জিকা ভাইরস

জিকা ভাইরস (Zika virus) অসি কাংনা থোকহনবা ভাইরস অমনি। জিকা ভাইরস অসি অহানবা ওইনা ইং 1947দা উগান্দাগী জিকা উমংদা লৈবা য়োং অমদগী তোঙান্না খায়দোক্লকখি (isolated)।

মচংওইবা ৱাফমশীং

• জিকা ভাইরস লায়না অসি এদিস কাংশীং (মহৌশানা অয়ুক অমসুং নুমিদাংৱাই/ নুংদাংগী মতমশীংদা চিক্কল্লি)না চিকপদগী লৌনবা ভাইরস অমনা থোকহল্লি।
• জিকা ভাইরস লায়নানা নারবা মীওইশীংদা মহৌশানা পংকন কন্দবা লাইহৌ, উনশা ঙাংনা পোমখৎপা (এক্সানথেমা) অমসুং কঞ্জঙ্কতিভাইটিস অসি লৈগল্লি। লাইওংশীং অসি ময়ামগী ওইনা চাংচত্তা নুমিৎ 2-7 ফাউবা শাংথনা লৈগল্লি।
• হৌজিক্কী ওইনা অকক্নবা লাইয়েং নত্ত্রগা ভেক্সিন অমত্তা ফংদ্রি।
• মসিদগী ঙাকথোক্নবা খ্বাইদগী ফবা মওংদি কাং চিকহন্দনবা হোৎনবা হায়বসিনি।
• ভাইরস অসি অফ্রিকা, আমেরিকা, এসিয়া অমসুং পেসিফিকতা লৈ।

থোকহল্লিবা মরমশীং (Causes)

জিকা ভাইরস অসি মীশীংদা, এদিস জিনসকী মনুংদা লৈবা মহিক অসি চেল্লবা কাং, মরুওইনা ত্রোপিককী লমদমদা লৈবা এদিস এজিপটি অমনা চিকপদগী লৌনরকই। মসি দেঙ্গি, চিকনগুনিয়া অমসুং য়েল্লো ফিবর শন্দোক্লিবা চপ মান্নবা কাং অদুমক্নি।

লাইওংশীং

জিকা ভাইরসনা মহৌশানা কা-হেন্না কন্দবা অনাবা লৈহল্লি; মসি লায়না চেল্লবা কাং অমনা মীওই অমদা চিক্লবা মতুং নুমিৎ খরনিগী মতুংদা লাইওং উৎপগা লোয়ননা হৌরকই। জিকা ভাইরস লায়নানা নারবা মীওই অয়াম্বদা লাইহৌ খরা-খরা হৌবা অমসুং উনশা ঙাংনা পোমখৎপা লৈগল্লি। অতোপ্পশীংদা কঞ্জঙ্কটিভাইটিস, মসল অমসুং শরু-তাং নাবা, অমসুং চোকথবা ফাউবগী থৌওং লৈবসু য়াই। লাইওংশীং অসি মহৌশানা নুমিৎ 2 দগী 7নি ফাউবদা লোইখি।

লাকপা য়াবা কমপ্লিকেসনশীং

মফম খরদা ভাইরস অসি লাকপনা মকোক পীক্না (মাইক্রোসেফালি) অমসুং গুইলেইন-বারে সিন্দ্রোম (Guillain-Barre syndrome)গা লোয়নবা অঙাং মশীং পোকপা হেনগৎহনবা থেংনৈ। জিকা ভাইরস ইনফেক্সন অমসুং পোকপদা হকচাংগী মওং চুমদবা অমসুং ন্যুরোলোজিকেল সিন্দ্রোম (birth malformations and neurological syndromes)গা লৈনবা মরি অসি খংবা ঙমদ্রি, অদুবু অনিসি মরি লৈনৈ হায়বগী চিংনবদি চাং ৱাংই।

দাইএগ্নোসিস

জিকা ভাইরস অসি PCR (পোলিমরেজ চেন রিএক্সন) অমসুং ব্লদ সেম্পলশীংদগী ভাইরস তোখায়হনবগী খুত্থাংদা দাইএগ্নোস তৌই। ভাইরসশীংনা অতৈ ফ্লেভিভাইরসশীং হায়বদি দেঙ্গি, ৱেষ্ট নাইল অমসুং জেলো ফিবরগুম্বশীং অসিগা ক্রোস-রিএক্ট তৌবা ঙম্বা মরম্না সেরোলোজিনা দাইএগ্নোস তৌবসি অরুবা ওইবা য়াই।

মসিবু থীংবা

কাংশীং অমসুং মখোয়গী মরুম কোকফমশীং অসিনা জিকা ভাইরস ইনফেক্সনগী মরুওইবা রিস্ক ফেক্ট অমা ওইরি। মসিবু থীংবা অমসুং কন্ত্রোল তৌবা হায়বসিদা মফমশীং অসি হন্থহন্দুনা (মরুম কোকফমশীং লৈহন্দবা অমসুং শেমদোক-শাদোকপা)কাংশীং হন্থহনবা অমসুং কাং অমসুং মীগগী মরক্তা শম্নবা হন্থহনবা হায়বসি মরুওইবা অমনি।

মসি তিন-কাং হাৎনবা হিদাক শিজিন্নদুনা; হকচাংগী শরুকশীং য়ারিবমখৈ কুপশিনগদবা ফি-রোলশীং (হেন্না ফবদি মচু থোকপা ফি-রোলশীং) শেত্তুনা; স্ক্রিনশীং শিজিন্নদুনা অমসুং থোং-থোংনাউ থীংজিন্দুনা; অমসুং তুম্বদা কাংখল শীজিন্নদুনা মসি পাংথোকপা য়াই। বাল্টিন, লৈগী গম্লা নত্ত্রগা টায়রনচিংবা ঈশীং তুংবা য়াবা পোৎ-চৈশীং অসি ঈশীং তুংহন্দবা, নান্না থম্বা নত্ত্রগা মখুম কুপশিনবা হায়বসিসু, কাং মরুম কোকফমশীং লৈহন্দবদা য়াম্না মরুওই।

অঙাংশীং, অনাবা নত্ত্রগা অহল ওইরবশীংগুম্বা, মশানা মতিক চানা ঙাকথোকচবা ঙমদবশীংবু অখন্নবা পুক্নিং চংবীবা অমসুং মতেং পাংবীবা য়াম্না মরুওই।

লাইচৎ থোরকপা মতমদা, হেলথ ওথোরিটিশীংনা তিলহাৎ হিদাকশীং কাপথোক্নবা খংহল্লকপসু য়াই।

লম-তু চৎপশীংনা মখোয় মশাবু কাংনা চিকপদগী ঙাকথোক্নবা মথক্তা পীরিবা মরুওইবা মাংজৌনবা চেক্সিন থৌরাংশীং অসি লৌখৎকদবনি।

লাইয়েং

জিকা ভাইরস লায়না অসি মহৌশানা পংকন-কন্দবা ওইগল্লি অমসুং অকক্নবা লাইয়েং মথৌ তাগন্দে। জিকা ভাইরসনা নারবা মীওইশীংবু মতিক চানা পোত্থাহনগদবনি, মহি-মনাই মতিক চানা পীথক্কদবনি, অমসুং নাবা অমসুং লাইহৌ তৌবদু কমন ওইবা হিদাক-লাংথক্না লাইয়েংগদবনি। করিগুম্বা লাইওং অদু হেন্না ফৎচিল্লক্ত্রবদি, মখোয়না দোক্টরগী চেক্সিন-থৌরাং অমসুং পাউতাক লৌগদবনি। হৌজিক্কী ওইনদি মসিগী ওইনা ভেক্সিন অমত্তা লৈত্রি।

সোর্স : ৱার্ল্ড হেলথ ওর্গানাইজেসন

মসিবু কমদৌনা জিকা ভাইরস, দেঙ্গি, চিকনগুনিয়া, নত্ত্রগা মেলরিয়ানি খংবা ঙমগদগে?

লায়নাশীং অসিদা লাইহৌ, চিকপা-নাবা, অমসুং উনশা ঙাংশিনবনচিংবা খুদমশীং অসি চপ মান্ননা উবা ফংই। মসি মতম অমত্তদা অমদগী হেনবা লায়নানা শোকহনবগী ওইথোকপসু লৈ। খুদম খরনদি লায়নাশীং অসি অমগা অমগা খন্দোকপা ঙম্বসু য়াই।

• মেলরিয়া: মহৌশানা নিংথম চনবা (থক থক নিকপা), কোক চিকপা অসিনা হান্না হৌরকই, অমসুং মসিগী মথংদা নুমিৎ 2 নত্ত্রগা 3নি অরুম কন্না (40°C/104°F) হৌই। লাইহৌ হৌরিঙৈদা মীওই অদু মনিং মমাং চিংবা য়াই অদুগা অমুক নিংথম চল্লকপা য়াই। মেলরিয়াদদি উনশাদা ঙাংশিনবা লৈতে।
• দেঙ্গি: খংহৌদনা অরুম কন্না (40°C/104°F) হৌরকপা য়াই অমসুং মদু চয়োল অমফাউবা লৈবা য়াই। মহৌশানা মখাদা পীরিবা লাইওংশীং অসিগী মনুংদগী 2 নত্ত্রগা মসিদগী হেনবা খুদমশীং অসি অকনবা লাইহৌগা কোন্ননা উবা ফংলবদি মদু দেঙ্গি ওইরগনি। লাইওংশীং অদুদি: মসল অমসুং শরু তাংশীং শাথীনা চিকপা-নাবা, কোক চিকপা অমসুং মীৎকী মতুংদা (behind) নাবা ফাউবা, ওনিংবা নত্ত্রগা ওবা, নত্ত্রগা উনশা ঙাংশিনবা অসিনি। ঈ ওবা, মহৌশাগা মান্নদনা পোমখৎপা, নত্ত্রগা নাতোন, য়ারি, নত্ত্রগা উনশাদগী ঈ থোরকপা লৈব্রা হায়বসি মুন্না য়েংগদবনি মরমদি মখোয় অসি খুদক্কী ওইবা মতেং মথৌ তাগদবা য়াম্না খুদোঙথীনিঙাই ওইবা মখলগী দেঙ্গিগী খুদম ওইবা য়াই।
• চিকনগুনিয়া: মহৌশানা পংকন-কন্দবা লাইহৌ অমা লৈগল্লি অমসুং খুৎ, খোং, খুউ অমসুং নঙ্গন্দা নাবা ফাউবা য়াম্না কনবা তাং চিকপা-নাবা লৈগল্লি। শরু তাং চিকপা অদু অশুক্কী মতিক কল্লি মদুদি থৌওংসি লৈবা মীওইশীংনা নোন্থদুনা লৈ অমদি চৎপা ঙমদে। লাইহৌ অদু লৈত্রবা মতুংদা, শরু তাং চিকপা-নাবা অদু চয়োল কয়া নত্ত্রগা থা কয়া শাংথহৌবসু য়াউই।
• জিকা: মসিনা পংকন-কন্দবা লাইহৌ অমা লৈহল্লি অমসুং মহৌশানা উনশাদা ঙাংশিনবসু লৈগল্লি। মীৎ হাক্কচবা নত্ত্রগা “মীৎ ঙাংবা” (কঞ্জঙ্কটিভাইটিস) অসিসু তোইনা থোক্কল্লি।

জিকা ভাইরস লায়নাগী মতাংদা ঈ-পাউ পীনবগীদমক, 24*7 কন্ত্রোল রুম অমা মিনিষ্ট্রি ওফ হেলথ এন্ড ফেমিলি ৱেলফেয়র, গবর্ণমেন্ট ওফ ইন্দিয়ানা হাংদোক্তুনা লৈরে। কন্ত্রোল রুমগী নম্বরশীং অদুদি 011-23061469 অমসুং 23063205 অসিনি।

মরি লৈনবা রিসোর্সশীং

1. এক্সন প্লান ফোর মেনেজিং জিকা ভাইরস দিজিজ
2. কম্যুনিকেবল দিজিজ এলর্ট ওন জিকা ভাইরস
3. গাইদলাইন্স ওন জিকা ভাইরস দিজিজ ফোলোৱিং এপিদেমিক ইন ব্রাজিল এন্ড অদর কন্ত্রিজ ওফ অমেরিকা
4. গাইদলাইন্স ফোর ইন্টিগ্রেটেদ ভেক্টর মেনেজমেন্ট ফোর কন্ত্রোল ওফ AEDES মসক্যুইটো
5. ফেক্ট শিট – জিকা ভাইরস
6. অলগোরিথম ফোর জিকা দাইএগ্নোসিস