মম্পস

মম্পস (পেরোটাটিস হায়নসু খংনৈ) হায়বসি পেরোটিদ গ্লান্দশীং (parotid glands) নানা চাউথোকহল্লিবা ভাইরসনা থোকহনবা অনাবা অমনি। গ্লান্দশীং অসি নাকোংগী মমাং অমসুং মখাদা লৈ অমসুং তিন পুথোকই।

মসিবু থোকহল্লিবা মরমশীংদু করি-করিনো?

মম্পস অসি ভাইরস অমনা থোকহনবা লৌনগনবা লায়না অমদি অমসুং মসি মীওই অমদগী মীওই অমদা মহিক চেল্লবা লোক-তিন (saliva) শোক্লুবদগী শন্দোকই। চহি 2 অমসুং 12গী মরক্তা লৈবা অঙাংশীংদনা হেন্না লৌনরকপা য়াই। চহি খরা য়াম্লবা মীওইশীংদদি পেরোটিদ গ্লান্দশীংগী মথক্তা, টেষ্টিকল, পেনক্রিজ অমসুং নর্ভস সিষ্টেমগুম্বা অতৈ ওর্গানশীংসু য়াউবা য়াই। অনাবসিগী ইনকুবেসন পেরিওদ (incubation period) হায়বদি লায়না চংখিবা অমসুং লাইওং উত্থোরকপগী মরক্তা লৈবা মতম অসি মহৌশানা নুমিৎ 12 দগী 24 ফাউবগী মনুংদা ওইগল্লি।

লাইওংশীং অদুদি করি করিনো?

পেরোটিদ গ্লান্দশীংদা নানা পোমথোরকই, অহৌবদদি নাকল অমদা ওই অদুবু নুমিৎ 3 দগী 5 নি ফাউবদদি গ্লান্দ অনিমক্তা ওইরকই। শায়বা অমসুং য়োৎপা মতমদা নাবদু হেনগৎলকই অমসুং সেলিভা (saliva) পুথোকপগী চাং হেনগৎহল্লিবা অশিনবা চিঞ্জাক্কী আইটেমশীং অমসুং হৈ মহিশীংনা অনাবদু অমুক্কা হেনগৎহল্লি। কোক চিকপা অমসুং চানিং-থক্নিংবা পোক্তবগা লোয়ননা লাইহৌ কন্না হৌই। লাইহৌ অদু মহৌশানা নুমিৎ 3 দগী 4নি ফাউবগী মনুংদা হন্থরকই অমসুং গ্লান্দ পোমথোকপদুসু নুমিৎ 7 দগী 10নি ফাউবগী মনুংদা হন্থরকই। অঙাং অদুনা লায়না অদু অতোপ্পদা গ্লান্দ অদু পোম্লিঙৈ মতম মনুংদা হায়বদি নুমিৎ 7 দগী 10নি ফাউবগী মনুংদা শন্দোকপা ঙম্মী। হায়রিবা মতম অসিগী মনুংদা মহাকপু অতোপ্পা অঙাংশিংদগী লাপ্না থমগদনি অমসুং স্কুল কাহল্লোইদবনি।

চহি খরা য়াম্লবা নুপাশীংদদি টেষ্টিকল (orchitis) নাবা অমসুং পোম্বসু য়াউরকপা য়াই। মম্পস অসিনা ব্রেনগী ইনফ্লেমেসন (encephalitis) থোকহনবসু য়াই। করিগুম্বা মখাগী থৌওং অসি লৈরবদি খুদক্টা দোক্টরগা তান্নগদবনি:

• কোক শাথীনা চিক্লবা।
• ঙক্তা চপ তিংবা ফাউরবা।
• কোক ঙাউরবা।
• হকচাং চিংথেক্লবা (Fits)।
• য়াম্না ওরবা।
• টেম্পেরেচর য়াম্না ৱাংলবা।
• পুক্তা নারবা।
• টেষ্টিকলদা (testicles) পোম্লবা।

মসিগী লাইয়েংদি করিনো?

মম্পসকী অকক্নবা লাইয়েংদি লৈতে। লাইওং পুম্নমক হিদাক্না হন্থহনবা ঙম্মী। মহৌশানা এন্টিবাইওটিক্সতি শিজিন্নদে। লাইহৌ অদু অনাবসু হন্থহনবা ঙম্বা পেরাসিতামোলগুম্বা হিদাকশীংনা কন্ত্রোল তৌই। অঙাংশীংদা এসপিরিনদি কৈদৌঙৈদা পীজবীরোইদবনি। মহি-মনাই মরাং কায়বা অপেৎপা চিঞ্জাক অমা পীজবীগদবনি। অশিনবা চিঞ্জাক অমসুং হৈ মহি পীজ-পীথক্লোইদবনি। মম্পসনা নারবা অঙাং অমনা মতম পুম্বদা ফমুংদা লৈগদবনি হায়বা লৈতে।

মতৌ করম্না মসি থীংগদগে?

মম্পসকী এপিসোদ অমগী মতুংদা, মীওই অমদা লায়না অসি অমুক হন্না চংলক্লরোই অমসুং এটেক অদুনা পুন্সিগী ওইবা ইম্যুনিটি পীরে। মম্পস লৈখিদবা অঙাংশীংগী ওইনদি, মম্পস ঙাকথোক্নবা ভেক্সিনশীং ফংই। MMR ভেক্সিননা মিজলস, মম্পস অমসুং রুবেলা হায়রিবা ভাইরসনা থোকহনবা অনাবা অহুম অসিদগী ঙাকথোকই। মসি অঙাং খুদিংমক্তা মখোয়না থা 15 শুরকপা মতমদা পীগদবনি। ভেক্সিন অসি চহি অমগী মখাদা লৈবা পীক্লিবা অঙাংশীং, মশা শাগৎলিবা (running temperature) অঙাংশীং নত্ত্রগা মীরোনবী নুপীশীংদদি পীরোইদবনি।

কমপ্লিকেসনশীং অদুদি করি করিনো?

করিগুম্বা মতমদা মম্পসনা শাথীবা কন্দিসন অমা ওইরিবা ব্রেইনগী ইনফেক্সন (encephalitis) থোকহনবা য়াই। করিগুম্বা নুপাশীংদা টেষ্টিকলশীং অদুদা নারবদি মদুনা ইনফর্টিলিটি (infertility) ওইহল্লকপা য়াই।

সোর্স: দোক্টর