শেয়র
Views
  • ষ্টেট শেমদোক্নবা হাংদোকউ

দাইরিয়া

টোপিক অসিনা দাইরিয়াগী মরমদা ইনফোর্মেসন পীরি।

ন্যুমোনিয়াগী মথংদা দাইরিয়া অসিনা নৌরিবা অঙাংশীংবু শিহনবগী অনিশুবা খ্বাইদগী কমন ওইবা মরম্নি। অঙাংশীংনা খরা হেন্না চাউরবা অঙাংশীংদগী শিবগী চাং হেল্লি মরমদি মখোয়দি হেন্না থুনা দিহায়দ্রেট অমসুং মচি কাদে।

দাইরিয়া অসি মহিকশিং, মরুওইনা অমাংবশীংগী মহিক (germs) য়োৎশিনখিবনা থোকহল্লি। মসি অমাংবশীং শাফবা মওংদা মাংহনখিদবা, ফত্তবা হায়জিন লৈবা, থক্নবা অফবা ঈশীং লৈতবা নত্ত্রগা অঙাংশীং খোম্লাং পীথক্তবা মতমদা খ্বাইদগী তোইনা থোকই।

অহানবা থা তরুক্তা খোম্লাংখক্তনা য়োকপা অমসুং মতম চানা মখোয়গী টিকাশীং থাদোকপীবা অঙাংশীংদদি দাইরিয়া তৌগন্দে। দাইরিয়ানা নারবা অঙাংশীংদা অনাবা অদুগী শাথীবা হন্থহনবদা মতেং ওইনবগীদমক জিঙ্ক অমসুং ওরেল রিহায়দ্রেসন সোল্টস (ORS) কৌবা অখন্নবা সোল্যুসন অসিগা কোন্ননা মহি-মনাই অমসুং মপং মরাং কায়না পীজগদবনি।

মরুওইবা ৱাফমশীং:

  1. দাইরিয়ানা অঙাংশীংগী হকচাংদগী মহিগী শরুক লৌথোক্তুনা অঙাং অদুবু দিহায়দ্রেট তৌহন্দুনা শীহল্লি। দাইরিয়া হেক হৌরকপগা অঙাং অদুবু চারিবা চিঞ্জাক অমসুং মহিশীংগা লোয়ননা অহেনবা মহি-মনাইশীং পীথকপা য়াম্না মরুওই।
  2. অঙাং অমগী পুন্সি অসি করিগুম্বা মহাক্না পুং অমগী মনুংদা মহি ওইনা খোং কয়ারক হাম্লবা নত্ত্রগা করিগুম্বা অমাংবদুদা ঈ য়াউরবদি খুদোংথিনিঙাই ওইরে। ত্রেন তৌরবা হেলথ ৱার্কর অমদগী খুদক্কী ওইবা তেংবাং মথৌ তাই।
  3. পুন্সিগী অহানবা থা তরুক্তা খোম্লাংখক্তনা য়োকপা অমসুং থা তরুক্কী মতুংদা মখা তানা খোম্লাং পীথকপনা দাইরিয়াগী খুদোংথীবদগী হন্থহনবা ঙম্মী। রোটাভাইরস ঙাকথোক্নবা টিকা থাদোকপনা (রেকমেন্দ তৌরবা অমসুং অফংবা) ভাইরস অসিনা থোকহনবা দাইরিয়ানা শিহনবদগী হন্থহল্লি। ভিটামিন A অমসুং জিঙ্ক সপ্লিমেন্ট পিজবনা দাইরিয়াগী রিস্ক হন্থহনবা ঙম্মী।
  4. দাইরিয়ানা নাবা অঙাং অমনা চাং নাইনা মখা তানা চাথবা মথৌ তাই। অনাবা অদুনা মরম ওইদুনা মাংহনখিবা এনর্জি অমসুং মচি ওইবশীং অদু হঞ্জিনহন্নবা মহাক্না ফগৎলক্লিঙৈ মতমদা মঙোন্দা হান্নদগী হেন্না চিঞ্জাক পীজবা তাই।
  5. দাইরিয়ানা নাবা অঙাং অমনা ওরেল রিহায়দ্রেসন সোল্টস (ORS) অমসুং নোংমগী ওইবা জিঙ্ক সপ্লিমেন্ট অমা নুমিৎ 10দগী 14 ফাউবা লৌবা তাই। দাইরিয়াগী হিদাকশীং অসি মহৌশানা ইফেক্টিভ ওইদে অমসুং শোক্নিংঙাই ওই।
  6. দাইরিয়া থীংনবা, অঙাং অমসুং পুংকক চাউবা অঙাংশীংগী য়াউনা অমাংবা পুম্নমক লেত্রিন নত্ত্রগা তোইলেটতা হুন্দোক্কদবনি নত্ত্রগা ফুমজিনগদবনি।
  7. অফবা হায়জিনগী প্রাক্টিসশীং অমসুং শাফবা থক্নবা ঈশীং শীজিন্নবনা দাইরিয়াদগী ঙাকথোকই। খুৎ অসি, সাপোন অমসুং ঈশিংনা নত্ত্রগা উৎ অমসুং ঈশীংগুম্বা মহুৎ শিনবা য়াবা অমনা, খোং হাম্বা লোয়রগা অমসুং অমাংবা পায়রুরবা মতুংদা, অমসুং চানবা চিঞ্জাক পায়দ্রিঙৈ নত্ত্রগা শেম শাদ্রিঙৈ নত্ত্রগা অঙাংশীংদা পীজদ্রিঙৈদা শেংনা হামদোকপীগদবনি।

সপোর্ট তৌরিবা ইনফোর্মেসন

দাইরিয়ানা অঙাংশীংগী হকচাংদগী মহিগী শরুক লৌথোক্তুনা অঙাং অদুবু দিহায়দ্রেট তৌহন্দুনা শীহল্লি। দাইরিয়া হেক হৌরকপগা অঙাং অদুবু চারিবা চিঞ্জাক অমসুং মহিশীংগা লোয়ননা অহেনবা মহি-মনাইশীং পীথকপা য়াম্না মরুওই।

অঙাং অমনা নোংমদা মহি ওইনা খোং অহুম্লক নত্ত্রগা মদুদগী হেন্না হাম্লবদি দাইরিয়া লৈরে। খোং মহি অদু মশিং য়াম্না হাম্লিবমখৈ দাইরিয়া অদু হেন্না খুদোংথীনিঙাই ওইরে।

মহি-মনাই থকপনা দাইরিয়া অদু হেন্না শোকচিল্লক্কনি হায়না মীওই খরনদি খল্লি। মসি অচুম্বা নত্তে। দাইরিয়ানা নারবা অঙাং অমদা খোম্লাং য়াউনা মহিশীং য়ারিবমখৈ তোইনা পীথক্কদবনি। মহি-মনাই য়াম্না থকপনা দাইরিয়ানা মাংহনখিবা মহিশীং অদু মহুৎ শিঞ্জিনবদা মতেং পাংই।

দাইরিয়ানা নারবা অঙাং অমগীদমক রেকমেন্দ তৌরিবা মহি-মনাইশীংগী মনুংদা মখাগীসি চল্লি:

  • খোম্লাং (মমাশীংনা হান্নদগী হেন্না তোইনা খোম্লাং পীথক্কদবনি)
  • চানবা চাংদা অশেংবা ঈশীংগা য়ান্নরবা ওরেল রিহায়দ্রেসন সোল্টস (ORS) (মেসেজ 5গী মতুংদা পীরিবা ORSকী বোক্স অদুদা য়েংউ)
  • সুপশীং (Soups)
  • চবোন (Rice water)
  • অতেকপা উহৈগী মহিশীং (Fresh fruit juices)
  • য়ুবী মহি (Coconut water)
  • শাফবা সোর্সতগী ফংবা অশেংবা ঈশীং। করিগুম্বা ঈশীং অদু শেংদ্রে অমসুং থকপদা শাফদ্রে হায়না খল্লবদি, ত্রেন হেলথ ৱার্কর নত্ত্রগা এক্সটেন্সন এজেন্ট অমনা পীবা ইনফোর্মেসনগী মতেংনা, মদু শৌহন্দুনা, ফিল্টর তৌদুনা, ক্লোরিন হাপচিন্দুনা নত্ত্রগা নুংশানা মহিক হাত্তোক্তুনা শেংহনগদবনি।

দিহায়দ্রেসন লৈহন্দনবা, খোম্লাং ইনবীরিবা অঙাংবু য়ারিবমখৈ তোয়না খোম্লাং ইনবীগদবনি। খোম্লাং পীথক্তবা অঙাংশীংদনা মখাদা পীরিবা মহি-মনাইগী চাং অসি, মহি ওইনা খোং হামদোকখিবা খুদিংগী পীথক্কদবনি:

  • চহি 2গী মখাদা লৈবা অঙাং অমগীদমক: অচৌবা কপ (মিলিলিটর 250) অমগী 1⁄4 অমসুং 1⁄2গী চাং।
  • চহি 2গী মথক্তা লৈবা অঙাং অমগীদমক: অচৌবা কপ ()কী 1⁄2 অমসুং 1গী মরক্তা।

দ্রিঙ্কশীং অসি তরু-তনানবা কপ অমদগী পীথক্কদবনি। ফিদিং বোটল অমা শিজিন্নরোইদবনি। বোটলশীং মপুংফানা শেংদোকপা লুই অমসুং শেংদোক্তবা বোটলশীংদা দাইরিয়া থোকহনবা য়াবা মহিকশীং য়াউবা য়াই।

করিগুম্বা অঙাং অদু ওরবদি, শেন্নরিবা মীওই অদুনা মিনট 10 ঙাইগদবনি অমসুং তপ্না তপ্না অঙাং অদুদা অমুক হন্না খজিক খজিক পীথকপা হৌগদবনি।

অঙাং অদুদা দাইরিয়া অদু লেপখিদ্রিবফাউবা নুংতিগী পীজরিবা চিঞ্জাক অমসুং দ্রিঙ্কশীং অদুগী মথক্তা অহেনবা দ্রিঙ্কশীং পীথক্কদবনি।

দাইরিয়া অসি মহৌশানা নুমিৎ হুম্নি নত্ত্রগা মরিনিদা ফখি। করিগুম্বা শাংনা লৈরবদি, মমা মপা নত্ত্রগ অতৈ শেন্নরিবা মীওইশীংনা ত্রেন তৌরবা হেলথ ৱার্কর অমদগী মতেং লৌগদবনি।

অঙাং অমগী পুন্সি অসি করিগুম্বা মহাক্না পুং অমগী মনুংদা মহি ওইনা খোং কয়ারক হাম্লবা নত্ত্রগা করিগুম্বা অমাংবদুদা ঈ য়াউরবদি খুদোংথিনিঙাই ওইরে। ত্রেন তৌরবা হেলথ ৱার্কর অমদগী খুদক্কী ওইবা তেংবাং মথৌ তাই।

করিগুম্বা অঙাং অদুদা মখাগী থৌওংশীং অসি লৈরক্লবদি মমা মপাশীংনা খুদক্তা ত্রেন তৌরবা হেলথ ৱার্কর অমদগী মতেং লৌগদবনি:

  • পুং অমগী মনুংদা মহি ওইনা খোং কয়ারক হাম্লবা
  • খোং হাম্বদা ঈ য়াউরবা
  • তোয়না ওরবা
  • লাইহৌ লৈরবা
  • কা-হেন্না ঈশীং খৌরাংলবা
  • থকপা পামদ্রবা
  • চাউ হায়বা য়াদ্রবা
  • মমিৎ কুৎশিল্লবা
  • শোন্না উরবা নত্ত্রা তন্থরক্লবা
  • নুমিৎ কয়ানি দাইরিয়ানা নারবা

করিগুম্বা অঙাং অদুদা খুদমশীং অসিগী মনুংদা অমহেক্তা লৈরক্লবদি ত্রেন তৌরবা হেলথ ৱার্কর অমদগী য়াম্না থুনা মতেং লৌবা তাই। চৈরক অদুদা, অঙাং অদুবু জিঙ্ককা লোয়ননা ORS সোল্যুসন অমসুং/ নত্ত্রগা অতৈ মহি-মনাইশীং পীথক্কদবনি।

করিগুম্বা অঙাং অদুনা পুং অমগী মনুংদা মহি ওইনা খোং কয়ারক হাম্লবা অমসুং ওরবদি, নুংশা থিনিঙাই ওইরে অমদি মসি কোলেরা ওইবগী খুদম ওইবা য়াই। কোলেরানা অঙাং অমবু পুং খরদা শিহনবা ঙম্মী। খুদক্তা মেদিকেলগী মতেং লৌগদবনি অমসুং অঙাং অদুদা ORS সোল্যুসন অমসুং জিঙ্ক মখা তানা পীথক্কদবনি।

  • কোলেরা অসি কম্যুনিটি অদু শীনবা থুংনা মহিক য়াউরবা ঈশীং অমসুং চিঞ্জাক্তগী শন্দোকপা ঙম্মী। কোলেরা অসি মহৌশানা মতিক চাদবা সেনিটেসন লৈবা অমসুং চগুংননা খুন্দাবা মফমদা থোক্কল্লি।
  • কোলেরা নত্ত্রগা দাইরিয়া শন্দোরকপা থিংনবা খোংথাং মরি লৈ:
    1. মতম পুম্নমক্তা খুৎ অসি, সাপোন অমসুং ঈশিংনা নত্ত্রগা উৎ অমসুং ঈশীংগুম্বা মহুৎ শিনবা য়াবা অমনা, খোং হাম্বা লোয়রগা অমসুং অমাংবা পায়রুরবা মতুংদা, অমসুং চানবা চিঞ্জাক পায়দ্রিঙৈ নত্ত্রগা শেম শাদ্রিঙৈ নত্ত্রগা অঙাংশীংদা পীজদ্রিঙৈদা শেংনা হামদোকপীগদবনি।
    2. অপিকপা অঙাং অমসুং পুংকক চাউবা অঙাংশীংগী য়াউনা অমাংবা পুম্নমক লেত্রিন নত্ত্রগা তোইলেট অমদা লংথোক্কদবনি নত্ত্রগা ফুমজিনগদবনি। অমাংবা লৈরম্বা মফমশিং অদুদা মহিক-মতাই হাত্তোক্কদবনি।
    3. শাফবা থক্নবা ঈশিং শিজিন্নবা।
    4. চিঞ্জাক পুম্নমক চামথোক্কদবনি, খোক্তোক্কদবনি নত্ত্রগা থোংগদবনি।

ত্রেন তৌরবা হেলথ ৱার্করশীং অমসুং হেলথ সেন্টরশীংনা ইমুং মনুং অমসুং কম্যুনিটিশীংদা দাইরিয়া অমসুং কোলেরাগী রিস্ককী ময়েক শেংবা ইনফোর্মেসন পীগদবনি অমসুং অমহেক্তা থোক্লকপদা করি খোংথাং লৌখৎকদগে হায়বদু তাকপীগদবনি।

পুন্সিগী অহানবা থা তরুক্তা খোম্লাংখক্তনা য়োকপা অমসুং থা তরুক্কী মতুংদা মখা তানা খোম্লাং পীথকপনা দাইরিয়াগী খুদোংথীবদগী হন্থহনবা ঙম্মী। রোটাভাইরস ঙাকথোক্নবা টিকা থাদোকপনা (রেকমেন্দ তৌরবা অমসুং অফংবা) ভাইরস অসিনা থোকহনবা দাইরিয়ানা শিহনবদগী হন্থহল্লি। ভিটামিন A অমসুং জিঙ্ক সপ্লিমেন্ট পিজবনা দাইরিয়াগী রিস্ক হন্থহনবা ঙম্মী।

  • দাইরিয়ানা নারবা নৌরিবা অঙাং অমগীদমক্তদি খোম্লাং অসি মহি অমসুং মপংগী খ্বাইদগী হেন্না ফবা সোর্সনি। মসি মচি য়াম্না ওই অমসুং শেংই অমসুং অনাবা অমসুং ইনফেক্সনশীং থীংবদা মতেং পাংই। অঙাং অমগী পুন্সিগী অহানবা থা তরুক্তা খোম্লাংখক্তনা য়োক্লকপা অঙাং অদুনা চাউরক্লবা মতমদা দাইরিয়া নাদবগী চাং হেল্লি।
  • খোম্লাংনা দিহায়দ্রেসন অমসুং মালন্যুত্রিসন থিংই অমসুং মাংখিবা মহিগী শরুক্তু মেনখৎলি। করিগুম্বা অঙাং অমা দাইরিয়ানা নারবদি কনাগুম্বনা খোম্লাং হন্থনা পীথক্নবা মমাশীংদা পাউতাক পীবসু য়াউই। পাউতাক অসি লাল্লি। অঙাং অদু দাইরিয়ানা নাবা মতমদা মমাশীংনা হান্নদগী হেন্না তোইনা খোম্লাং ইনবীগদবনি। মপা ওইবশীংনা খোম্লাং ইল্লিবা মমাশীংবু অনাবা অঙাং অমসুং ইমুং অদুদা লৈরিবা অতৈ অঙাংশীংবু য়েংশিন্দুনা অমসুং ইমুং মনুংগী থবকশীংদা মতেং পাংদুনা সপোর্ট তৌবীগদবনি।
  • রোটাভাইরসনা দাইরিয়া থোকহল্লি। রোটাভাইরস টিকা অসি কাপথোক্নবগী অয়াবা পীরিবা লৈবাকশিংগী অঙাংশীংবু মসি ঙাকথোক্নবগীদমক টিকা থাদোকপীগদবনি।
  • ভিটামিন A সপ্লিমেন্ট পীজবা অসি, মরুওইনা ভিটামিন A ৱাৎপা মফমশীংদা দাইরিয়াগী রিস্ক হন্থহন্নবগী মরুওইবা থৌরাং অমনি। খোম্লাং, লিভর, ঙা, শঙ্গোমগী পোত্থোকশীং, কমলা নত্ত্রগা নাপু মচুগী উহৈ অমসুং মনা-মশীংশীং, অমসুং অশংবা মনা পানবা মনা-মশীংশীং অসি ভিটামিন A য়াউবা চিঞ্জাকশীংগী মনুংদা চল্লি।
  • দাইরিয়া লায়েংনবগীদমক জিঙ্ক অসি নুমিৎ 10দগী 14 ফাউবা পীজবনা অঙাং অদু থা অনিফাউবা দাইরিয়া নাহন্দবদা মতেং পাংই। থা 6কী মথক্তা লৈবা অঙাংশীংদা নোংমদা জিঙ্ক (টেব্লেট নত্ত্রগা সিরপ) অসি মিলিগ্রাম 20 পীজবা য়াই। থা 6কী মখাদা লৈবা অঙাংশীংদা নোংমদা জিঙ্ক (টেব্লেট নত্ত্রগা সিরপ) মিলিগ্রাম 10 পীজবা য়াই।
  • ত্রেন তৌরবা হেলথ ৱার্কর অদুনা মমা, মপা নত্ত্রগা অতৈ শেন্নরিবা মীওই অদুদা করম তৌনা অঙাং অদুদা জিঙ্ক টেব্লেট অমা শুমদোক্লবা খোম্লাং, ORS নত্ত্রগা অশেংবা ঈশীং খরা কপ মচা নত্ত্রগা চমচ অমদা তুমহন্দুনা পীথক্কদগে হায়বদু তাকপীবা য়াই। করিগুম্বা অঙাং অদু য়াম্না নৌরিবা ওইরবদি টেব্লেটগী মহুত্তা জিঙ্ক সিরপ অমা শিজিন্নবা য়াই।

দাইরিয়ানা নাবা অঙাং অমনা চাং নাইনা মখা তানা চাথবা মথৌ তাই। অনাবা অদুনা মরম ওইদুনা মাংহনখিবা এনর্জি অমসুং মচি ওইবশীং অদু হঞ্জিনহন্নবা মহাক্না ফগৎলক্লিঙৈ মতমদা মঙোন্দা হান্নদগী হেন্না চিঞ্জাক পীজবা তাই।

  • দাইরিয়ানা নারবা অঙাং অমগী অরুম্বা হন্থৈ অমসুং থুনা য়াংনা মচি ওইবা হন্থরকই। দাইরিয়ানা নারবা অঙাং অমনা, মহাক্না চাবা-থকপা ঙম্লিবা খোম্লাং য়াউনা অতৈ মহি অমসুং মপংগী চিঞ্জাক মথৌ তাই। মচি ওইবা চিঞ্জাক পীজবনা অঙাং অদুবু থুনা ফগৎলকপদা মতেং পাংগনি।
  • দাইরিয়ানা নারবা অঙাং অমনা চানিংবা পোক্লক্তবা য়াই নত্ত্রগা ওরকপা য়াই, মরম অদুনা পীজ-পীথকপসি অরুবা অমা ওইরকপা য়াই। খোম্লাং অদু হেন্না তোইনা ইনবীগদবনি। করিগুম্বা অঙাং অদু থা 6 শুরবা নত্ত্রগা মদুদগী হেনবা ওইরবদি, মমা মপা অমসুং অতৈ শেন্নরিবশীংনা অপেৎপা, তকখায়রবা চিঞ্জাকশীং নত্ত্রগা অঙাং অদুনা পাম্বা চিঞ্জাকশীং পীদুনা খজিক খজিক তোইনা পীজবা য়াই। চিঞ্জাকশীং অদুদা থুমগী চাং খজিক্তং য়াউহনগদবনি। অপেৎপা চিঞ্জাকশীং অসি চাবদা লায় অমসুং অকনবা চিঞ্জাক্তগী হেন্না মহি-মনাই য়াউই।
  • দাইরিয়ানা নারবা অঙাংশিংদা পীজনবা রেকমেন্দ তৌরিবা চিঞ্জাকশীংদি ফজনা তকখায়রবা মহৈ-মরোংশীং অমসুং হৱাই অশাংবী, ঙা, ফজনা থোংলবা শা, শঙ্গোম অফম্বা অমসুং উহৈশীংনি। মহৈ-মরোং নত্ত্রগা মনা মশিং অদুদা চমচ 1 নত্ত্রগা 2গী চাংদা থাউ খজিক্তং হাপ্পীবা য়াই। চিঞ্জাকশীং অদু অতেকপনা শেমগদবনি অমসুং অঙাং অদুদা নোংমদা মঙা নত্ত্রগা তরুক্লক্কুম্বা পীজগদবনি।
  • দাইরিয়া অদু লেপখ্রবা মতুংদা, মপুং ফানা ফগৎহন্নবগীদমক হেন্না পীজবা হায়বসি য়াম্না মরুওই। মতম অসিদা, অঙাং অদুদা, খোম্লাং য়াউনা অহেনবা চিঞ্জাকশীং হান্নদগী হেন্না পীজদুনা দাইরিয়ানা মাংহনখিবা এনর্জি অমসুং মচি ওইবা চিঞ্জাকশীং অদু মেনখৎপা য়াই।
  • অঙাং অমনা য়ামদ্রবদা নাবা হৌবা মতমদা লৈখিবা অরুম্বা অদুগা মান্ননা লৈত্রিবমখৈ দাইরিয়াদগী মপুং ফানা ফগৎলে হায়বা য়াদে।

দাইরিয়ানা নাবা অঙাং অমনা ওরেল রিহায়দ্রেসন সোল্টস (ORS) অমসুং নোংমগী ওইবা জিঙ্ক সপ্লিমেন্ট অমা নুমিৎ 10দগী 14 ফাউবা লৌবা তাই। দাইরিয়াগী হিদাকশীং অসি মহৌশানা ইফেক্টিভ ওইদে অমসুং শোক্নিংঙাই ওই।

দাইরিয়া অসি রিহায়দ্রেসন (মহিগী চাং য়াম্না থকপা) তৌদুনা নুমিৎ হুম্নিদগী মরিনি ফাউবগী মনুংদা মশা মথন্তা ফজবা ঙম্মী। তশেংনা খুদোংথীনিঙাই ওইরিবদি অঙাংদুগী হকচাংদগী মহি মনাই অমসুং ন্যুত্রিএন্টশীং মাংখিদুনা দিহায়দ্রেসন অমসুং মালন্যুত্রিসন থোকপদুনি।

দাইরিয়ানা নারবা অঙাং অমবু, ত্রেন তৌরবা হেলথ ৱার্কর অমনা প্রেস্ক্রাইব তৌদ্রিবমখৈ কৈদৌঙৈদা টেব্লেট, এন্টিবাইওটিক নত্ত্রগা অতৈ হিদাক-লাংথকশীং পীজবীরোইদবনি।

দাইরিয়াগী খ্বাইদগী ফবা লায়েংদি (1) শাফবা সোর্সতগী লৌবা অফবা ঈশীংগা চুনবা মওংদা য়ান্সিন্দুনা মহি অমসুং ওরেল রিহায়দ্রেসন সোল্টস (ORS) য়াম্না থকপা, অমসুং (2) নুমিৎ 10দগী 14নি ফাউবা জিঙ্ক টেব্লেট নত্ত্রগা সিরপ থক-চাবা অসিনি।

ORS সোল্যুসন

দাইরিয়াগীদমক অখন্নবা থক্নবা মহি অমা

ORS করিনো?

ORS (ওরেল রিহায়দ্রেসন সোল্টস) অসি অকংবা থুম অমসুং শাফবা ঈশীংগা য়ান্নবা অখন্নবা কম্বিনেসন অমনি। মসিনা দাইরিয়ানা মাংহনখিবা মহি-মনাই অদু মেনশিনবদা মতেং পাংই।

করম্বা মতমদা ORS শিজিন্নগদগে?

অঙাং অমনা নোংমদা অহুম নত্ত্রগা মরিরক মখোং হাম্লবদি ORS পীথকপা হৌরো। মসিগী মথক্তা, নুমিৎ 10নিদগী 14নি ফাউবা, থা 6কী মথক্তা লৈবা অঙাংশীংদা নোংমদা জিঙ্ক (টেব্লেট নত্ত্রগা সিরপ) মিলিগ্রাম 20 পীজবা য়াই; থা 6কী মখাদা লৈবা অঙাংশীংদা নোংমদা জিঙ্ক (টেব্লেট নত্ত্রগা সিরপ) মিলিগ্রাম 10 পীজবা য়াই।

করম্বা মফমদা ORS ফংগদগে?

অয়াম্বা লৈবাকশীংদা, ORS পেকেট অসি হেলথ সেন্টর, ফার্মাসি, কৈথেল অমসুং দুকানশীংদা ফংই।

করম্বা মওংদা ORS মহি শেমগদগে?

1. _ORS পেকেটতা য়াউরিবশীংদু তরু-তনানবা পাত্র অমা হাপচিল্লু। তৌগদবশীং অদু খংনবা পেকেট অদু য়েংউ অমসুং চানবা চাংদা অশেংবা ঈশীং অদু হাপচিল্লু। ঈশীংগী চাং কা হেন্না য়ামদ্রবদি দাইরিয়া অদু হেঞ্জিল্লকপা য়াই।

2. _ঈশীংখক্তং হাপ্পু। ORS অদু শঙ্গোম, সুপ, হৈ মহি নত্ত্রগা সোফট দ্রিঙ্কশীংদা হাপচিনগনু। চিনি হাপকনু।

3. ফজনা ওৎলু, অমসুং অফবা কপ অমদগী অঙাংদুদা পীথকপীয়ু। বোটল শিজিন্নগনু।

ORS কয়াম পীথক্কদগে?

অঙাং অদুদা য়ারিবমখৈ থক্নবা পুক্নিং থৌগৎকদবনি।

 

চহি 2গী মখাদা লৈবা অঙাং অমনা মখোং মহি ওইনা হামদোকখিবা খুদিংগী ORS মহি অসি য়ামদ্রবদা অচৌবা কপ (মিলিলিটর 250) অমগী শরুক 1⁄4দগী 1⁄2 ফাউবা মথৌ তাই।

 

চহি 2 নত্ত্রগা মসিদগী হেনবা অঙাং অমনা মখোং মহি ওইনা হামদোকখিবা খুদিংগী ORS মহি অসি য়ামদ্রবদা অচৌবা কপ (মিলিলিটর 250) অমগী শরুক 1⁄2দগী 1 ফাউবা মথৌ তাই।

করিগুম্বা ORS ফংদ্রবদি করি তৌগদগে?

অঙাং অদুদা চিনিগী চামচ লেভেল 6 অমসুং থুমগী চামচ লেভেল 1⁄2 অশেংবা ঈশীং লিটর 1দা তুমহন্দুনা পীথকপিগদবনি।

 

চানবা চাং অদু য়ানশিন্নবদা য়াম্না চেকশিনগদবনি। চিনি কা হেন্না হাপ্পনা দাইরিয়া অদু হেলহনগনি। থুম কা হেনবনা অঙাং অদুদা শাথীনা শোকহনবা য়াই।

 

মিক্সচর অদু খজিক্তং হেন্না দাইলুট (অফবা ঈশীং লিটর 1দগী হেনবগা) ওইবনা হকচাংদা শোকহন্দে।

দাইরিয়া অসি মহৌশানা নুমিৎ হুম্নি নত্ত্রগা মরিনিদা ফৈ।

করিগুম্বা মদুনা লেপত্রবদি, ত্রেন তৌরবা হেলথ ৱার্কর অমগা তান্নগদবনি।

দাইরিয়া থীংনবা, অঙাং অমসুং পুংকক চাউবা অঙাংশীংগী য়াউনা অমাংবা পুম্নমক লেত্রিন নত্ত্রগা তোইলেটতা হুন্দোক্কদবনি নত্ত্রগা ফুমজিনগদবনি।

  • করিগুম্বা অমাংবশীং অসি থক্নবা ঈশীং, চিঞ্জাক, খুৎ-শা, কোল-লিক নত্ত্রগা চানবা শেম্ফম লৈমায়দা শোক্নরবদি অঙাং অমসুং নহা ওইরিবশীংনা দাইরিয়া থোকহল্লিবা মহিকশীং য়োৎশিনখিবা য়াই।
  • অমাংবশীংদা তোংলুবা হয়িংশীংনা চিঞ্জাকশীংদা তোংবদগী দাইরিয়া থোকহল্লিবা মহিকশিং অদু শন্দোকপসু য়াই। হয়িংশীং তান্থোক্নবা অমসুং মহিকশীং শন্দোকপা থিংনবা, (1) অমাংবশীং অদু শাফবা মওংদা লেত্রিন নত্ত্রগা তোইলেট অমদা থাদগদবনি, (2) লেত্রিন নত্ত্রগা তোইলেট অদু লু-নান্না থমগদবনি, অমসুং (3) চিঞ্জাক অমসুং থক্নবা ঈশীং মখুম কুপশিনগদবনি।
  • পিক্লিবা অমসুং পুংকক চাউরবা অঙাংশিংগী য়াউনা অমাংবা পুম্নমক্না মহিকশীং চেল্লি অমসুং খুদোংথীনিঙাই ওই। করিগুম্বা অঙাংশীংনা লেত্রিন নত্ত্রগা তোইলেট শিজিন্নদনা মখোং হাম্লবদি, মখোয়গী অমাংবশীংদু খুদক্তা শেংদোক্কদবনি অমসুং লেত্রিন নত্ত্রগা তোইলেত্তা থাদগদবনি নত্ত্রগা ফুমজিনগদবনি। মদুগী মতুংদা, খুৎ অদু সাপোন অমসুং ঈশীংনা শেংনা হামদোক্কদবনি। করিগুম্বা সাপোন ফংদ্রবদি, উৎ অমসুং ঈশীংনা মদুগী মহুৎ ওইনা শিজিন্নবা য়াই। অহলশীং অমসুং নুপামচাশীংনা নুপী অমসুং নুপীমচাশীংবু অমাংবশীং হুন্দোকপদা মতেং পাংবীবা য়াই।
  • করিগুম্বা লেত্রিন নত্ত্রগা তোইলেট লৈত্রবদি, চাউরবা অমসুং পীক্লিবা অঙাংশীংনা য়ুম, লম্বী, ঈশীংগী সপ্লাইশীং অমসুং অঙাংশিংনা শান্নবা মফমশীংদগী লাপ্না মখোং হামহনগদবনি। অদুদগী অমাংবশীং অদু লৈনুংদা ফুমজিনগদবনি। মী অমসুং শা-ষনগী অমাংবশীং অসি ঈশীংগী সোর্সশীংদগী লাপ্না হুন্দোকখিগদবনি।
  • তোইলেট নত্ত্রগা লেত্রিন লৈতবা কম্যুনিতিশীংদা, কম্যুনিতি অদুনা অসিগুম্বা ফেসিলিটিশীং অসি শেমগৎনবা পুন্না হোৎনমিন্নগদবনি। ইমুংশীংনা মখোয় মশাগী শেম্নবসু পুক্নিং থৌগৎকদবনি।

অফবা হায়জিনগী প্রাক্টিসশীং অমসুং শাফবা থক্নবা ঈশীং শীজিন্নবনা দাইরিয়াদগী ঙাকথোকই। খুৎ অসি, সাপোন অমসুং ঈশিংনা নত্ত্রগা উৎ অমসুং ঈশীংগুম্বা মহুৎ শিনবা য়াবা অমনা, খোং হাম্বা লোয়রগা অমসুং অমাংবা পায়রুরবা মতুংদা, অমসুং চানবা চিঞ্জাক পায়দ্রিঙৈ নত্ত্রগা শেম শাদ্রিঙৈ নত্ত্রগা অঙাংশীংদা পীজদ্রিঙৈদা শেংনা হামদোকপীগদবনি।

অঙাংশীংবু তোইলেট নত্ত্রগা লেত্রিন চংহল্লুরবা মতুং, অঙাংশীং মনিং চামথোকপীরুরবা মতুংদা, অমাংবশীং হুন্দোক্লুরবা মতুংদা, অমসুং অঙাংশীং পিজদ্রিঙৈগী হেক মমাংদা, চিঞ্জাক নত্ত্রগা চানবশীং পাইদ্রিঙৈদা খুৎ-শা অসি সাপোন অমসুং ঈশীং নত্ত্রগা উৎ অমসুং ঈশীংগুম্বা মহুৎ শিনবা য়াবা অমনা মতম পুম্বদা হামদোক্কদবনি।

অপিকপা অঙাংশীংদি মখোয়গী মচিন্দা মখুৎ চুপকল্লি। মরম অদুনা য়ুম অদু নান্না থম্বা হায়বসি য়াম্না মরুওই অমসুং অঙাংশীংবু মরুওইনা মখোং হাম্লবা মতুং অমসুং চাদ্রিঙৈ মমাংদা মখোয়গী মখুৎ অদু ফজনা হামদোকপা তম্বীগদবনি।

শাফবা থক্নবা ঈশিং শিজিন্নবা অমসুং মদু নান্না অমসুং মহিক-মতাই চেলহন্দনা থম্বনা দাইরিয়া হন্থহনবদা মতেং পাংই।

দাইরিয়া থীংবদা মতেং পাংগদবা অতৈ হায়জিনগী থৌরাংশীংগী মনুংদা মখাগীশীংসি চল্লি:

  • করিগুম্বা মরুওইনা অঙাংশীংনা উহৈ অমসুং মনা-মশীংশীং হিংনা চাগদৌবা ওইরবদি মকু খোকউ নত্ত্রগা অশেংবা ঈশীংনা ফজনা চামথোকউ।
  • চাদ্রিঙৈ হেক মমাংদা চানবা চিঞ্জাক শেম-শাগদবনি অমদি ফজনা থোংগদবনি (থমদুনা লৈবা চিঞ্জাকশীংদা দাইরিয়া থোকহনবা ঙম্বা মহিকশীং চেল্লকপা য়াই। পুং অনিগী মতুংদা, থোং থাক্লবা চিঞ্জাকশীং অসি য়াম্না শানা নত্ত্রগা য়াম্না ঈংনা থমদ্রবদি শাফবা ওইদে।)
  • হয়িংশীংনা লায়না শন্দোকপা থীংনবা অরেম্বা চিঞ্জাকশীং ফুমজিনলু, মৈ থাদোকউ নত্ত্রগা শাফবা মওংদা মাংহনলু।

সোর্স: UNICEF

2.36363636364
অদোমগী সজেসন পোষ্ট তৌরো

(মথক্কী কন্টেন্ট অসিদা অদোমগী কমেন্ট/সজেসন অমা লৈরবদি মসিদা পোষ্ট তৌবিয়ু).

Enter the word
নেৱিগতিওন
Back to top