ফেট অমসুং কোলেষ্টেরোল

সেচুরেটেদ অমসুং অনসেচুরেটেদ ফেটশীং(Saturated&unsaturated fats)

সেচুরেটেদ ফেটশীং অসি শাগী প্রদক্টশীং অমসুং মীট, শঙ্গোমগী প্রদক্টশীং, চিপ অমদি পাষ্ট্রিগুম্বা প্রোসেস তৌরবা চিঞ্জাকশীংদা ফংই। সেচুরেটেদ ফেট অমগী কেমিকেল ষ্ট্রকচর অসি হায়দ্রোজেন এটোমশীংনা মপুং ফানা সেচুরেট তৌই, অমসুং কার্বোন এটোমশীংগী মরক্তা দবল বোন্দশীং য়াউদে। সেচুরেটেদ ফেটশীং অসি হার্টকী ওইনদি অফবা ওইদে, মরমদি মখোয় অসিনা নহাক্কী লো দেন্সিটি লিপোপ্রোটিন(LDL) কোলেষ্টেরোল (“ফত্তবা” কোলেষ্টেরোল) হেনগৎহনগনি।

নাকল অমরোমদা অনসেচুরেটেদ ফেটশীং অসিদি নট(nuts),এভোকেদো(avocados)অমসুং ওলিভনচিংবা চিঞ্জাকশীংদা ফংই। মখোয় অসি রুম টেম্পেরেচরদা লিক্যুইদ ওই অমসুং মখোয়গী কেমিকেল ষ্ট্রকচরদা দবল বোন্দ য়াউবা মরম্না সেচুরেটেদ ফেটশীংগসু খেৎনৈ। মসিগী মথক্তা, অনসেচুরেটেদ ফেটশীং অসি হার্টকীদমকসু ফৈ হায়না থীজিন-হুমজিনবদগী খংবা ঙম্লে মরমদি মখোয়না LDL কোলেষ্টেরোল নেমথহন্নবগী অমসুং হায় দেন্সিটি লিপোপ্রোটিন(HDL)কোলেষ্টেরোল(“অফবা” কোলেষ্টেরোল) ৱাংখৎহন্নবগী মপাঙ্গল লৈ।

অনসেচুরেটেদ অমসুং সেচুরেটেদ ফেটশীংগী মরক্তা লৈবা খেৎনবশীং

চিঞ্জাক্তা ফংলিবা ফেটশীংগী মরুওইবা মখল অনি ওইরিবা সেচুরেটেদ ফেট অমসুং অনসেচুরেটেদ ফেটশীংগী মরক্তা লৈবা খেৎনবশীং খংজিনবনা নহাক্কী কোলেষ্টেরোল হন্থহনবদা মতেং পাংগনি। অনসেচুরেটেদ ফেট অমসুং সেচুরেটেদ ফেট অনিমক চিঞ্জাক মখল কয়াদা য়াউরবসু, ফেটশীং অসি চপ মান্ননা য়াউবদি নত্তে। অনসেচুরেটেদ ফেটশীং অসিনা নহাক্কী হার্টতা কান্নবা পীবা য়াই অদুগা সেচুরেটেদ ফেটশীং অসিনা নহাক্কী কোলেষ্টেরোল অমসুং নহাক্কী হার্টতা অমাংবা পীবা য়াই।

মরম অদুনা, করিগুম্বা নহাক্না কোলেষ্টেরোল নেমথহনগদবা দাইট অমা চাগে হায়না খনবা ওইরবদি, অনসেচুরেটেদ ফেটশীং চাবনা নহাক্কী কোলেষ্টেরোল লেভেল অদু মখা তানা ৱাংখৎহল্লোইদবনি। অদুম ওইনমক, নহাক্না ৱাংনা সেচুরেটেদ ওইবা চিঞ্জাকশীং চারোইদবনি।

মোনো-অনসেচুরেটেদ অমসুং পোলি-অনসেচুরেটেদ ফেটশীংগী মরক্তা লৈবা খেৎনবশীংদু করি-করিনো?

হার্ট ফগৎহল্লি হায়না প্রমাণ তৌরবা অনসেচুরেটেদ ফেটশীং অসি মোনোঅনসেচুরেটেদ অমসুং পোলিঅনসেচুরেটেদ ফেট হায়না মরুওইবা কেটেগোরি অনিদা খায়দোকপা য়াই। মোনোঅনসেচুরেটেদ অমসুং পোলিঅনসেচুরেতেদ ফেটশীংগী মরক্তা লৈবা খেৎনবশীং অসি মখোয়গী ষ্ট্রকচরশীংদনি। মোনোঅনসেচুরেটেদ ফেটশীংদা দবল বোন্দ অমা মখোয়গী ষ্ট্রকচরশীংদা য়াউই। নাকল অমরোমদা, পোলিঅনসেচুরেটেদ ফেটশীংদা অনি নত্ত্রগা মসিদগী হেনবা দবল বোন্দশীং মখোয়গী ষ্ট্রকচরদা য়াউই। সেচুরেটেদ ফেট অমসুং ত্রান্স ফেটশীং অসি মোনোঅনসেচুরেটেদ অমসুং পোলিঅনসেচুরেটেদ ফেটশীংনা মরুওইনা য়াউবা চিঞ্জাকশীংনা মহুৎ শিন্দোকপনা নঙোন্দা হার্টকী লায়না নাহনবদগী ঙাকথোকপদা মতেং পাংগনি। হিরম অসিদা মোনোঅনসেচুরেটেদ ফেটশীংদগীদি পোলিঅনসেচুরেটেদ ফেটশীংনা হেন্না ফৈ হায়বগী প্রমাণ য়াম্না লৈ।

নেসনেল কোলেষ্টেরোল এজুকেসন প্রোগ্রামগী মতুংইন্না, পোলিঅনসেচুরেটেদ ফেটশীংদা নহাক্কী নোংমগী লৌশিল্লিবা কেলোরিগী 10% ফাউবা য়াউবা য়াই। পোলিঅনসেচুরেটেদ ফেটশীং অসি নট, ভিজিটেবল ওইল (কোর্ন ওইল, সফ্লোৱর ওইল)গুম্বা চিঞ্জাকশীংদগী ফংই।

কোলেষ্টেরোল হায়বসি করিনো?

কোলেষ্টেরোল হায়বসি মরুওইনা লিভরদা পুথোকপা অদুবু ঐখোয়না চারিবা চিঞ্জাকশীংদসু ফংবা ফেটকা মান্নবা পোৎশক (fat-like substance) অমনি। ঐখোয়না মথৌ তারিবা কোলেষ্টেরোল পুম্নমক হকচাংনা পুথোকই অদুবু   ঐখোয়না করিগীদমক্তা কোলেষ্টেরোল মথৌ তারিবনো? কোলেষ্টেরোলনা মখাদা পীরিবশীংসি য়াউনা মরুওইবা ফঙ্কসন কয়ামুক পাংথোকই:

• সেল মেম্ব্রেনশীং শেম্বা অমসুং থমজিনবা (formation and maintenance)।
• সেক্স হোর্মোনশীং শেম্বা।
• চিঞ্জাকশীং তুমহনবদা মতেং পাংলিবা বাইল সোল্ট পুথোকপা।
• ভিটামিন D পুথোকপা।

নোংমদা নহাক্না লৌশিনবা মথৌ তারিবা কোলেষ্টেরোলগী চাং অদু কয়ানো?

নহাক্কী হকচাংদা কোলেষ্টেরোলগী চাং য়াম্না য়াউবনা নহাক্কী হকশেলদা ফত্তবা ওইরবসু মসি নহাক্কী হকচাংদা লৈবা য়াম্না মরুওইবা কম্পাউন্দ অমদি ওই। কোলেষ্টেরোলনা মরম ওইদুনা হকচাংনা থৌওং কয়া পাংথোকপা ঙম্লিবনি।

খুদম ওইনা হায়রবদা, কোলেষ্টেরোল অসি সেক্স অমসুং ষ্টেরোইদ হোর্মোনশীংগী মরুওইবা শেম্নবা মচাক (precursor) অমনি। কোলেষ্টেরোল অসি সেল মেম্ব্রেনগী মরুওইবা কম্পোনেন্ট অমা ওইবা মরমনা মসিনা ঐখোয়গী হকচাংদা য়াউরিবা সেল খুদিংমক্কী ষ্ট্রকচরেল সপোর্টসু পী। মসিগীসু মথক্তা, কোলেষ্টেরোল অসি ঐখোয়গী নর্ভ সেলশীংবু কুপশিল্লিবা মায়লিন সিথ (myelin sheath) শেম্বদসু মথৌ তাই। কোলেষ্টেরোল ৱাংবা অমসুং হার্টকী লায়না অনিসিগী মরক্তা অকনবা মরি অমা লৈনরবসু, ঐখোয়গি হকচাংদা কোলেষ্টেরোল খরদি অদুমক মথৌ তাই।

চাংচত্তা, হকচাংদা মথৌ তারিবা থৌওংশীং (processes) পাংথোকপদা চংবা কোলেষ্টেরোলগী চাদা 80 রোমদি লিভরনা শেম্মী, অমসুং লেমহৌবশীংদুনা দাইটতগী লাকই।

নহাক্না নোংমগী ওইনা শিজিন্নরিবা কোলেষ্টেরোলগী চাং অদু নোংমদা মিলিগ্রাম 200 দগী হেল্লোইদবনি। অদুম ওইনমক, ঐখোয়না নোংমগী ওইনা মথৌ তারিবা কোলেষ্টেরোল পুম্নমক লিভরনা পুথোকপা ঙম্মী। মরম অদুনা দাইটতগী মসি লৌশিনবগী মথৌ তাদে।

দাইটকী ফেটশীং(Dietary fats)

মমাংদা হায়খ্রবগুম্না, ঐখোয়না চারিবা চিঞ্জাক্তগী ফংবা ফেটশীংনা ঐখোয়গী কোলেষ্টেরোল অমসুং ত্রাইগ্লিসরাইদ লেভেলশীংদা অচৌবা ঈথীল পী। অরানবা মখলগী ফেট য়াম্না চাশিনবনা নহাক্কী লেভেলশীংদা হেনগৎহনগনি। নহাক্কী দাইটকী ফেট কন্ত্রোল তৌবদা মতেং ওইগদবা লমজিং-লমতাক খরা মখাদা পীরি।

• অচুম্বা মখলগী ফেট চাগদবনি: মীওই অমবু ফেট অমত্তা চাগনু হায়বদি ওইথোক্লোই, মরম অদুনা কোলেষ্টেরোল অমসুং ত্রাইগ্লিসরাইদ লেভেল কন্ত্রোল তৌনবগী খ্বাইদগী ফবা লম্বী অসি অচুম্বা ফেটশীং চুনবা চাংদা চাবা হায়বসিনা ওইগনি। পাম্বীদা য়ুম্ফম ওইবা চিঞ্জাকশীংদা ফংবা ফেটশীং হায়বদি অনসেচুরেটেদ ফেটশীং অসি ওইনা চাগদবনি। ফেটশীং অসিনা নহাক্কী HDL হেনগৎহনগনি অমসুং নহাক্কী LDL হন্থহন্দুনা নঙোন্দা হার্টকী লায়নাগী রিস্ক নেমহনগনি। শাদা য়ুম্ফম ওইবা চিঞ্জাকশীংদগী ফংবা সেচুরেটেদ ফেটশীং অসিনা নঙোন্দা HDL হন্থহনগনি অমসুং নহাক্কী LDL হেনগৎহনগনি, অমসুং থৌওং অনিমকসিনা নঙোন্দা হার্টকী লায়নাগী রিস্কসু হেনগৎহনগনি।
• ফেটকী অচুম্বা চাং অদু চাগদবনি: মশা-মউ ফবা এদল্টশীংগীদমক্তা, নহাক্কী অপুনবা কেলোরিগী চাদা 30দগী হেলহন্দনা ফেটতগী লাকহনগদবনি। চাদা 30 হায়রিবশীংগী মনুংদা, অপুনবা কেলোরিগী মনুংদা চাদা 7তগী 10 ফাউবনা সেচুরেটেদ ফেটশীংদগী; অপুনবা কেলোরিগী মনুংদা চাদা 10 দগী 15 ফাউবনা মোনোসেচুরেটেদ ফেটশীংদগী; চাদা 10না পোলিঅনসেচুরেটেদ ফেটশীংদগী লাকপা ওইগদবনি।
• মওং চুম্বা বেলেন্স দাইট অমা চাগদবনি: অফবা দাইট অমা হায়বসিগী মনুংদা, নোংমগী ওইনা উহৈ অমসুং মনা-মশীংগী শরুক্না 5 নত্ত্রগা মসিদগী হেলহন্দুনা; হৱাই-চেংৱাই, হৱাই অশাংবী, অমসুং মরি চৎপী পাম্বীগী (grains, beans, and legumes) শরুক্না হেন্না য়াউহন্দুনা অমদি অথুম্বা অমসুং ফেট ৱাংবা চিঞ্জাক ককথদুনা চাবীগদবনি।

ত্রাইগ্লিসরাইদ হায়বসি করিনো?

ত্রাইগ্লিসরাইদশীং অসি হকচাংদা য়াউরিবা অমসুং ঐখোয়না চারিবা চিঞ্জাকশীংদা য়াউরিবা ফেটশীংগী কেমিকেল ফোর্মনি। ঐখোয়না চাবা মতমদা, ফেটশীং অসি ঐখোয়গী হকচাংনা ত্রাইগ্লিসরাইদশীংদা, হায়বদি ঐখোয়না মথৌ তারকপা মতমদা শিজিন্ননবগীদমক এনর্জিগী মওংদা থমজিল্লি। হকচাংনা এনর্জি মথৌ তারকপা মতমদা, ত্রাইগ্লিসরাইদশীং অসি থাদোরকই অমসুং ঐখোয়না মথৌ তারিবা এনর্জি অদু ফংনবগীদমক্তা ফ্যুএল ওইনা চাকই।

নহাক্কী রুটিন হেলথ চেক-অপকী শরুক অমা ওইনা, দোক্টরনা নহাক্কী ঈদা য়াউরিবা কোলেষ্টেরোল অমসুং ত্রাইগ্লিসরাইদশীংগী চাং ওনগদবা ঈগী তেষ্ট অমা তোইনা পাংথোক্নৈ। মীওই খরগী ওইনদি, লেভেলশীং অদু চানবা ওই। অদুবু মীওই খরগী ওইনদি, মখোয়গী দাইট, মখোয়না চারিবা হিদাকশীং, নত্ত্রগা মখোয়গী জিনেটিক মেক-অপ অসিনচিংবনা কোলেষ্টেরোল অমসুং ত্রাইগ্লিসরাইদকী লেভেল অদু হকচাংনা মথৌ তারিবদুদগী হেন্না ৱাংখৎহল্লি। লাইবক থীবদি, মসি হেনবসি অফবা নত্তে। তশেংবদি, নহাক্কী ঈদা কোলেষ্টেরোল অমসুং ত্রাইগ্লিসরাইদশীং কা হেন্না য়াউবনা নহাক্কী হকশেলদা খুদোংথীবা থোক্লকপা য়াই। ত্রাইগ্লিসরাইদ অমসুং কোলেষ্টেরোলগী চাং অসি নোর্মেল লেভেলদগী হেনবা হায়বসিগা মখাদা পীরিবশীংসিগা মরি লৈনৈ:

• থবাক নাবা অমসুং হার্ট এটেকশীংগা কোন্নবা হার্টকী লায়না।
• পেরিফরেল ভাস্কুলর দিজিজ (খোংগী আর্টেরিদা ফুনবা)।
• কোক অমসুং ঙক্কী আর্টেরীশীংদা ফুনবনা থোকহনবা ষ্ট্রোক।
• পেনক্রিএটাইটিস অমসুং লিপোদিষ্ট্রোফি (Pancreatitis and lipodystrophy)।

করম্বা ফেক্টরশীংনা কোলেষ্টেরোল লেভেলশীংদা ঈথীল পীবগে?

কোলেষ্টেরোলগী লেভেলশীংদা ঈথীল পীবা ফেক্টর কয়ামুক লৈ। ফেক্টরশীং অসিগী মনুংদা খরা হায়বদি, খুদম ওইনা, হায় কোলেষ্টেরোল লেভেল লৈবগী জিনেটিক তেন্দেন্সি অমা (ফেমিলি হিষ্টরি অমা) লৈবদি ঐখোয়গী কন্ত্রোল ৱাংমদনি। অদুবু অতৈ ফেক্টর কয়ামুক্তি ঐখোয়গী কন্ত্রোল মখাদা লৈ। মখোয় অসিগী মনুংদা মখাদা পিরিবশীংসি চল্লি:

• ফেট অমসুং/ নত্ত্রগা কার্বোহায়দ্রেট (সুগর)কী চাং ৱাংবা দাইট অমা।
• এক্সরসাইজ ৱাৎপা।
• HIV লায়েংবদা শিজিন্নরিবা য়াউনা অকক্নবা হিদাক-লাংথকশীং।

সোর্স: পোর্টেল কন্টেন্ট টিম