এন্টিবাইওটিক রেসিষ্টেন্স

এন্টিবাইওটিকশীং

এন্টিবাইওটিকশীং অসি মপাঙ্গল লৈবা হিদাকশীংনি, অদুবু মখো অসি লায়না পুম্নমক্কী ফহন্নবা পোৎশক অমদি নত্তে। এন্টিবাইওটিকশীং অসি বেক্টেরিয়ানা থোকহনবা ইনফেক্সনশীং মায়োক্ননবা হিদাকশীংনি। মখোয় অসি কমন কোল্ড, খৌনাউ নাবা অমসুং ফ্লুগুম্বা ভাইরেল ইনফেক্সনশীংদদি ইফেক্টিভ ওইদে।

এন্টিবাইওটিক রেসিষ্টেন্স

এন্টিবাইওটিক রেসিষ্টেন্স (Antibiotic resistance) হায়বসি এন্টিবাইওটিক অমগী ইফেক্টশীংগী মায়োক্তা মাইক্রোওর্গানিজম অমনা লেপ্পা ঙম্বগী মপাঙ্গল (ability) অদুবুনি। মীওইদুগী মহুত্তা বেক্টেরিয়া অদুনা এন্টিবাইওটিক রেসিষ্টেন্ট (antibiotic resistant) ওইরকই। মসিগী মতুংদা বেক্টেরিয়াশীং অসিনা মীওইদুদা ইনফেক্ট তৌরকই অমসুং নন-রেসিষ্টেন্ট বেক্টেরিয়াদগী হেন্না লায়েংবদা লুবা ওইরকই।

ঙসিদি, ভারত অমসুং পৃথীবী পুম্বদা লৈরিবা মরুওইবা বেক্টেরিয়ানা থোকহনবা ইনফেক্সন পুম্নমক অসি এন্টিবাইওটিকশীংদা রেসিষ্টেন্ট ওইরক্লি। এন্টিবাইওটিক রেসিষ্টেন্স অসি পৃথীবীগী খ্বাইদগী মরুওইবা পব্লিক হেলথকী পুক্নিং ৱানিংঙাইগী মচাক (public health concerns) অমা ওইরক্লি। পৃথীবী শিনবা থুংনা এন্টিমাইক্রোবাইএলশীং (antimicrobials) অসি মরম চাদনা পংশিদা শিজিন্নরক্লি।  মসিনা থেরাপিগী শেল চংবা হেলহনবা, দ্রগকী মথৌ তাদবা কান্নদবা রিএক্সন লাকহনবা, থেরাপি ফেল ওইবা, কেয়রগী হন্থবা ক্বালিটি অমসুং ময়ামসিদগী খ্বাইদগী মরুওইবদি এন্টিমাইক্রোবাইএল রেসিষ্টেন্স (AMR) অসি লাকহল্লি। ন্যুমোনিয়া, ট্যুবরক্যুলোসিস, ব্লদ পোইজনিং অমসুং গোনোরিয়া (gonorrhoea)গুম্বা হেন্না তোয়রক্লিবা ইনফেক্সনশীং অসি, এন্টিবাইওতিকশীং অসি ইফেক্টিভ ওইবা হন্থরকপনা মরম ওইদুনা লায়েংবদা হেন্না ৱারকই, অমসুং করিগুম্বা মতমদা ওইথোক্তবা ওইরকই।

এন্টিবাইওটিক অমসুং এন্টিমাইক্রোবাইএল রেসিষ্টেন্সগী মরক্তা লৈবা খেৎনবশীং

এন্তিবাইওটিক রেসিষ্টেন্স হায়রগা মরুওইনা ইনফেক্সনশিং থোকহল্লিবা কমন বেক্টেরিয়াদা থোক্লিবা এন্টিবাইওটিকশীংগী রেসিষ্টেন্স অদুবুনি। এন্টিমাইক্রোবাইএল রেসিষ্টেন্স অসিনা হেন্না চাউবা টর্ম অমনি, মসিনা পেরাসাইটশীং (খুদম ওইনা, মেলেরিয়া), ভাইরসশীং (খুদম ওইনা, HIV) অমসুং ফনজাই (খুদম ওইনা, কেনদিদা)গুম্বা অতৈ মাইক্রোবশীংনা থোকহনবা ইনফেক্সনশীং লাইয়েংবদা শীজিন্নরিবা দ্রগশীংদা রেসিষ্টেন্স লাকপবুসু কোনশিল্লি।

এন্টিবাইওটিক/ এন্টিমাইক্রোবাইএল রেসিষ্টেন্স লাকহনবগী মরমশীং

• এন্টিমাইক্রোবাইএল রেসিষ্টেন্স (AMR) লাকপা অমসুং শন্দোরকপসি মরুওইনা দোক্টরশীং, নর্সশীং অমসুং ফার্মাসিষ্টশীংনা এন্টিমাইক্রোবাইএলশীং অসি হেন্না শিজিন্নবা, লান্না শিজিন্নবা অমসুং অথীংবা লৈতনা পংশিদা শীজিন্নরকপা, অনাবশীংনা মশা মতোমতা শিজিন্নজবা অমসুং এনিমেল হজবেন্দরি অমসুং এগ্রিকলচরদা শিজিন্নরকপা অসিননি।
• এন্টিমাইক্রোবাইএলগী প্রেস্ক্রিপসনগী 70 - 80% দি হেলথ প্রোফেসনেলশীংনা মথৌ তাদনা এদভাইস তৌই। অয়াম্বা কমন কোল্ড অমসুং দাইরিয়া অসি ভাইরসনা থোকহনবনি খংলগসু এন্টিমাইক্রোবাইএলশীং অসি লেপ্তনা শীজিন্নরি। থাজবা ৱাৎপা, পিয়রগী প্রেসর (লেংমান্নবগী প্রেসর), পেসেন্টগী প্রেসর অমসুং ফার্মাসুটিকেল কম্পনিগী প্রেসরনা মরম ওইদুনা হেন্না প্রেস্ক্রাইব (over prescribing) তৌবগী থৌওং অসি লাকই।
• রেসিষ্টেন্স লাকপগী অতোপ্পা কমন ওইবা মরম অমদি লান্না দাইএগ্নোস (improper diagnosis) তৌবা অসিনি। অয়াম্বা মতমদা, অকোয়বদা মতিক চানা খুৎশু-খুৎলাই লৈবা দাইএগ্নোষ্টিক লেবোরেটরি লৈতবনা দোক্টর অদুবু অনাবা অদুগী ফিভম য়েংলগা এন্টিবাইওটিক অমহেক্তা পীবা তাহল্লকই, অমদি মসিনা অনাবা অদুদা অরানবা এন্টিবাইওটিক অমা চাহন্ননবগী ওইথোকপা হেনগৎহল্লি।
• মসিগী মথক্তা, মফম অয়াম্বদা এন্টিবাইওটিক মরাং কায়না ফংবা অমসুং ফার্মাসুটিকেল মেন্যুফেকচররশীংনা পায়খৎপা সেলস প্রোমোসন স্কিমশীং (sales promotion schemes)নসু মসি অথীংবা লৈতনা শিজিন্নবা হেলহল্লি, অমদি মসিনা রেসিষ্টেন্স লাকহনবা য়াবগী চাং হেলহল্লি।
• শাশিন্নবা হিদাকশীং (Counterfeit drugs) অসিসু রেসিষ্টেন্স লাকহনবগী থৌদাং লৌরিবা প্রোব্লেম অমনি। মখোয় অসিদা অরানবা মচাক (wrong ingredient), নত্ত্রগা এক্টিভ ওইবা মচাক (active ingredient) অদু চাং হন্থনা য়াউই। কেস খরদদি, মেদিকেসন পোইজননা দিসএবল ওইহনবা নত্ত্রগা শিবা ফাউবা থোকহনবা ঙম্মী। বগী মপাঙ্গল লৈ। গী হন্থবা চাং য়াউই।
• মিদিয়াগী ইম্পেক্ট অসিনসু রেসিষ্টেন্স লাক্নবগী মচাক ওই। অয়াম্বা মতমদা পেসেন্টশীংনা মখোয়গী অনাবগী এন্টিবাইওটিক অদু মখোয়না পারকপা নত্ত্রগা উরকপা এদভর্টিজমেন্টদা য়ুম্ফম ওইনা দিমান্দ তৌই।
• অহেনবা এক্টিভ দ্রগশীং সব-থেরাপ্যুটিক দোজশীংদা (sub therapeutic doses) খংদনা শিজিন্নবনা মল্টি দ্রগ রেসিষ্টেন্স হকথেংননা লাকহল্লি।

AMRগী ইষ্টাব্লিস তৌরবা মেকানিজমশীং

এন্টিবাইওটিক অমা ইফেক্টিভ ওইহন্নবগীদমক, মসিনা টার্গেট সাইট অদুদা এক্টিভ ফোর্মদা য়ৌবা, টার্গেট অদুদা তোংশিনবা, অমসুং মদুগী ফঙ্কসন্দা অকায়বা থোকহনবা তাই। মতৌ অসুম্না, এন্টিমাইক্রোবাইএল এজেন্ট অমদা বেক্টেরিএল রেসিষ্টেন্স অসি মখাদা পীরিবা মেকানিজম অহুম অসিদা থোকপা য়াই:

• দ্রগ অদুনা মদুগী টার্গেট য়ৌদবা: গ্রাম নেগেটিভ বেক্টেরিয়াদা (Gram negative bacteria), এন্টিবাইওটিক কয়ানা পোরিন (porins) কৌবা প্রোটিন চেনেলশীংগী খুত্থাংদা সেলদা চংই। ম্যুটেসননা নত্ত্রগা চেনেলশীং অসি মাংখিবনা সেল অমদা এন্টিবাইওটিক চংবগী খোংজেল থীংবা/ তপথহনবা ঙম্মী, অমদি মসিনা টার্গেট সাইট অদুদা দ্রগ তুংশিনবা হন্থহল্লি। করিগুম্বা দ্রগ টার্গেট অসি ইন্ত্রাসেলুলর ওইরবা অমসুং দ্রগ অদুনা সেল মেম্ব্রেন ফাউনা এক্টিভ ত্রান্সপোর্ট অমা মথৌ তারবদি, ত্রান্সপোর্ট মেকানিজমদা অকায়বা থোকহল্লিবা ম্যুটেসন অমনা রেসিষ্টেন্স পীরকপা য়াই, খুদম ওইনা, এমিনোগ্লাইকোসাইদ অসি পনবা য়াই। বেক্টেরিয়ানসু এন্তিমাইক্রোবাইএল দ্রগশীং অসি এফ্লক্স পম্পশীং (efflux pumps)গী খুত্থাংদা সেলগী মপান্দা পুথোকখিবা ঙম্মী। ফ্লুওরোক্যুইনোলোন, মেক্রোলাইদস, তেত্রাসাইক্লিনস অমসুং বেটা লেক্টম এন্টিবাইওটিক য়াউনা দ্রগ কয়ামুক্তা রেসিষ্টেন্স লাক্লিবসি মেকানিজম অসিননি।
• দ্রগ অদু ইনএক্টিভ ওইহনবা : এমিনোগ্লাইকোসাইদশীংদা বেক্টেরিএল রেসিষ্টেন্স লাক্লিবসি প্লাজমিদনা এনকোদ তৌবা এমিনোগ্লাইকোসাইদ-মোদিফাইয়িং এনজাইম (plasmid encoded aminoglycoside-modifying enzymes) অমনা থোকহনবা য়াই। মসিগা মান্ননা, β-লেক্টামেজ পুথোকপা অসিনা পেনিসিলিন অমসুং অতৈ β-লেক্টম দ্রগশীংদা রেসিষ্টেন্ট ওইবগী খ্বাইদগী কমন ওইবা মেকানিজমনি। হৌজিক্তি, তোঙান-তোঙানবা β-লেক্টামেজ চামা-চামা মশক খংদোক্লে। মেকানিজম অসি হোংদোক-হোংজিন (variation) নাইরিবসি বেক্টেরিএল সেল অদুনা প্রোদ্রগ অমা এক্টিভেট তৌবদা মায়পাক্তবননি। এম. ট্যুবরক্যুলোসিসনা আইসোনিয়াজিদ (INH) এক্টিভেট তৌবগী মপাঙ্গল মাংবগী থৌওংসি খুদম ওইনা পনবা য়াই।
• টার্গেট সাইট হোংদোকখিবা : মসি টার্গেট এনজাইমগী দ্রগ বাইন্দিং রিজনদা ম্যুটেসন থোকপনা ওইবা য়াই, খুদম ওইনা, ফ্লুওরোক্যুইনোলোন; টার্গেট মোদিফিকেসন, খুদম ওইনা, মাইক্রোলাইদশীংদা রেসিষ্টেন্সকী রাইবোজোমেল প্রোটেক্সন টাইপ লৈবা; অমসুং খুদোংথীরিবা টার্গেট (susceptible target)গী রেসিষ্টেন্ট ফোর্ম অমা লৌশিনবা (acquirement), খুদম ওইনা, লো-এফিনিটি পেনিসিলিন-বাইন্দিং প্রোটিন (PBP) অমা পুথোকপনা মরম ওইদুনা ষ্টেফাইলোকোকস Spp. (Staphylococcus Spp.)দা মেথিসিলিন রেসিষ্টেন্স লাকপা।

থীংবা অমসুং কন্ত্রোল তৌবা (Prevention and control)

এন্টিবাইওটিক রেসিষ্টেন্স অসি এন্টিবাইওটিক লান্না অমসুং কা-হেন্না শিজিন্নবা, অমদি ইনফেক্সনবু মতিক চানা থীংদবা অমসুং কন্ত্রোল তৌদবনা থোকহল্লি। মসিগী শাফু হন্থহন্নবা অমসুং রেসিষ্টেন্স শন্দোরকপগী লিমিট লৈহন্নবা সমাজগী থাক পুম্নমক্তা খোংথাং কয়া পায়খৎপা য়াই।

প্রজা মীয়াম্না মখাগীসি পাংথোক্তুনা মতেং পাংবা য়াই:

• খুৎ চাং নাইনা হামদোকপা, অফবা ফুদ হায়জিন লৌবা, অনাবা মীওইগা নক্না লোয়নদবা অমসুং ভেক্সিন মতম চানা কাপথোকপা।
• সর্টিফাই তৌরবা হেলথ প্রোফেসনেল অমদা প্রেসক্রাইব তৌরবখক্তদা এন্টিবাইওটিক শিজিন্নবা।
• মতম পুম্নমক্তা মপুংফাবা প্রেস্ক্রিপসন লৌবা।
• লেমহৌবা এন্টিবাইওটিকশীং কৈদৌঙৈদা শীজিন্নদবা।
• এন্টিবাইওটিকশীং মীওই অতৈগা পীথোক-পীশিন তৌদবা।

হেলথ ৱার্করশীং অমসুং ফার্মাসিষ্টশীংনা মখাগীসি পাংথোক্তুনা মতেং পাংবা য়াই:

• খুৎ-শা, খুৎশু-খুৎলাই (ইনষ্ট্রুমেন্ট) অমসুং অকোয়রোন্দু নান্না থমদুনা ইনফেক্সন থীংবা।
• পেসেন্টকী ভেক্সিনেসন অদু অপ টু দেট ওইহনবা।
• বেক্টেরিএল ইনফেক্সন অমা লৈরে হায়না চিংনরবদি, মদু কনফার্ম তৌনবগীদমক বেক্টেরিএল কলচর অমসুং টেষ্টিং পাংথোকপা।
• এন্টিবাইওটিক তশেংনা মথৌ তারবখক্তদা প্রেস্ক্রাইব তৌবা অমসুং পীবা।
• চানবা এন্টিবাইওটিক অদু চানবা দোজদা চানবা মতমগী ওইনা প্রেস্ক্রাইব তৌবা অমসুং পীবা।

পোলিসিমেকরশীংনা মখাগীসি পাংথোক্তুনা মতেং পাংবা য়াই:

• এন্টিবাইওটিক রেসিষ্টেন্স থীংনবা পাক-চাউবা নেসনেল এক্সন প্লান অমা শেম্বা।
• এন্টিবাইওটিক-রেসিষ্টেন্ট ইনফেক্সনশীংগী সর্ভিলেন্স হেন্না ফগৎহনবা।
• ইনফেক্সন থীংনবা অমসুং কন্ত্রোল তৌনবা থৌরাংশীং মপাঙ্গল কনখৎহনবা।
• ক্বালিটি মেদিসিনশীং চুনবা মওংদা শিজিন্ননবা রিগুলেসন শেম্বা অমসুং প্রোমোট তৌবা।
• এন্টিবাইওটিক রেসিষ্টেন্সকী ইম্পেক্টকী ইনফোর্মেসন মীয়ামদা ফংহনবা।
• অনৌবা লাইয়েংগী ওপশনশীং, ভেক্সিনশীং অমসুং দাইএগ্নোষ্টিকশীং শেমগৎপবু শকখংবীবা।

এগ্রিকলচরেল সেক্টরনা মখাগীসি পাংথোক্তুনা মতেং পাংবা য়াই:

• এন্টিবাইওটিকশীং অসি চিঞ্জাক পুথোক্লিবা অমসুং থবক শিজিন্নরিবা শাশীং য়াউনা, শাশীংদা শোয়দনা পীহনবা, অমদি মখোয় অসি লৌনগনবা লায়না লাইয়েংবখক্তদা ভেটরিনরি সুপরভিজনগী মখাদা শিজিন্নবা।
• এন্টিবাইওটিকশীংগী মথৌ তাবা হন্থহন্নবা শাশীংবু ভেক্সিন কাপথোকপা অমসুং পাম্বীশীংদা এন্টিবাইওটিক শিজিন্নদুনা মসিগী মহুৎ শিন্দোক্নবা হোৎনবা।
• শা অমসুং পাম্বীগী সোর্সশীংদগী চিঞ্জাক পুথোকপা অমসুং প্রোসেস তৌবগী খোংথাং পুম্নমক্তা অফবা প্রেক্টিসশীং এপ্লাই তৌবা অমসুং মসিবু প্রোমোট তৌবা।
• শাশীংবু হেন্না ফবা হায়জিন, বাইওসেক্যুরিটি অমসুং ষ্ট্রেস য়াউদনা হেন্দল তৌবগা লোয়ননা সষ্টেনেবল সিষ্টেমশীং শিজিন্নবা (Adopt)।
• এন্টিবাইওটিকশীং দায়ত্ব লৈনা শিজিন্ননবা OIE, FAO অমসুং WHOনা পীবা ইন্টরনেসনেল ষ্টেন্দর্দশীং ইমপ্লিমেন্ট তৌবা।

হেলথকেয়র ইন্দষ্ট্রিনা মখাগীসি পাংথোক্তুনা মতেং পাংবা য়াই:

• অনৌবা এন্টিবাইওটিকশীং, ভেক্সিনশীং অমসুং দাইগ্নোষ্টিক্সতা ইনভেষ্ট তৌবা।

এন্টিমাইক্রোবাইএল রেসিষ্টেন্সকী গ্লোবেল এক্সন প্লান

এন্টিবাইওটিক রেসিষ্টেন্স য়াউনা এন্টিমাইক্রোবাইএল রেসিষ্টেন্সকী মতাংদা শেম্বা গ্লোবেল এক্সন প্লান অমা, ইং 2015গী মে থাদা ৱার্ল্ড হেলথ এসেমব্লিনা অয়াবা পীখ্রে। গ্লোবেল এক্সন প্লান অসিনা সেফ অমসুং ইফেক্টিভ ওইবা মেদিসিননা লৌনগনবা লায়নাশীং থীংবা অমসুং লাইয়েংবা মখা চত্থহন্নবা পান্দম থম্লি। গ্লোবেল এক্সন প্লান অসিদা মপুং ওইবা পান্দম 5 য়াউরি:

• এন্টিমাইক্রোবাইএল রেসিষ্টেন্সকী এৱারনেস অমসুং অন্দরষ্টেন্দিং হেনগৎহনবা।
• সর্ভিলেন্স অমসুং রিসর্চ মপাঙ্গল কনখৎহনবা।
• ইনফেক্সন থোকপা হন্থহনবা।
• এন্টিমাইক্রোবাইএল মেদিসিনশীং খ্বাইদগী ফবা মওংদা শিজিন্নহনবা।
• এন্টিমাইক্রোবাইএল রেসিষ্টেন্স থেংনবদা সষ্টেনেবল ইনভেষ্টমেন্ট শোয়দনা লৈহনবা।

সোর্সশীং:

1. জেনেরেল ইনফোর্মেসন ওন এন্টিবাইওটিক্স এন্ড এন্টিবাইওটিক রেসিষ্টেন্স বাই সেন্ত্রেল দ্রগস ষ্টেন্দর্দ কন্ত্রোল ওর্গানাইজেসন (CDSCO)
2. এন্টিবাইওটিক রেসিষ্টেন্স – ফেক্ট শিট – ওক্টোবর 2015
3. নেসনেল পোলিসি ফোর কন্টেইনমেন্ট ওফ এন্টিমাইক্রোবাইএল রেসিষ্টেন্স