হোম / হকশেল / ফার্ষ্ট এইদ / মৈনা চাকপা অমসুং ঈশীং অশাবনা নত্ত্রগা মনিলনা পোকপা
শেয়র
Views
  • ষ্টেট শেমদোক্নবা হাংদোকউ

মৈনা চাকপা অমসুং ঈশীং অশাবনা নত্ত্রগা মনিলনা পোকপা

মৈনা চাকপদগী থোকপা অশোক-অপনগা মরি লৈনবা মচং ওইবা অচুম্বশীং (ফেক্টশীং) অমসুং মদুদা পীগদবা ফার্ষ্ট এইদ (অহানবা লাইয়েং) অদু মফমসিদা শন্দোক্না তাক্লি।

মৈনা চাকপনা থোকহনবা অশোক-অপনশীং(Burn injuries)

মৈনা চাকপা হায়বসি ঐখোয়গী হকচাং অসিনা অচাকপা মৈশাগা য়াম্না নক্নরুবা অমসুং অকনবা কেমিকেলশীংগা শোক্ন-শম্নরুবা মতমদা থোকই।

মৈনা চাকপা নত্ত্রগা অশাবা ঈশীংনা পোকপনা, দাগ লৈবা, শোয়নাইবা অমসুং মেন্টেল ত্রোমানচিংবা পুক্নিং নুংঙাইহন্দবা ইফেক্ট কয়া লৈহল্লি; ইফেক্টশীং অসি মতম শাংনা লৈবা য়াই, অমসুং করিগুম্বা মতমদা মতম চুপ্পগী ওইনা লৈবসু য়াই। কা-হেন্না চাকপশীং অদু অচুম্বা মওংদা, চেক্সিন্না অমসুং খুদক্তা লাইয়েংহৌবা হায়বসি য়াম্নমক তঙাইফদে।

  1. থোং-থাক্নবা টিন, লৈরং উপু অমসুং খাংগী মনা অসিনচিংবা চাকখুমগী কোল-লিকশীংনা থোকহনবা য়াই।
  2. কেটলি, ইষ্ট্রি য়াউনা অনৌবা মতমগী ইলেক্ট্রিক্কী খুৎশু-খুৎলাইশীংনা থোকহনবা য়াই।
  3. হাংদোকপা লৈরংগী য়োৎ, গ্যেস অমসুং ইলেক্ত্রিক্কী হিটরদগী শোয়দুনা মৈ হৌরকপা য়াই।
  4. ফি-রোল অমসুং অতৈ পোৎ-চৈশীং শোয়বদগী মৈ চাকপা য়াই।
  5. ব্লিচ অমসুং মপাঙ্গল লৈবা দিসইনফেক্টেন্টশীংনা থোকহনবা য়াই।
  6. কা-হেন্না শাবা নুংশা অমসুং নুংশিৎনা থোকহনবা য়াই।
  7. থৌরিশীংদা এক্সিদেন্ট থোকপা য়াই।

মখোয়গী কেরেক্টরনা মরম ওইদুনা, মৈনা চাকপসি ফিনা কুপ্তবা হকচাংগী শরুকশীংদনা, মরুওইনা খুৎ, খুদাং অমসুং কোক্তা খ্বাইদগী হেন্না থোক্কল্লি।  নাকল অমরোমদা, ঈশীং অশাবনা পোকপা অসিদি, হকচাং অসিনা অশাবা মনিল, হায়বদি ঈশীং অশাবা নত্ত্রগা ঈনিল, ফেট নত্ত্রগা থাউ, অমসুং অতৈ অশাবা মহিশীংগা থেংনরুবা মতমদা থোকই। অদুবু মসিগী ফল অনিমক্তি চপ মান্নৈ, মসিনা উনশাদা শোকহল্লি। ‘মৈনা চাকপা’ অমা হায়বসি মৈনা চাকপা নত্ত্রগা ঈশীং অশাবনা পোকপা অনিমক খংনৈ। মৈনা চাকপনা থোকহনবা অমাং-অতা অসি উনশাদা ঙাংশিনবদগী হৌরগা ঈশীং হানবা ফাউবা, অমদি খরা হেন্না শাথীবা কেসশীংদনা, টিসুশীং মাং-তাকপা অসি য়াউই।

মৈনা চাকপা অয়াম্বদি য়ুমদা থোক্কল্লি, মরম অদুনা মফমসিদনি মখোয়বু লাইয়েংগদৌরিবসি; অমসুং য়ুমদা থোকপা মসিগী অয়াম্বা থৌদোকশীং অসি চাকখুমদা থোকপনা মরম ওইদুনা, অশোকপা অদু লাইয়েংবগী খ্বাইদগী ফবা মফম অসি চাকখুম্না ওইবা য়াই। অদুবু ঐখোয়না য়ারিবমখৈদি এক্সিদেন্ট অসি থোক্তনবা হোৎনগদবনি। ঐখোয়না নিংশিংগদবদি, চহি য়াম্লবশীং, নামা শোয়রবশীং অমসুং অঙাংশীং, মরুওইনা চৎপা ঙম্লক্লবা অঙাংশীং (toddlers) অসিনা খ্বাইদগী চাউনা রিস্ক লৈবা গ্রুপনি। অঙাংশীং অমসুং চহি য়াম্লবা অহলশীংদা থোকপা মৈনা চাকপা খুদিংমক সিরিয়স ওইনা (লুনা) লৌগদবনি।

মরুওইবা তৌরোইদবা খরা(Some important don'ts)

মৈনা চাকপনা হকচাংদা করি থোকহনবগে অমসুং প্রোফেসনেল এইদ ফংদ্রিঙৈদা নহাক্না করি তৌবা য়াবগে হায়বদু নৈনদ্রিঙৈদা, অশোক-অপনশীঙ অসি থোকপা মতমদা নহাক্না তৌরোইদবা থবক খরা মখাদা পীরি।

  1. অচাকপা অদুদা বত্তর (butter), তকখায়রবা চেং (flour) নত্ত্রগা বেকিং সোডা কৈদৌঙৈদা হাপ্লোইদবনি।
  2. ওইন্টমেন্ট, লোসন নত্ত্রগা থাউ অসি ত্রিটমেন্টগুম্না কৈদৌঙৈদা শিজিন্নরোইদবনি।
  3. ঈশীং হাল্লক্লবসু মদু কৈদৌঙৈদা থীন্দৎলোইদবনি নত্ত্রগা থুগাইরোইদবনি।
  4. মথৌ তাবখক্তদা নত্তনা অশোকপা মফম অদু পায়রোইদবনি নত্ত্রগা শোক্লোইদবনি।
  5. হকচাংদা নপ্লিবা অচাকপা ফি-রোল অদু কৈদৌঙৈদা চিংথোক্লোইদবনি।

হৌজিক্কী মতমগী ওইবা অয়াম্বা ফি-রোলশীংদি সিন্থেটিক ফাইবরদগী শেম্মী অমসুং মসিনা টোফিগুম্না শৌদোক্তুনা উনশাদা নপ্পী। করিগুম্বা নহাক্না মদু লৌথোক্নবা হোৎনরুরবদি, মদুনা উনশা অদু তৎহন্দুনা হকচাংদা কান্নদবা চৈনা পীগনি অমসুং মদুনা ইনফেক্সন লাকহনবসু য়াই। মৈনা চাক্লবা ফি-রোল অদু ষ্টেরাইল ওইরগনি অমসুং মদু অদুম থম্বীবনা খ্বাইদগী ফৈ।

ময়ামগী ওইবা লাইয়েং(General treatment)

মৈনা চাকপা অখন্নবা মখল খরা নত্তনা, অতৈ পুম্নমক্কীদি কমন ওইবা লাইয়েং অমা লৈ। য়াম্না পীকপা শরুক নত্তবা, খুদোংথীনিঙাই ওইবা, য়াম্না নাবা মৈনা চাকপা মফমশীংদু হান্না থীদোকউ। থৌদোক অয়াম্বা য়ুমদা মৈ চাকপা নত্ত্রগা পেট্রোল মৈ হৌবা রোদ এক্সিদেন্টগুম্বা এমর্জেন্সি থৌদোকশিংদা শোকপনা অয়াম্বা ওইগল্লি। মরম অদুনা হেল্প রুটিন (Help Routine)গী মচং ওইবা রুলশীং অসি শরুক অনি হেন্না মরুওই অমসুং পুক্নিং তপথনা লৈনবা অমসুং পাখৎলিবা অশোকপদুবু পুক্নিং থৌগৎকদবনি হায়বসি নিংশিংগদবনি অমদি মঙোন্দা পুকচেল তপ্পা উৎকদবনি অমসুং মতম পুম্বদা অহানবা থবক্না হান্না পাংথোক্তুনা, য়াম্না থুনা অদুবু সিষ্টেমেটিক ওইনা (নিয়ম অমদা) থবক তৌবা হৌগদবনি।

উনশা অমসুং টিসুশীং অসি অমুকপু চাকখ্রবদি, মহি-মনাই (fluid) য়াম্না মাংখিবগী থৌওং লাকপা য়াই। অশোকপা টিসুশীংদুনা মৈশা অদু ওমশিন্দুনা থমগনি অমসুং মদুনা মখা তানা অকায়-অতোয় থোকহনগনি। মরম অসিনা ঙন্না লাইয়েংবগী পান্দম অসি মৈশাদগী নান্থোকপসিনি। ফার্ষ্ট এইদকী লাইয়েং অসিনা অশোকপা টিসু অদুদা লৈরিবা টেম্পেরেচর অদু হন্থহনবা তাই।

মসিগী কেয়র (Care)

অশোকপা শরুক অদু অঈংবা ঈশীংদা লুপশীল্লু। মসি বাল্টিন নত্ত্রগা খুদেং, চাকখুমগী ঈশীং তাফম বেসিন (kitchen sink), নত্ত্রগা ইচম চম্না মৈনা চাকপা শরুক অদু অঈংবা ঈশীং কোঞ্জিন অমদগী ঈশীং তপ্না তপ্না থাদদুনা পাংথোকপা য়াই।

  1. মৈনা চাকপা শরুক অদু অঈংবা ঈশীংদা মিনট তরামঙারোম নত্ত্রগা অনাবা অদু লেপখিদ্রিবফাউবা লুপশিন্দুনা থমগদবনি। করিগুম্বা অশোকপা অদু লুপশিন্দুনা থম্বদা অরুবা ওইরবদি (খুদম ওইনা, মায়দা), তরু-তরুবা ফি মতেক অমা নত্ত্রগা অতৈ অমোনবা ফি অমা অঈংবা ঈশীংদা লুপ্লগা অশোকপদুদা থমগদবনি। মদু হঞ্জিন-হঞ্জিন (অমুক হন্না ঈশীং চোৎহন্দুনা) হোংদোকপা কাউগনু, অদুবু অশোকপা উনশাদুদা তকপদি (rub) তৌগনু। লাইয়েং অসিনা টিসুশীংদুদগী মৈশা (heat) খরদি লৌথোক্কনি অমসুং মখা তানা অকায়-অতোয় থোকহনবা, ঙাংশিনহনবা, ঈশীং হালহনবা অমসুং অনাবা ফাউবা থীংগনি।
  2. খুদোপ, খুজি, খোংউপ অমসুং হকচাংদা চেৎনা শিবা পোৎ-চৈ পুম্নমক হেক অশোক-অপন থোকপগা য়ারিবমখৈ থুনা লৌথোক্কদবনি, মরমদি পোমখৎলক্লবদি মখোয়দু কোন্না লৌথোকপদা অৱাবা ওইগনি।
  3. য়াম্না থীনা চাক্তবশীংদি নাবা ফাউবা হেক লেপখিবগা মফমদু কংহন্দুনা দ্রেসিং তৌশিনগদবনি। হেন্না চাউনা অমসুং লুনা চাকপশিংদি ঈশীংদগী লৌথোরকপা মতমদা তরু-তরুবা, ইষ্ট্রি তকপদা ঙাইরিবা, মতু য়াউদবা ফি (non-fluffy)না কোম্লপ্না য়েৎশিনবা য়াই (অরুবা মোনখুম ফি অসি খোংদা শোকপশীংগীদি খ্বাইদগী ফৈ)।
  4. দোক্টর অমা নত্ত্রগা এম্বুলেন্স অমা কৌ।
  5. পোষ্টেজ ষ্টাম্প (সেমি 2*21/2) অমদগী হেন্না পাক্না মৈনা চাক্লবদি, নহাক্না ঈংথহনবগী লাইয়েং চত্থহল্লবা মতুংদা দোক্টর অমনা শোয়দনা য়েংহনগদবনি।
  6. অপাকপা এরিয়া অমদা চাক্তুনা হোস্পিটালগী কেয়র মথৌ তারবদি, মফমদু য়ৌনবা চৎলিঙৈ মতমদা টাউৱেল অমদা উন য়োমসিন্দুনা অশোকপা মফম অদুদা হাপ্পা য়াই।
  7. অচাকপা উনশাদা ইনফেক্সন লাক্কনবা মরম্না মদু থীংনবগীদমক, চাকখ্রবা টিসু অদু কুপশীনবা য়াম্নমক মথৌ তাই। মসিনা অশোকপা মীওই অদুদা অশোকপদু মখা তানা উহন্দবা মরম্না পুক্নিং ৱাবসু হন্থহল্লি। হকচাং কুপশিন্নবগীদমক টেবল ফিদা নত্ত্রগা মোম্পাক ফিদক (নাইলোন নত্তবা) অসি য়াম্না চান্নৈ। অশোকপা মফমদুদা কুপ্পদদি খরা কোমহনবা তাই।
  8. দোক্টর নত্ত্রগা এম্বুলেন্স লাকপা ঙাইরিঙৈদা, অশোকপা মীওই অদুবু পুক্নিং লুমহল্লু। অঙাং অমবু পম্বীদুনা লক্নবীগদবনি: অদুবু মদুনা প্রোসেস অদুদা অশোয়বা থোক্তনবা চেক্সিনগদবনি।

অখন্নবা লাইয়েং মথৌ তাবা ফিভমশীং

ফি-রোল মৈনা চাকপা

করিগুম্বা ফি-রোলদু চাক্লগা লৈরিবা ওইরবদি, মৈরিশীংদু ঈশীংনা মুত্থৎকদবনি, নত্ত্রগা ব্লাঙ্কেট, কোট নত্ত্রগা অচৌবা ফি, লৈমায়দা থারিবা কার্পেট ফাউবা শিজিন্নরগা মীওই অদুদা কুপশিন্দুনা নুংশিৎকী সপ্লাই থীংজিন্দুনা মুত্থৎকদবনি। নহাক্না মুত্থৎকদৌরিবা মৈরি অদুনা নঙোন্দা ৱাইরক্তনবগীদমক ব্লাঙ্কেট অদু নহাক্কী নমাংদা ওইন পায়বদি কাউগনু।

  1. মৈনা চাকপা মীওই খুদিংমক পাখৎকনি, অমসুং কা অমদগী কা অমদা চেনবা য়াই, অমদি মদুনা মৈ অদু অতোপ্পা মফমদসু শন্দোরকপা য়াই, নত্ত্রগা অহাংবা মফমদা চেন্থোকপদগী অশেংবা (ফ্রেস ওইবা) নুংশিৎনা মৈদু অমুক্কা হেন্না চাকখৎহনবা য়াই। মরম অদুনা পেসেন্ট অদুবু লেংদনা লৈনবা পুক্নিং থৌগৎকদবনি।
  2. মৈরিশীং অদু হেক মুত্থৎখিবগা মথক্তা পীখ্রিবা মৈ চাকপগী কমন ওইবা লাইয়েং অদু মখা চত্থৌ।

মীত্তা কেমিকেল চোংখিবা/ চংখিবা

মসিনা মতম চুপ্পগী ওইনা মাং-তাকহনবা য়াই অমসুং মীৎ তাংহনবা ফাউবা য়াই, অমদি মরম অদুনা লাইয়েং পাংথোকপদা খোংজেল থুবা তাই। কেমিকেল অদু খুদক্তা দাইলুট (ময়াক হন্থহনবা) তৌগদবনি।

  1. অশোকপা মীওই অদু লোংনা হিপহনগদবনি, অমসুং খুবি অমসুং খুদোম্বীনা মীৎপান্দু কাথোকহন্দুনা মীৎকী মমাংলোমদা নাতোল্লোম থংবা নাকলদগী (কেমিকেল অদুনা অতোপ্পা মীৎ অদু শোকপা থীংনবা) অঈংবা ঈশীংদু লেপ্তনা হৈথৌ।
  2. মীৎপান্দু হাংদোক-হাংজিন কয়ারক হন্না তৌদুনা কেমিকেল অদু মীৎথুপ মনুংদা (lids) নপ্তুনা লৈহৌব্রা হায়বদু য়েংউ।
  3. চামথোকপগী প্রোসেস অসি য়ামদ্রবদা মিনট তরাদি চত্থৌ। মসি ঘরি য়েংদুনা পাংথোকউ, অমসুং মতমদু মপুং ফাদনা তোক্কনু
  4. লাইয়েং চত্থরবা মতুংদা, মীৎপান্দু খুমজিল্লু, মীৎ মথক্তা পেদ অমা পোজিসন চানা থম্মু।
  5. অশোকপা মীওই অদু ৱাখল নুংঙাইহল্লু অমসুং এম্বুলেন্স অমা কৌ নত্ত্রগা মহাক অদু হোস্পিটালদা পু।

ইলেক্ত্রিক্না চাকপা (Electrical burns)

মসি এরিয়াদি য়াম্না পিক্না চাক্কল্লি, অদুবু মখোয় অসি য়াম্নদি লুবা (deep) ওইগল্লি। মখোয় অসি মহৌশানা করেন্ট (current) অদুনা হকচাংদা চংখিবা অমসুং থোকখিবা মফম (points of contact) অদু ওইগল্লি।

  1. অশোকপা মীওই অদু লাইয়েংবা হৌদ্রিঙৈদা করেন্ট স্বিটচ ওফ তৌ অমসুং প্লগ অদু লৌথোকউ।
  2. করিগুম্বা মীওই অদু ঈশিংদা তাবা ওইরবদি, নহাক লাপ্না লৈয়ু, মরমদি ঈশীং মনিল (moisture) অসি ইলেক্ত্রিসিটিগী অফবা কন্দক্টর অমনি। মরম অসিনা অশোকপা মীওই অদু পাম্বোম মখাদা চপ্তুনা পুগনু।
  3. অশোকপা মীওই অদু শ্বর হোল্লিব্রা হায়বদু চেক তৌ। করেন্ট অদুনা থবাক্তা ফাউদোকখিবনা মরম ওইদুনা হার্ট অমসুং শ্বর হোনবা লেপহনবা য়াই। করিগুম্বা মসিমক ওইরবদি কিস ওফ লাইফ অমসুং হার্ট মসাজ (Kiss of Life and heart massage) খুদক্তা হৌগদবনি।
  4. মৈনা চাকপগী ময়ামগী ওইবা লাইয়েং অদু চত্থৌ।

সোর্স: পোর্টেল কন্টেন্ট টিম

2.6875
অদোমগী সজেসন পোষ্ট তৌরো

(মথক্কী কন্টেন্ট অসিদা অদোমগী কমেন্ট/সজেসন অমা লৈরবদি মসিদা পোষ্ট তৌবিয়ু).

Enter the word
Back to top