দাইএবেটিজ – মচং ওইবশীং

দাইএবেটিজ হায়বসি করিনো?

দাইএবেটিজ হায়বসি মীওই অমনা হায় ব্লদ সুগর লৈবা মতমদা ঈদা য়াউরিবা গ্লুকোজ নত্ত্রগা মেটাবোলিক দিজিজগী গ্রুপ অমবু প্রোসেস তৌনবা মতিক চাবা ইনসুলিন পুথোকপা ঙমদবা ফিভম অদুবুনি। মতৌ করম্না হকচাংনা চিঞ্জাকপু এনর্জি ওন্থোকপগে অমসুং দাইএবেটিজ লৈরকপা মতমদা করম্বা অহোংবশীং লাকপগে হায়বদু মখাদা শন্দোক্না তাক্লি।

• চিঞ্জাক অসি গ্লুকোজদা ওনখি: ঐখোয়না চাশিনখিবা চিঞ্জাক অসি সুগরগী মওং অমা ওইরিবা গ্লুকোজ কৌবা ফ্যুএল (fuel) অমদা চাকখাউনা (stomach) ওন্থোকখি। গ্লুকোজ অসি ঈগী ঈচেলদা য়াউশিনখি অমসুং হকচাংদা য়াউরিবা সেল মিলিয়ন কয়াদা পূখি।
• গ্লুকোজ অসি সেলশীংদা চংশিনখি: পেনক্রিএজ (pancreas) কৌবা ওর্গান অমনা ইনসুলিন কৌবা কেমিকেল শেম্মী। ইনসুলিন অসিসু ঈগী ঈচেলদা য়াউশিনখি অমসুং সেলশীংদা চংখি। মসিনা গ্লুকোজগা পুনশিন্দুনা মসিবু সেলশীংদা চংবা ঙমহল্লি।
• সেলশীংনা গ্লুকোজ অসি এনর্জিদা ওন্থোকই: হকচাংগী এনর্জি পীনবগীদমক সেলশীংনা গ্লুকোজ অসি মেটাবোলাইজ (চাকথেকপা) তৌই।

দাইএবেটিজ লৈরবদি হকচাংদা করি অহোঙবা লাকপা য়াবগে?

• দাইএবেটিজনা চিঞ্জাক্তগী হকচাংনা এনর্জি ফংবদা হেন্না অরুবা ওইহল্লি।
• চিঞ্জাক অসি গ্লুকোজদা ওন্থোকই : ঐখোয়না চাশিল্লিবা চিঞ্জাক অসি চাকখাউনা গ্লুকোজদা লেপ্তনা ওন্থোকই। গ্লুকোজনা ঈগী ঈচেলদা চংশিনখি। অদুবু অয়াম্বা গ্লুকোজনদি সেলশীংদা চংবা ঙমদবা য়াই, মরমদি:

1. মফমদুদা ইনসুলিন মতিক চানা য়াউরমদবা য়াই।
2. মফমদুদা ইনসুলিন মরাং কায়না য়াউরম্বা য়াই অদুবু মদুনা রিসেপ্টরশীং (receptors)বু অনলোক তৌবা ঙম্লোই।
3. গ্লুকোজ পুম্নমক্তু চংনবা রিসেপ্টরগী মশীংদু মতিক চানা য়াম্লম্লোই।

• সেলশীংনা এনর্জি শেম্বা ঙম্লোই: গ্লুকোজ অয়াম্বদি ঈগী ঈচেলদা লেংদনা লৈ (stays)। মসিবু হায়পরগ্লিসেমিয়া (হায় ব্লদ গ্লুকোজ নত্ত্রগা হায় ব্লদ সুগর হায়নসু খংনৈ) হায়না কৌই। সেলশীংদা গ্লুকোজ মতিক চানা য়াউদনা, হকচাংনা অপন-অরাক য়াউদনা লৈনবগী মথৌ তাবা এনর্জি অদু সেলশীংনা শেম্বা ঙমদে।

দাইএবেটিজগী মখলশীং

দাইএবেটিজগী মরুওইবা মখল অহুম লৈ:

টাইপ 1 দাইএবেটিজ: মসিবু জুবেনাইল-ওনসেট দাইএবেটিজ (juvenile-onset diabetes) হায়না কৌনৈ। মসি মহৌশানা ওটো-ইম্যুন রিএক্সন অমনা থোকহল্লি অমসুং মসিদা হকচাংনা ঙাকথোক্ননবগী সিষ্টেমনা ইনসুলিন পুথোক্লিবা সেলশীংদা এটেক তৌই। মসি থোক্লকপগী মরম অসি মপুংফানা খংবদি ঙমদে। টাইপ 1 দাইএবেটিজনা নারবা মীওইশীংদা ইনসুলিন অসি খজিক্তমক পুথোকই নত্ত্রগা শুংপু পুথোক্তে। লায়না অসিনা নহা-অহল খায়দনা নাহনবা য়াই, অদুবু মসি মহৌশানা অঙাংশীংদা নত্ত্রগা মপুং-মরৈ ফারকপা নহাশীংদনা হেন্না নাগল্লি। দাইএবেটিজ মখল অসিনা নাবা মীওইশীংদা মখোয়গী ঈদা য়াউরিবা গ্লুকোজগী লেভেল কন্ত্রোল তৌনবগীদমক নুমিৎ খুদিংগী ইঞ্জেক্সন কাপ্পা মথৌ তাই। টাইপ 1 দাইএবেটিজনা নাবা মীওইশীংদা ইনসুলিন ফংহন্দ্রবদি মখোয় শোয়দনা শীগনি।

টাইপ 2 দাইএবেটিজ: মসিবু নন-ইনসুলিন দিপেন্দেন্ট দাইএবেটিজ নত্ত্রগা এদল্ট ওনসেট দাইএবেটিজ (adult-onset diabetes) হায়না কৌনৈ অমসুং দাইএবেটিজগী অপুনবা কেসশীংগী মনুংদা য়ামদ্রবদা 90% দি মখল অসিগীনি। মসি ইনসুলিন রেসিষ্টেন্স অমসুং রিলেটিভ ইনসুলিন দিফিসিএন্সিনা মশক তাকই, অমসুং দাইবেটিজগী লাইওং খংদোকপা মতমদা, অনি অসিগী মনুংদগী অমা নত্ত্রগা অনিমক লৈবা য়াই। টাইপ 2 দাইএবেটিজগী লাইওং অসি চহি অমহেক্তদা উৎলকপা য়াই। টাইপ 2 দাইএবেটিজ অসি চহি কয়া খংদোকপা ঙমদনা লৈবা য়াই অমসুং কমপ্লিকেসন থোরক্লবা মতমদা নত্ত্রগা রুটিন ব্লদ নত্ত্রগা য়ুরিন গ্লুকোজ টেষ্ট অমা তৌবা মতমদা লাইওং অসি খংগল্লি। মসি মতম চুপ্পদদি নত্তবা, অদুবু য়াম্না তোইনা, ইনসুলিন রেসিষ্টেন্স অমসুং হায় ব্লদ গ্লুকোজ লেভেল লৈহল্লকপা য়াবা, হকচাংগী অরুবা হেনবা নত্ত্রগা কা-হেন্না নোইবা (overweight or obesity) হায়বসিগা লোয়নগল্লি। টাইপ 2 দাইএবেটিজগা লোয়নরিবা মীওইশীংনা মখোয়গী কন্দিসন অসি, হৌরকপা মতমদদি এক্সরসাইজ অমসুং দাইটনা মেনেজ তৌবা ঙমগল্লি। অদুম ওইনমক, কুইশিল্লক্লবা মতুংদদি মীওইশীং অসিনা ওরেল দ্রগ অমসুং নত্ত্রগা ইনসুলিন মথৌ তারক্কনি।

টাইপ 1 অমসুং টাইপ 2গী দাইএবেটিজ অনিমক শাথীবা ওই। খজিক্তং কনবা দাইএবেটিজ হায়বগুম্বা অমত্তা লৈতে।

জেষ্টেসনেল দাইএবেটিজ (GDM) হায়বসি মীরোল্লিঙৈ মতমদা লৈগনবা হায় ব্লদ গ্লুকোজ লেভেলশীং য়াউবা দাইএবেটিজগী মওং অমনি। মসি পৃথীবীগী ওইনা মীরোনবা 25 লৈবগী মনুংদা অমদা থোক্কল্লি অমসুং মমা অমসুং মচা অনিমক্তা কমপ্লিকেসন লৈগল্লি। মহৌশানা GDM অসি মীরোনবা মতুংদা মাংজগল্লি অদুবু GDMগা লোয়নবা নুপীশীং অমসুং মখোয়গী মচাশীংদা, মখোয়গী তুংগী পুন্সিদা টাইপ 2 দাইএবেটিজ লাকপগী অহেনবা রিস্ক অমদি লৈগল্লি। চাউরাক্না, GDMগী হিষ্টরি অমগা লোয়নবা নুপীশীংগী শরুক তংখায়মুক্তদি, অঙাং পোকপা মতুং চহি মঙাদগী তরা ফাউবগী মনুংদা টাইপ 2 দাইএবেটিজ লাক্কল্লি।

অতৈ অকক্নবা মখল খরগী দাইএবেটিজসু লৈরি।

দাইএবেটিজগী কমপ্লিকেসনশীং

দাইএবেটিজগা লোয়নরিবা মীওইশীংদা শাথীরবা হকশেলগী প্রোব্লেম কয়া লাক্নবগী অহেনবা রিস্ক অমা লৈ। ব্লদ গ্লুকোজ লেভেল লেপ্তনা ৱাংনা লৈবনা হার্ট অমসুং ব্লদ ভেসেলশীং, মীৎ, কিদনি, নর্ভ অমসুং য়াদা শোকহন্দুনা শাথীবা লায়নাশীং লৈহল্লকপা য়াই। মসিগী মথক্তা, দাইএবেটিজনা শোকহল্লবা মীওইশীংদা ইনফেক্সনশীং লৈরকপগী অহেনবা রিস্ক অমসু লৈ। ইনকম ৱাংবা লৈবাক অয়াম্বদা কার্দিওভাস্কুলার দিজিজ, ব্লাইন্দনেস, কিদনি ফেল ওইবা অমসুং খুউ মখা ককপা থৌওং থোকহল্লিবা মরুওইবা মরম অসি দাইএবেটিজনা ওইরি।

ব্লদ গ্লুকোজ লেভেল, ব্লদ প্রেসর, অমসুং কোলেষ্টেরোল অসিবু নোর্মেলদা নত্ত্রগা মসিগী ময়া নক্না থম্বনা দাইএবেটিজগী কমপ্লিকেসনশীং থেংথহনবা নত্ত্রগা থীংবদা মতেং পাংবা ঙম্মী। মরম অদুনা দাইএবেটিজ লৈরবা মীওই অমদা চাং নাইনা মোনিটর তৌবা মথৌ তাই।

কার্দিওভাস্কুলার দিজিজ: মসিনা হার্ট অমসুং ব্লদ ভেসেলশীংবু শোকহল্লি অমসুং কোরোনেরি আর্টেরি দিজিজ (মসিনা হার্ট এটেক থোকহনবা য়াই) অমসুং ষ্ট্রোক অসিগুম্বা মী শিহনবা য়াবা কমপ্লিকেসনশীং থোকহল্লকপা য়াই। কার্দিওভাস্কুলার দিজিজ অসি দাইএবেটিজনা নাবা মীওইশীংবু শিহনবা খ্বাইদগী কমন ওইবা মরম্নি। হায় ব্লদ প্রেসর, হায় কোলেষ্টেরোল, হায় ব্লদ গ্লুকোজ অমসুং অতৈ রিস্ক ফেক্টরশীংনা কার্দিওভাস্কুলার কমপ্লিকেসনশীংগী রিস্ক হেনগৎহনবদা মতেং পাংই।

কিদনিগী লায়না (দাইএবেটিক নেফ্রোপেথি): মসি কিদনিদা লৈরিবা অপিকপা ব্লদ ভেসেলশীংদা অমাং-অতা থোকহনবদগী কিদনিশীং মথৌ ফজনা তৌরক্তবা নত্ত্রগা মপুংফানা ফেল ওইখিবদগী থোক্লকপনি। কিদনিগী লায়না অসি দাইএবেটিজ লৈতবা মীওইশীংদগীদি দাইএবেটিজ লৈবা মীওইশীংদনা হেন্না কমন ওই। ব্লদ গ্লুকোজ অমসুং ব্লদ প্রেসরবু নোর্মেল লেভেলদা থম্বনা কিদনিগী লায়নাগী রিস্ক ফনা য়াম্না হন্থহনবা ঙম্মী।

নর্ভকী লায়না (দাইএবেটিক ন্যুরোপেথি): ব্লদ গ্লুকোজ অমসুং ব্লদ প্রেসর কা হেন্না ৱাংলবদি দাইএবেটিজনা হকচাং শিনবা থুংনা নর্ভশীংদা অমাং-অতা থোকহল্লকপা ঙম্মী। মসিনা দাইজেসন, ইরেক্টাইল দিসফঙ্কসন অমসুং অতৈ ফঙ্কসন কয়াদা প্রোব্লেম থোকহল্লকপা য়াই। খ্বাইদগী হেন্না কমন ওইনা শোকহনবা মফমশীংগী মনুংদা খোং-খুৎ অসিসু অমনি অমদি মসি মরুওইনা খোংদা শোকহল্লি। মফমশীং অসিদা থোকহনবা নর্ভকী অমাং-অতাশীংবু পেরিফরেল ন্যুরোপেথি (peripheral neuropathy) হায়না কৌই, অমসুং মসিনা নাবা, চিক-চিক লাউবা অমসুং উনশাদা থেংবদা খংদবা (loss of feeling) অসিনচিংবা থোকহনবা য়াই। উনশাদা থেংবদা খংদবসি য়াম্নমক মরুওই মরমদি মসিনা অশোক-অপন থোক্লকপদা খংবা ঙমহন্দে, অমদি মসিনা শাথীবা ইনফেক্সনশীং থোকহন্দুনা খোং ককপা (amputations.) য়াবগী ওইথোকপা লৈহল্লি। দাইএবেটিজ লৈতবা মীওইশীংদগী শরুক 25 হেন্না দাইএবেটিজ লৈবা মীওইদনা খোং ককপগী রিস্ক অমা লোয়নদুনা লৈ। অদুম ওইনমক, মওং চুম্না মেনেজ তৌদুনা, খোং ককপগী থৌওং অয়াম্বা থীংবা ঙম্মী। করিগুম্বা খোং ককপগী থৌওং লৈখ্রফাউবদা লেমহৌরিবা খোং অমসুং মীওই অদুগী পুন্সিদু মল্টিদিসিপ্লিনরি টিম অমদগী অফবা ফোলো-অপ কেয়র অমা লৌদুনা কনবা য়াই। দাইএবেটিজগা কোন্নরিবা মীওইশীংনা মখোয়গী মখোংশীং অদু চাং নাইনা য়েংথোক্কদবনি।

মীৎকী লায়না (দাইএবেটিক রেটিনোপেথি): দাইএবেটিজনা শোকহল্লবা মীওই অয়াম্বদা মীৎকী লায়নাগী (রেটিনোপেথি) মওং খরদি লাক্কল্লি অমসুং মদুনা উবগী চাং হন্থহনবা নত্ত্রগা মীত্তাংবগী থৌওং লৈহল্লি। হায় ব্লদ প্রেসর অমসুং হায় কোলেষ্টেরোলগা লোয়ননা ব্লদ গ্লুকোজ লেপ্তনা ৱাংনা লৈরকপা অসিনা রেটিনোপেথিগী মপুং ওইবা মরমশীংনি। মীৎ চাং নাইনা চেক তৌদুনা অমসুং গ্লুকোজ অমসুং লিপিদ লেভেলশীং নোর্মেলদা নত্ত্রগা মসিগী ময়া নক্না থমদুনা মসিবু মেনেজ তৌবা য়াই।

মীরোনবগী কমপ্লিকেসনশীং: মীরোল্লিঙৈ মতমদা দাইএবেটিজ মখল অমহেক্তা লৈখিবা নুপীশীংদা, করিগুম্বা মখোয়না মখোয়গী কন্দিসন অদু কুপ্না মোনিটর অমসুং মেনেজ তৌহৌদ্রবদি কমপ্লিকেসন কয়া লাক্নবগী রিস্ক লৈগল্লি। ফিটস (fetus) তা অকায়-অতোয় লৈহল্লকপা য়াবদু থীংনবগীদমক, টাইপ 1 দাইএবেটিজ নত্ত্রগা টাইপ 2 দাইএবেটিজ নাবা নুপীশীংনা মীরোন্দ্রিঙৈ মমাংদা টার্গেট গ্লুকোজ লেভেল লৈহন্নবা হোৎনগদবনি। মীরোল্লিঙৈ মতমদা টাইপ 1, টাইপ 2 নত্ত্রগা জেষ্টেসনেল দাইএবেটিজ লৈবা নুপী পুম্নমক্না, কমপ্লিকেসন লাকপা হন্থহন্নবগীদমক টার্গেট ব্লদ গ্লুকোজ লেভেলশীং ফংনবা হোৎনগদবনি। মীরোল্লিঙৈ মতমদা হায় ব্লদ গ্লুকোজ লৈবনা ফিটসতা অহেনবা অরুম্বা (excess weight) লৈহল্লকপা য়াই। মসিনা অঙাং উনবা মতমদা প্রোব্লেম থোকহনবা য়াই, অমসুং অঙাং অমদি মমাদা ত্রোমা (trauma) লৈহনবা, অমসুং পোক্লবা মতুংদা অঙাং অদুগী ব্লদ গ্লুকোজদু খংহৌদনা লেপখিবনচিংবগী থৌওংশীং থোকহনবা য়াই। হায় ব্লদ গ্লুকোজগা লোয়ননা মতম শাংনা অঙাং খাউদা (womb) লৈরকপা অঙাংশীংদা তুংদা দাইএবেটিজ লাক্নবগী অহেনবা রিস্ক লৈগল্লি।

রিস্ক ফেক্টরশীং

টাইপ 1 দাইএবেটিজগী রিস্ক ফেক্টরশীং অসি হৌজিক ফাউবা খংদোক্নবা হোৎনরি। অদুম ওইনমক, টাইপ 1 দাইএবেটিজ নাবা ইমুংগী মীওই অমা লৈবনা লায়না অসি লাক্নবগী রিস্ক অসি খজিক্তং হেনগৎহল্লি। অকোয়রোনগী ফেক্টর অমসুং ভাইরেল ইনফেক্সন খরদা এক্সপোজ তৌবা হায়বসিসু টাইপ 1 দাইএবেটিজ লাকহন্নবগী রিস্ক লৈরকপগা মরি লৈনৈ।

রিস্ক ফেক্টর কয়া অমদি টাইপ 2 দাইএবেটিজগা লোয়নদুনা লৈ অমসুং মখোয়দুগী মনুংদা মখাদা পীরিবশীংসি চল্লি:

• দাইএবেটিজগী ফেমিলি হিষ্টরি লৈবা।
• হকচাং লুম্বা হেনবা।
• হকশেল ফরোইদবা দাইট।
• ফিজিকেল ইনএক্টিভিটি।
• চহি য়ামশিল্লকপা।
• হায় ব্লদ প্রেসর।
• ইথনিসিটি (Ethnicity)।
• ইম্পায়ার্দ গ্লুকোজ টোলরেন্স (IGT)* লৈবা।
• জেষ্টেসনেল দাইএবেটিজগী হিষ্টরি লৈবা।
• মীরোল্লিঙৈ মতমদা অফবা ন্যুত্রিসন লৈখিদবা।

ইম্পায়ার্দ গ্লুকোজ টোলরেন্স (IGT) হায়বসি নোর্মেল ব্লদ গ্লুকোজদগী হেন্না ৱাংখৎপা অদুবু দাইএবেটিজ লৈরে হায়না লৌগদবা চাংদুগীদি মখা ওইবা কেটেগোরি অমনি।

খোংজেল য়াংবা দিভেলপমেন্ট অমসুং অর্বানাইজেসনগা মরি লৈননা দাইট অমসুং ফিজিকেল এক্টিভিটিদা অহোংবা লৈরকপনা দাইএবেটিজনা নাবা মীওইশীংগী মশীং অসি য়াম্না হেনগৎহল্লি।

অরুম্বা হেনবা মীরোনবী নুপীশীংদা ইম্পায়ার্দ গ্লুকোজ টোলরেন্স (IGT), নত্ত্রগা দাইএবেটিজগী ফেমিলি হিষ্টরি লৈবশীংদনা জেষ্টেসনেল দাইএবেটিজ (GDM) লৈরক্নবগী রিস্ক হেনগৎলি। মসিগী মথক্তা, মমাংদা জেষ্টেসনেল দাইএবেটিজ লৈখিবা নত্ত্রগা অকক্নবা মীওই কাংলুপ (ethnic groups) অমগী মনুং চনবা মীওইশীংদা GDM লাক্নবগী অহেনবা রিস্ক লৈগল্লি।

দাইএবেটিজগী খুদম অমসুং লাইওংশীং

মীওই অমদা দাইএবেটিজগী তোঙান-তোঙানবা খুদম অমসুং লাইওংশীং লৈবা য়াই, অমসুং করিগুম্বা মতমদা খুদম অমত্তা ফংদবসু য়াই।

য়াম্না তোইনা থেংনবা খুদম খরগী মনুংদা মখাদা পীরিবশীংসি চল্লি:

1. তোইনা মপান থোকপা।
2. ঈশীং কা-হেন্না খৌরাংবা।
3. চাক লাম্বা হেনগৎপা।
4. হকচাংবা অরুম্বা হন্থবা।
5. চোকথবা।
6. হরাউ-তয়াম্বা অমসুং পুক্নিং-চংবা ৱাৎপা।
7. খোং-খুত্তা চিক-চিক লাউবা নত্ত্রগা পংশিনবা।
8. মশেল-মরাং ওইনা উবা।
9. তোইনা ইনফেক্সন লৈবা।
10. অশোক-অপন ওইশীনবদা মতম চংবা।
11. ওবা অমসুং চাকখাউ নাবা (অরুম লাইহৌগা মরি লৈনৈ হায়না তোইনা লান্না লৌনবা)।

টাইপ 1 দাইএবেটিজ লৈরকপা অসি মহৌশানা খংহৌদনা অমসুং থাজদনা থোক্কল্লি অমসুং টাইপ 2 দাইএবেটিজনা নাবা মীওইশীংদদি লাইওংশীং অসি খজিক্তং নত্ত্রগা করিমত্তা উত্তবসু য়াউই, মরম অসিনা দাইএবেটিজ মখল অসিদি খংদোকপদা য়াম্না লুবা ওইহল্লি।

করিগুম্বা নঙোন্দা খুদম অমসুং লাইওংশীং অসি লৈরবদি, দোক্টর অমগা তান্নৌ।

সোর্স: পোর্টেল কন্টেন্ট টিম