ৱাখল লৈতাদবা (এনজাইটি)

ৱাহৌদোক

এনজাইটি (ৱাখল লৈতাদবা) হায়বসি ৱাখল চরাংনবা অমসুং ৱাখল নুংঙাইতবগী মকা লামদবা (unpleasant) পুক্নিংগী মওং অমনি। মসিদা মহৌশানা অকিবা পোকপা অমসুং ৱাখল নুংঙাইতবা য়াউই। এনজাইটি দিসওর্দর অমনা মীওই অমদা মাং-তাক্নিংঙাই (devastating) ওইবা ঈথীল অমা পীবা ঙম্মী। মীওই অয়াম্বনা দিজিজ অসি থেংনৈ অমসুং অরোয়বদা দিপ্রেসন (পুক্নিং ৱাবা) থোকহল্লকই।

ৱার্নিং সিগনেল (চেক্সিন-খুদম) খরদি:

• কা হেন্না কিবা নত্ত্রগা অকিবা পোকপা (Intense fear or apprehension)।
• লৈতাফম খংদবা।
• য়াংনা/ লাইনা চোকথবা।
• তুম্বা য়াদবা।
• হকচাংগী অরুবা অমসুং চানিং-থক্নিংবা পোকপদা অকায়বা লৈরকপা।

সিম্পটম (লাইওং)

সিম্পটম খরগী মনুংদা মখাদা পীরিবশীংসি য়াউই:

• চোকথবা (Fatigue)।
• চিন কংবা।
• পুক য়েকপা (Abdominal cramps)।
• তুম্বা য়াদবা অমসুং কোক চিকপা।
• মসল চিংবা/ নাবা (Muscle tension) অমসুং মসল চিকপা।
• য়োৎপদা ৱাবা।
• হকচাং নিকপা অমসুং শাউনিংবা ফাউবা।
• মসল চিংবা (Twitching)।
• হুমাং থোকপা অমসুং খংশা শাবা (Sweating and hot flashes)।

মসি থোরকপগী মরমশীং

এনজাইটি থোরকপগী চপ চাবা মরম হৌজিক ফাউবা খংবা ঙমদ্রি।

রিসর্চর খরনদি এনজাইটি দিসওর্দর অসি ব্রেনদা য়াউবা অকক্নবা কেমিকেল ইম্বেলেন্স (খল মান্নদবা) অমা লৈরকপনা থোকহল্লকপনি হায়রি; কেমিকেলশীং অসিবু ন্যুরোত্রান্সমিটর হায়না খংনৈ।

এনজাইটি দিসওর্দরগী অতোপ্পা মরমশীংদি:

• মীওই কয়াদা, মখোয়গী পুন্সিদা অহোংবা কয়া, হায়বদি অনৌবা থবক পায়বা, লুহোংবা, অঙাং অমা লৈরকপা, মীওই অমগা কায়নবা অসিনচিংবা লাকপা মতমদা এনজাইটি অসি লাকই।
• হিদাক-লাংথক খরনসু এনজাইটি থোকহনবা য়াই। হিদাক-লাংথকশীং অসিগী মনুংদা এজমা লায়েংনবা ইনহেলর মেদিসিনশীং (inhaler medicines), থায়রোইদকী হিদাক, দাইট পিল, অসিনচিংবসি য়াউরি।
• কেফাইন, অলকোহোল অমসুং টোবেকো প্রদক্টশীং অসিনসু এনজাইটি থোকহনবা য়াই।

দাইগ্নোসিস (লায়না খংদোকপা)

মসি সাইন অমসুং সিম্পটমশীংদগী (খুদম অমসুং লাইওংশীংদগী) দাইএগ্নোস তৌবা (লায়না খংদোকপা) য়াই। সাইকিয়াত্রিক এভাল্যুএসননা লায়না অসি খংদোকপদা মতেং পাংই।

মেনেজমেন্ট

এনজাইটি অসি সাইকিয়াত্রিক থেরাপি, মেদিকেসন (হিদাক-লাংথক চাবা), নত্ত্রগা অনিমক্না লায়েংবা ঙম্মী।

সাইকিয়াত্রিক থেরাপি: থেরাপি মখল অসিবু কোগনিটিভ বিহেবিয়র থেরাপি (cognitive behavior therapy) হায়না খংনৈ অমসুং মসি মরুওইনা এনজাইটি লাইয়েংবদা য়াম্না কান্নৈ। মসিনা মীওই অমবু তোঙান-তোঙানবা মওংদা ৱাখল খনবদা, লমচৎ-শাজত্তা, অমসুং ফিভম অমহেক্তা থেংনবদা মতেং পাংদুনা মহাকপু পুক্নিং ৱাবা হন্থহনবা অমসুং পুক্নিং চরাংনবা হন্থহনবদা মতেং পাংই।

মেদিকেসন (হিদাক লাংথক চাবা): করিগুম্বা মতমদা এনজাইটি লায়েংবদা মতেং পাংনবা দোক্টরশীংনা হিদাক-লাংথক প্রেস্ক্রাইব তৌরকপা য়াই। মখোয়না এন্টি-এনজাইটিগী হিদাকশীং অমসুং এন্টিদিপ্রেসেন্ট হায়বা হিদাক মখল অনি অসি পীরকপা য়াই। এন্টি-এনজাইটিগী হিদাকশীং অসি মপাঙ্গল কল্লি অমসুং মখল কয়ামুক লৈ। মখল কয়াদি খুদক্তা মথৌ তৌবা হৌই, অদুবু মহৌশানা মখোয় অসি মতম শাংনা চাবদি তৌরোইদবনি।

এন্টিদিপ্রেসেন্টশীং অসি দিপ্রেসন লায়েংবদা শিজিন্নৈ, অদুবু মখোয় অসি এনজাইটিদসু কান্নৈ। মখোয় অসিনা মথৌ তৌবা হৌবদা চয়োল কয়ামুক চংবা য়াই। হিদাকশীং অসিনা কোক চিকপা, ওনিংবা নত্ত্রগা তুম্বা য়াদবনচিংবা সাইদ ইফেক্টশীং থোকহল্লকপা য়াই।

এন্টিদিপ্রেসেন্টশীং অসি মীওই কয়াগী ওইনা সেফ অমসুং ইফেক্টিভ ওইরবসু মীওই খরদদি, মরুওইনা অঙাংশীং, ইনখৎলকপশীং অমসুং নহারোলশীংদদি রিস্ক লৈবসু য়াই। মরম অদুনা মসি দোক্টরগী পাউতাক মতুংইন্না চাগদবনি।

প্রিভেনসন (থীংবা)

হৌজিক্কী মতমদা, মীওই খুদিংমক্তা ষ্ট্রেস (পুক্নিং লৈতাদবা) লৈ। মীওই অমনা যোগা, মেদিটেসন, গেমস অমসুং ম্যুজিকনচিংবা এক্টিভিটিশীং অসি ষ্ট্রেস লৈহন্দবগীদমক পাংথোকপা য়াই।

মসিগী মথক্তা, মীওই অমনা মহাক্কী অহাংবা মতম অদু শীজিন্ননবা হোবি (hobby) খরা শেম্নবা হোৎনগদবনি।

সোর্স: নেসনেল হেলথ পোর্টেল