ইপিলেপসি

মসি মতম পুম্নমক্তা ঐখোয়গী ব্রেন সেলশীং ফাউদুনা চেল্লিবা মশিং য়াম্লবা ব্রেন ইম্পলসশীংগী দিসওর্দরনি। ইলেক্ত্রিকেল ইম্পলসশীং অসিদা অপন-অরাক নত্ত্রগা মওং চুমদবা অমহেক্তা লৈরকপা মতমদা, মীওই অমনা চিংথেকপগী থৌওং অসি থোকই।

চিংথেকপগী লাইওংশীং অসি খঙহৌদনা ক্রক-ক্রক লাকশিল্লকপা (twitching) অমসুং পাম্বোম অমসুং খোং অসি কন্ত্রোল লৈতনা নিকপা অমদি মতুংদা ৱাখল মাংবা অসিনি। মীওই খরদদি চিংথেকপা অসি য়াম্না শাথীবা ওইদে।

ইপিলেপসি থোকহল্লিবা মরমশীং

ফেক্টর কয়ামুক্না ইপিলেপসি থোকহনবা য়াই। চিংথেকপগী অহৌবসি মহৌশানা অঙাং ওইরিঙৈদা ওইগল্লি। চিংথেকপসি অঙাংশীং অমসুং চহি 65গী মথক্তা লৈবা অহল ওইরবা মীওইশীংদনা খ্বাইদগি কমন ওই। অদুবু কন্দিসন অসি নহা অহল খাক্তনা শোকহনবা য়াই। অদুম ওইনমক, কন্দিসন অসিনা শোকহল্লবা মীওই খরদদি, মসি ওইরকপগী মরম অসি খংবা ঙমদে। চিংথেকপগী থৌওং থোকহনবা য়াবা ফেক্টর খরদি মখাদা পীরি:

• ইপিলেপসি থোকহনবদা পারি-পুরিদগী লৌনরকপনা (genetic inheritance) থোকহনবগী থৌদাং নেমজরবসু ইপিলেপসিগী ফেমিলি হিষ্টরি লৈবা মীওইদনা মসিগী রিস্ক অসি হেল্লি।
• অঙাং ওইরিঙৈদা মতম শাংনা অরুম হৌখিবা।
• এক্সিদেন্টনা মরম ওইদুনা কোক অমসুং ব্রেনদা অশোক-অপন লৈখিবা।
• ষ্ট্রোক নত্ত্রগা ব্লদ ভেসেলগী অতৈ লায়নাশীংনা নহাক্কী ব্রেন অদু শোকহনবা য়াই নত্ত্রগা ওক্সিজেন ৱাৎহন্দুনা চিংথেকপগী থৌওংশীং থোকহনবা য়াই।
• ব্রেন ত্যুমরশীংনা ইপিলেপসি থোকহনবা য়াই, অদুবু মসি য়াম্না পংনা থোক্তে।
• মেনিঙ্গাইটিস (Meningitis)গুম্বা ব্রেন ইনফেক্সনশীং লৈখিবা।

ইনগদবা নিয়মশীং

• করিগুম্বা নঙোন্দা চিংথেকপগী থৌওংসি চাং নাইনা থোক্ত্রবসু দোক্টরগী পাউতাক মতুংইন্না ইপিলেপসিগী হিদাক-লাংথক নুমিৎ খুদিংগী চাগদবনি।
• হিদাক-লাংথক চাং নাইনা চাবা হায়বসিসু চিংথেকপা থীংনবগী মরুওইবা পাম্বৈ অমনি।
• করিগুম্বা দোজ অমা লৌবা কাউথোক্লুরবদি, হেক খংলকপগা মদু চানবা হোৎনগদবনি। অকোনবদা লৌখিবা দোজ অদুদগী করিগুম্বা পুং 24দগী হেন্না কান্নখ্রবদি, দোক্টরগী পাউতাক লৌ।
• দোক্টরনা প্রেস্ক্রাইব তৌবা হিদাক-লাংথকতগী হেন্না ইপিলেপসিগী অতৈ হিদাক-লাংথক পীজরোইদবনি।
• দোক্টরগী অয়াবা য়াউদনা হিদাক-লাংথক পীথকপা লেপ্লোইদবনি।
• চিংথেকপগী হিদাক লৌরিঙৈদা, অতৈ অনাবশীংগী হিদাক চাগে হায়রবদি দোক্টরগী পাউতাক লৌগদবনি।
• য়ু থক্লোইদবনি। মদুনা চিংথেকপা থোকহন্নবগী মচাক ওইহনগনি অমসুং চিংথেকপগী হিদাক্কী কান্নবা হন্থহনবা য়াই।
• করিগুম্বা মীরোল্লিঙৈ মতম ওইরবদি, হিদাক চানবগীদমক দোক্টরগা রিস্ক অমসুং কান্নবশীংগী মরমদা তান্নদুনা পাউতাক লৌগদবনি।

চিংথেকপগা মায়োক্ননবা তৌগদবা থবক খরা (Tips to deal with Seizures)

করিগুম্বা মীওই অমনা চিংথেকপা নহাক্না উরবদি, মখাদা পীরিবা ইনফোর্মেসন অসি নিংশিংউ:

• পাখৎকনু – ফিভম অদু ঈংনা মায়োক্নৌ।
• মীওই অদু লেংহন্নবা হোৎনগনু।
• মীওই অদু নিকপা নত্ত্রগা লেং-ওৎপদু থীংনবসু তৌগনু।
• মীওই অদুদা নিক্তুনা নত্ত্রগা লাউদুনা হৌদোক্নবা তৌগনু।
• মীওই অদুগী মনাক্তগী অশোক-অপন থোকহনবা য়াবা পোৎ-চৈশীং লাপ্না লৌথোকউ।
• ময়াদগী মহি শাফবা মওংদা থোকখিনবগীদমক মীওই অদুবু য়াম্না তপ্না নাকল অমরোমদা চেপহল্লু। মহাক্কী মকোক মখাদা অমোনবা পোৎশক অমা থম্বীয়ু। মঙকশমগী কুদাম কোমহল্লু।
• মীওই অদুগী ময়াদা করিগুম্বা পোৎশক অমত্তা থমগনু। করিগুম্বা মহাক্না মরৈ অদু চিকখায়খিগনি হায়না চিংনরবসু মদু তৌগনু। মদু ওইথোকপা য়াবা নত্তে।
• মেদিকেলগী মতেং য়ৌরক্ত্রিফাউবা মীওইদুগা লৈমিন্নৌ। মীওই অদু পোত্থাহল্লু নত্ত্রগা তুমহল্লু।

চিংথেকপবু লাকশিনবা (Coping with Seizures)

ইপিলেপসি অসি লাইয়েংবা, কন্ত্রোল তৌবা অমসুং থীংবা য়াই। চুম্না লাইয়েং পীবনা মীওই খরদি য়াম্না থুনা চিংথেকপগী থৌওংসি লেপ্পি। চিংথেকপগী থৌওং লেপখ্রবা মতুংদদি ইপিলেপসিনা নারবা মীওই অমনা অতোপ্পা মীওইশীংদগী করিসু খেৎনবা লৈতে হায়বদি নুপী নত্ত্রগা নুপাদু মপুংফানা নোর্মেল ওই।

মালেমগী ইপিলেপসি নুমিৎ(World Epilepsy Day)

ইপিলেপসি অসি ব্রেনদগী মহৌশাগা মান্নদবা মওংদা মচুম (abnormal discharges) থোরকপদগী থোকহল্লি। মসি চহিগী তাংকক অমহেক্তদা থোকপা য়াই। অঙাংশীং অমসুং ইনখৎলকপশীংদা ইপিলেপসি লৈবা য়াই। নুমিৎ অসি চহি খুদিংগী মার্চকী তাং 26তা পালন তৌই।

অহেনবা ইনফোর্মেসনগীদমক চানবীদুনা www.purpleday.org অমসুং www.purpledayindia.org দা চংবীয়ু।

ইপিলেপসি: সর্জরিনা নোর্মেল ওইবা পুন্সি অমা পীবা ঙম্মী

মালেমগী ইপিলেপসি নুমিত্তা খ্বাইদগী পুক্নিং ৱানিংঙাই ওইবা অচুম্বা অমদি মসিনি, মল্টিপল ওইনা চিংথেকপগা লোয়ননা, দিসওর্দর অসিনা ভারতমচা মিলিয়ন 10 রোমদা অৱাবা নংহল্লি। চহি খুদিংগী ভারত্তা লৈবা অঙাংশীংদা ইপিলেপসিগী অনৌবা কেস লাখ মঙাদি হেনগৎলি। অঙাংশীং অসিগী চাদা 30 রোমদদি, হায়বদি কনিকা সিংহালগুম্বা অঙাংশিংদদি হিদাক-লাংথক থাবদা কান্নবা য়াম্না ফংদে, মসিগী অর্থদি দিসওর্দর অসিগী মরুওইবা মশক অমা ওইরিবা চিংথেকপা অসি কন্ত্রোল তৌবা মথৌ তাই। “চহি মরি শুবা মতমদা, মখোং নিকপা অমসুং মসিনা হকচাং শিনবা থুংনা শন্দোকপা হৌরকখি,” হায়না কনিকাগী মপা সঞ্জয় সিংহালনা হায়। মফম খুদিংদা কোইচেন চেল্লবা মতুংদা, নুপীমচা অসিগী মমা-মপানা মহাকপু AIIMSতা পুরকখি, মফমদুদা দোক্টরনা মহাক্কী ব্রেনগী শরুক অমা মথৌ তৌবা লেপহনগদবা (switch off) সর্জরিগী তাংলবা মওং অমা পাংথোক্নবা খংহল্লকখি।

দাক্টর মনজরি ত্রিপাথিগী মতুংইন্না, হেমিস্ফিয়ারেক্টোমি (hemispherectomy) কৌবা সর্জরি অসি মেদিকেল থেরাপিনা ফগৎহনবা ঙমদবা ইপিলেপসিনা নাবা পেসেন্টশীংগী মনুংদা চাদা 20দদি কান্নবা ফংই। দাক্টর ত্রিপাথিনা হায় মদুদি “সর্জরিগী মথৌ অসি মসিনা ব্রেনদা লৈরিবা মাং-তাক্নিংঙাই ওইবা শরুক অদু ব্রেনগী অতৈ লেমহৌরিবা শরুক অদুদগী দিসকনেক্ট তৌবনি। শরুক অদুগী মথৌ অদু ব্রেনগী লেমহৌরিবা শরুক অদুনা তৌই।” অমুকপু দিসকনেক্ট তৌখ্রবদি, ব্রেনগী শরুকশীং অসি ফঙ্কসন তৌবা লেপখিগনি, মরম অদুনা চিংথেকপগী থৌওংসু লেপখি। খুত্তা শোন্থবনচিংবা সাইদ ইফেক্টশীং থোকহল্লি। অদুম ওইনমক, দাক্টর ত্রিপাথিনা হায় মদুদি কনিকাগী কেস অসিগুম্বদদি, রিস্কশীংদগী কান্নবনা হেল্লি। মহাক্না মখা তানা শেংদোকই মদুদি মসি ইপিলেপসিনা নাবা মীওইশীংগীদমক্তদি নত্তে। মহাক্না হায় মদুদি “মসি ব্রেনগী য়াম্না অপিকপা শরুক অমদগী লাকপা ইপিলেপসিশীংগীদি তৌরোইদবনি। মসি অচৌবা শরুকশীংদতা তৌগদবনি।” সর্জরি মতুংদগী কনিকাদা চিংথেকপগী থৌওংসি লৈখিদ্রে। ইপিলেপসিনা নারবা ভারতকী মীওই মিলিয়ন 10 হেনবগী ওইনদি খ্বাইদগী মরুওইবসি মতম মাংহন্দবা হায়বসিনি। থুনা হেক লাইয়েংলিবমখৈ হেন্না ফৈ।

তশেংবগীদি অয়াম্বা কেসশীংদা ইপিলেপসি অসি লাইয়েংবা ঙম্মী, অদুবু ভারত্তদি, পেসেন্টশীংগী মনুংদা খুঙ্গং অমসুং মনুং হঞ্জিনবা মফমদা লৈবা 70দগী 90 হেনবদি লাইয়েংদে। দোক্টরশীংগী মত মতুংইন্না ঐখোয়না ইপিলেপসিগী নেসনেল প্রোগ্রাম অমা পায়খৎপা মথৌ তাই হায়রি।

সোর্স: IBN- নিয়ু দিল্লি