা লৈবা নুপীশীংদা হেনগৎলকই।

নহাক্না মৈখু শিজিন্নবা তোকপা মতমদা, শুপ্নগী চহি অমখক্কী মনুংদা নঙোন্দা হার্টকী লায়না নারকপগী রিস্ক অসি য়াম্না নেমথরকই। নহাক্না শাংনা নত্ত্রগা মশীং য়াম্না থক্লুবা ওইরবসু, নহাক্না মৈখু শীজিন্নবা হেক তোকপগা মদুগী অফবা ফল ফংবা হৌগনি।

চয়োলগী নুমিৎ অয়াম্বদা মিনট 30 দি এক্সরসাইজ তৌগদবনি।

চাং নাইনা নুংতিগী এক্সরসাইজ খরা তৌবনা লাইবক থীনিঙাই ওইবা হার্টকী লায়নাগী রিস্ক হন্থহনবা ঙম্মী। হকচাং শাজেল অমসুং হকচাংগী অরুম্বা চুম্না থম্বনচিংবা অতৈ পুন্সি মহিংগা পুন্না চৎমীন্নরবদি হেন্না কান্নবা ফংগনি।

হকচাং শাজেলনা হকচাংগী অরুম্বা হন্থহনবদা মতেং পাংবগা লোয়ননা হার্টতা শোকহনবা য়াবা ফিভমশীং, হায়বদি হায় ব্লদ প্রেসর, হায় কোলেষ্টেরোল অমসুং দাইএবেটিজনচিংবা লাকপগী চাং হন্থহনবা ঙম্মী। মসিনা হার্টকী লায়না থোকহনবগী ফেক্টর অমা ওইরিবা পুক্নিং ৱাবা (stress) অসিসু হন্থহল্লি।

চয়োল অমগী মনুংদা অয়াম্বা নুমিৎশীংদা য়ামদ্রবদা মিনট 30দগী 60 ফাউবদা ময়াই ওইরপ তৌনা কনবা হকচাং শাজেল তৌদুনা য়েংউ। অদুম ওইনমক, হকচাং শাজেল ঙাইহাক্তং তৌবনসু হার্টকী কান্নবদি পীবা ঙম্মী।

হার্ট ফহনগদবা দাইট অমা চাগদবনি

দাইএটরি এপ্রোচেস টু ষ্টোপ হায়পরতেন্সন (DASH) ইটিং প্লান কৌবা অখন্নবা দাইট অমা চাবনা নহাক্কী হার্ট ঙাকথোকপদা মতেং পাংগনি। DASH দাইট চাবগী অর্থদি ফেট, কোলেষ্টেরোল অমসুং থুম হন্থবা চিঞ্জাকশীং চাবা হায়বনি। দাইট অসি উহৈ, মনা-মশীং, হৱাই মপুম অমসুং ফেট হন্থনা য়াউবা শঙ্গোমগী প্রদক্টশীংদা ফংই অমসুং মসিনা হার্টপু ঙাকথোকপদা মতেং পাংগনি। হৱাই অশাংবী (Beans), ফেট হন্থনা য়াউবা প্রোটিনগী অতৈ সোর্সশীং অমসুং অকক্নবা ঙা মখল খরনা হার্টকী লায়নাগী রিস্ক হন্থহনবা ঙম্মী।

অকক্নবা ফেট খরদি য়াম্না চারোইদবনি। সেচুরেটেদ, পোলিঅনসেচুরেটেদ, মোনোঅনসেচুরেটেদ অমসুং ত্রান্স ফেট হায়রিবা ফেট মখলশীংসিগী মনুংদা, সেচুরেটেদ ফেট অমসুং ত্রান্স ফেট অসিনা ব্লদ কোলেষ্টেরোলগী লেভেল হেনগৎহন্দুনা কোরোনেরি আর্টেরি দিজিজগী রিস্ক হেনগৎহল্লি।

সেচুরেটেদ ফেটকী মরুওইবা সোর্সশীংগী মনুংদা মখাদা পীরিবশীংসি চল্লি:

• রেদ মিট (red meat)
• শঙ্গোমগী প্রদক্টশীং
• য়ুবী অমসুং পাল্ম থাউশীং (palm oils)

ত্রান্স ফেটকী সোর্সশীংগী মনুংদা মখাদা পীরিবশীংসি চল্লি:

• মুন্না ঙৌরবা ফাষ্ট ফুদশীং
• বেকরিগী প্রদক্টশীং
• পেকেজ তৌরবা স্নেক ফুদশীং
• মার্গারিনশীং
• ক্রেকরশীং

ত্রান্স-ফেট লৌদনবগীদমক প্রদক্ট লেবেল অদুদা “পার্সিএল্লি হায়দ্রোজেনেটেদ” হায়বা ৱাহৈশীংসি থাবরা য়েংউ।

মীওই অয়াম্বনা মখোয়গী দাইটতা উহৈ অমসুং মনা-মশীংশীং অসিগী শরুক অসি নোংমদা মঙাদগী তরা ফাউবা ওইহন্দুনা হেন্না য়াউহনবা তাই। উহৈ অমসুং মনা-মশীং কয়া চাবনা হার্ট দিজিজ থীংবদা মতেং পাংবদা নত্তনা কেন্সর থীংবদসু মতেং ওইগনি।

পোলিঅনসেচুরেটেদ ফেট মখল অমা ওইরিবা ওমেগা-3 ফেটি এসিদ অসিনা নহাক্কী হার্ট এটেককী রিস্ক অদু হন্থহনগনি, চাং নাইদনা হার্ট চোংবদগী ঙাকথোক্কনি অমসুং ব্লদ প্রেসর নেমথহনগনি। সালমোন অমসুং মেকেরেলগুম্বা ঙা খরদি ওমেগা-3 মরাং কায়না য়াউবা মহৌশাগী সোর্স অমনি। ওমেগা-3 অসি ফ্লেক্সসিদ ওইল, ৱালনট ওইল, সোয়বিন ওইল অমসুং কেনোলা ওইলদা চাং খরদি য়াউই, অমসুং মখোয় অসি সপ্লিমেন্টশীংদসু ফংই।

হার্ট ফহনগদবা দাইট অমা চাবা হায়বসিদা য়ু চাং হন্থনা থকপা হায়বদি নুপাগী ওইনা নোংমদা দ্রিঙ্ক অনি, অমসুং নুপীগী ওইনা নোংমদা দ্রিঙ্ক অমা থকপা অসিসু য়াউরি। অসিগুম্বা লেভেল অসিদদি, য়ুনা নহাক্কী হার্টতা প্রোটেক্টিভ ইফেক্ট অমা পীবা য়াই। মসিদগী হেল্লবদি হকশেল মাংনবা মচাক অমা ওইরকই।

হকশেল ফগদবা হকচাংগী অরুম্বা লৈহনগদবনি

মপুং-মরৈ ফারকপা মতমদা হকচাংগী অরুম্বা হেনগৎলকপসি অয়াম্বনা মসলগী মহুত্তা ফেট ওই। অহেনবা অরুম্বা অসিনা হার্টকী লায়না, হায় ব্লদ প্রেসর, হায় কোলেষ্টেরোল অমসুং দাইএবেটিজ লাকহন্নবগী চাং হেলহল্লি।

নহাক্কী হকচাংগী অরুম্বা অদু হকশেল ফবা মওংদা ওইরিব্রা হায়বদু য়েংনবগী লম্বী অমদি নহাক্কী বোদি মাস ইন্দেক্স (BMI) কেলক্যুলেট তৌবা হায়বসিনি। মসিনা হকচাংগী ফেট অদু হকশেল ফবা নত্ত্রগা ফত্তবা মওংদা লৈরিব্রা হায়বদু হকচাংগী অৱাংবা অমদি অরুম্বা য়েংদুনা পুথোকই। BMI নম্বর অদুনা 25 অমসুং মসিদগী হেল্লবদি ব্লদ ফেট হেনগৎলকপা, ব্লদ প্রেসর হেনগৎলকপা অমসুং হার্ট দিজিজ অমসুং ষ্ট্রোককী অহেনবা রিস্ক অমগা লোয়নরকই।

BMI অসি ফৈ অদুবু অশোয়বা লৈতবা গাইদ অমদি নত্তে। খুদম ওইনা হায়রবদা, মসলনা ফেটতগী হেন্না লুম্মী, অমসুং মসল য়াম্না কাবা অমসুং ফিজিকেল্লি ফিট ওইবা নুপী অমসুং নুপাশীংদা অহেনবা হেলথ রিস্ক লৈতনা অৱাংবা BMIদি লৈবা য়াই। মরম অসিনা খ্বাংগী সর্কমফরেন্স ওনবা অসিসু হকচাংদা ফেট কয়াম পৈশিল্লিবগে ওন্নবগী কান্নরবা খুৎলাই অমনি:

• নুপাশীংদা মখোয়গী খ্বাংগী অকোনবা অদু ইঞ্চি 40 (সেন্টিমিটর 101.6) দগী হেল্লবদি ওভরৱেট (অরুম্বা হেনবা) ওইরে হায়না লৌগনি।
• নুপীশীংদা মখোয়গী খ্বাংগী অকোনবা অদু ইঞ্চি 35 (সেন্টিমিটর 88.9)দগী হেল্লবদি ওভরৱেট (অরুম্বা হেনবা) ওইরে হায়না লৌগনি।

হকচাংগী অরুম্বা অসি খজিক্তং হন্থবনা ফাউবা হকচাংদা কান্নবা পী। চাদা 10 খক্কী চাংদা হকচাংগী অরুম্বা হন্থহনবনা ফাউবা নহাক্কী ব্লদ প্রেসর হন্থহনবা, নহাক্কী ব্লদ কোলেষ্টেরোল নেমথহনবা অমসুং দাইএবেটিজগী রিস্ক হন্থহনবা ঙম্মী।

চাং নাইনা হকশেল চেক(health screenings)তৌথোক্কদবনি।

হায় ব্লদ প্রেসর অমসুং হায় কোলেষ্টেরোলনা হার্ট অমসুং ব্লদ ভেসেলশীং শোকহনবা ঙম্মী। মখোয়সি টেষ্ট তৌথোক্ত্রবদি, নঙোন্দা মসিগী ফিভম অসি লৈব্রা হায়বদু খংবা ঙম্লোই। চাং নাইনা চেক তৌথোকপনা মসি খংদোকপা ঙমহন্দুনা নহাক্না করি থৌরাং পায়খৎকদগে হায়বদু লেপ্পা ঙমহনগনি।

• ব্লদ প্রেসর। চাং নাইনা ব্লদ প্রেসর য়েংথোকপা অসি অঙাং ওইরিঙৈদগী হৌই। মপুং মরৈ ফারবা মীওইশীংদগী য়ামদ্রবদা চহি অনি খুদিংগী ব্লদ প্রেসর অসি চেক তৌথোক্কদবনি। করিগুম্বা নহাক্কী মশীং অদু চুনবা চাং অমদা লৈত্রবা নত্ত্রগা হার্ট দিজিজগী অতৈ রিস্ক ফেক্টরশীং লৈবা ওইরবদি হেন্না তোয়না চেক তৌথোকপা মথৌ তাগনি। খ্বাইদগী ফবা চানবা ব্লদ প্রেসর অসি মর্ক্যুরিগী মিলিমিটর 120/80 দগী হন্থবা ওইগদবনি।
• কোলেষ্টেরোল লেভেল। মপুং মরৈ ফারবা মীওইশীংনা মশাগী চহি 20দগী হৌদুনা য়ামদ্রবদা চহি মঙাগী মনুংদা অমুক্তি মখোয়গী কোলেষ্টেরোল অদু ওনগদবনি। করিগুম্বা মশীং অদু চুনবা চাং নত্ত্রবা নত্ত্রগা হার্ট দিজিজগী অতৈ রিস্ক ফেক্টর লৈবা ওইরবদি হেন্না তোয়না টেষ্ট তৌবা মথৌ তাগনি। অঙাং খরদদি করিগুম্বা হার্ট দিজিজগী অকনবা ফেমিলি হিষ্টরি লৈবা তারবদি মখোয়গী ব্লদ কোলেষ্টেরোল টেষ্ট তৌবা মথৌ তাবা য়াই।
• দাইএবেটিজ স্ক্রিনিং। দাইএবেটিজ অসি হার্ট দিজিজ লাক্নবগী রিস্ক ফেক্টর অমা ওইবা মরম্না, দাইএবেটিজগী স্ক্রিনিং তৌথোক্কদবনি। করম্বা মতমদা দাইএবেটিজগী ফাষ্টিং ব্লদ সুগর টেষ্ট তৌগদগে হায়বগী মতাংদা দোক্টরগা তান্নৌ। ওভরৱেট নত্ত্রগা দাইএবেটিজগী ফেমিলি হিষ্টরিগুম্বা রিস্ক ফেক্টরশীংগী মখা পোন্না, দোক্টরনা দাইএবটিজগী অহানবা টেষ্টিং অসি চহি 30 অমসুং 45গী মরক্তা তৌনবা, অমসুং মসিগী মতুংদা চহি অহুমদগী মঙা খুদিংগী টেষ্ট অমুক হন্না তৌনবা খংহল্লকপা য়াই।

সোর্স: পোর্টেল কন্টেন্ট টিম