স্বাইন ইনফ্লুএঞ্জা (স্বাইন ফ্লু)

স্বাইন ফ্লু হায়বসি করিনো?

স্বাইন ইনফ্লুএঞ্জা (স্বাইন ফ্লু) হায়বসি ওকশীংদা লাইচৎ তোইন থোকহল্লিবা টাইপ A ইনফ্লুএঞ্জা ভাইরসশীংনা থোকহনবা ওকশীংগী রেস্পিরেটরি দিজিজ অমনি। মহৌশানা মীদদি স্বাইন ফ্লু লৌনগন্দে অদুবু ইনফেক্সননা মরম ওইদুনা মীওইবদা থোকহনবা য়াউই। স্বাইন ফ্লু ভাইরসশীং অসি মীওই অমদগী মীওই অমদা শন্দোকই হায়বগী রিপোর্ট লৈ, অদুবু মমাংঙৈদদি শন্দোকপগী থৌওং অসি তাংনা থোক্লম্মী অমসুং মীওই অহুমদগী হেন্দোক্না শন্দোক্লমদে।

শক্তাক খুদম অমসুং লাইওংশীং (Signs and symptoms)

মীওইবদা নাবা স্বাইন ফ্লুগী লাইওং অসি মীওইবদা নাবা অতৈ ফ্লুগী লাইওংশীংগা মান্নৈ অমসুং লাইহৌ, লোক খুবা, খৌনাউ নাবা, হকচাং চিকপা, কোক চিকপা, ঈংথম চনবা অমসুং চোকথবা অসিনচিংবা য়াউই। মীওই খরদদি স্বাইন ফ্লুগা দাইরিয়া অমসুং ওবগা লোয়নবসু উবা ফংই। মমাংঙৈদদি, মীওইবদা স্বাইন ফ্লু নাবদগী শাথীবা অনাবা (ন্যুমোনিয়া অমসুং রেস্পিরেটরি ফেল ওইবা) অমসুং শিবনচিংবা থোকহনবগী রিপোর্ট লৈ। অঈং-অশাগী মতুংইন্না লাকপা ফ্লুগুম্না, স্বাইন ফ্লুনসু হান্নদগী লৈবা ক্রোনিক মেদিকেল কন্দিসনশীং হেন্না ফৎচিলহন্দবা য়াই।

ফ্লু ভাইরসশীং অসি মীওই অমদগী মীওই অমদা মরুওইনা ইনফ্লুএঞ্জানা নারবা মীনা লোক খুবা নত্ত্রগা হকথী খনবদগী শন্দোকই। করিগুম্বা মতমদা ফ্লু ভাইরস য়াউবা করিগুম্বা পোৎশকশীং শোক্ন-শম্নরুরবা মতুংদা মখোয়গী মচিন নত্ত্রগা মনাতোন পায়রুবদগী শন্দোরকপসু য়াউই।

ইনফেক্সন(Infection)

লায়না অসি চংখ্রবা মীওইশীংনা অতোপ্পা মীওইশীংদা লাইওং লাক্ত্রিঙৈ মমাংগী নোংমগী মতমদগী হৌদুনা অমসুং নারবা মতুং নুমিৎ 7নি নত্ত্রগা মসিদগী হেনবা মতম ফাউবা শন্দোকপা ঙম্মী। মসিগী অর্থদি নহাক্না নশা নারে হায়বা খংদ্রিঙৈদগী হৌনা অমসুং নহাক্না নারিঙৈ মতমদসু নহাক্না ফ্লু অদু অতোপ্পা মীওইদা শন্দোকপা ঙম্মী হায়বসিনি।

হায় রিস্ক লৈবা গ্রুপশীং

• থা 6তগী চহি 4 ফাউবগী মনুংদা লৈবা মীওইশীং;
• চহি 65 অমসুং মসিগী মথক্তা লৈবা মীওইশীং;
• মীরোনবী নুপীশীং;
• ক্রোনিক পলমোনরি (এজমা য়াউনা), কার্দিওভাস্ক্যুলর (হায়পরটেন্সনখক নত্তনা), রেনেল, হেপাটিক, ন্যুরোলোজিক, হেমাতোলোজিক, নত্ত্রগা মেটাবোলিক দিসওর্দরশীং (দাইএবেটিজ মেলিটস য়াউনা) লৈবা মীওইশীং;
• ইম্যুনোসপ্রেস (হিদাক-লাংথক্না নত্ত্রগা HIVনা ইম্যুনোসপ্রেস তৌবা য়াউনা) তৌরবা মীওইশীং;
• ইনফ্লুএঞ্জা ভাইরস ইনফেক্সনগী মতুংদা রেয়ে সিন্দ্রোম (Reye syndrome) লাকপগী রিস্ক লৈরবা, থা 6 তগী চহি 18 ফাউবগী মনুংদা অমসুং মতম শাংনা এসপিরিনগী থেরাপি লৌরবা মীওইশীং;
• নর্সিং হোম অমসুং অতৈ ক্রোনিক-কেয়র ফেসিলিটিশীংদা লৈবা মীওইশীং;
• লায়না লাকপা য়াবগী মওংদা কা-হেন্না নোইরবা মীওইশীং (বোদি মাস ইন্দেক্স 40দগী হেন্না লৈবা);
• শাথীবা মেদিকেল কন্দিসনশীং লৈবা মীওইশীংগী সেবা তৌবদগী ইনফ্লুএঞ্জাগী শাথীবা কমপ্লিকেসনশীংগী অহেনবা রিস্ক লৈরবা সেবারি অমসুং ইমুং-মনুংগী মীওইশীং;
• হেলথ-কেয়র পর্সোনেলশীং।

লায়না অসিনা শন্দোকপা থীংনবা খ্বাইদগী ফবা লম্বী

করিগুম্বা নহাক অসি নারবদি য়ারিবমখৈ অতোপ্পা মীওইশীংগা শোক্ন-শম্নগনু। করিগুম্বা নারবদি থবক মফমদা নত্ত্রগা স্কুলদা চৎলোইদবনি। লোক খুবা নত্ত্রগা হকথী খনবা মতমদা নহাক্কী চিন অমসুং নাতোন অদু টিসু অমনা খুমজিনগদবনি। মসিনা নহাক্কী অকোয়বদা লৈরিবা মীওইশীং অদুদা নারকপদগী থীংবা ঙম্বা য়াই। নহাক্না শিজিন্নরুরবা টিসু অদু অমোৎ-অকায় হাপফমদা হাপচিনগদবনি। করিগুম্বা নহাক্না টিসু অমা ফংদ্রবদি লোক খুবা নত্ত্রগা হকথী খনবদা খুৎনা কুপশিনগদবনি।  অদুদগী নহাক্কী খুৎ হামদোক্কদবনি, অমসুং মসি নহাক্না লোক-খুবা অমসুং হকথী খনবা খুদিংগী তৌগদবনি।

মতৌ করম্না ইনফেক্সনদগী ঙাকথোক্কদগে?

এমর্জেন্সি মেদিকেল কেয়র

অঙাংশীংদা খুদক্কী ওইবা মেদিকেলগী মীৎয়েং চংবা মথৌ তারে তাকপা এমর্জেন্সি ৱার্নিং খুদমশীংগী মনুংদা মখাগীসিংসি চল্লি:

• শ্বর থবেৎ-থবেৎ হোনবা নত্ত্রগা শ্বর হোনবা ৱাবা।
• উনশাদা হিগোক মচু চংলকপা।
• মহি-মনাই মতিক চানা থকউ য়ারক্ত্রবা।
• তুম্বদগী মীৎকপ থোক্লক্তবা নত্ত্রগা ৱারি-ৱাতাই তৌরক্তবা।
• অঙাং অদুবু পমগে য়ারক্তবা।
• ফ্লুগা মান্নবা লাইওংশীং ফগৎলকপা অদুবু লাইহৌ অমসুং হেন্না শাথীনা লোক-খুবগা লোয়ননা অমুক হঞ্জিল্লকপা।
• উনশাদা ঙাংশীনবগা লোয়ননা লাইহৌ হৌবা।

মপুং-মরৈ ফারবা মীওইশীংদা খুদক্কী ওইবা মেদিকেলগী মীৎয়েং চংবা মথৌ তারে তাক্লিবা এমর্জেন্সি ৱার্নিং খুদমশীংগী মনুংদা মখাদা পীরিবশীংসি চল্লি:

• শ্বর হোনবা ৱাবা নত্ত্রগা শ্বর চনিং তানা হোনবা ঙমদবা।
• থবাক নত্ত্রগা পুক্তা নাবা নত্ত্রগা প্রেসর লৈবা।
• খংহৌদনা কোক ঙাউরকপা।
• চমম্নবা।
• শাথীনা নত্ত্রগা লেপতনা ওবা।

তৌগদবশীং অমসুং তৌরোইদবশীং

তৌগদবশীং

• লোক খুবা নত্ত্রগা হকথী খনবা মতমদা রুমাল নত্ত্রগা টিসু অমনা নহাক্কী চিন অমসুং নাতোন অদু খুমজিনগদবনি।
• লোক খুবা নত্ত্রগা হকথী খনবদা নহাক্কী নাতোন, মীৎ নত্ত্রগা চিন শোক্ত্রিঙৈ নত্ত্রগা শোক্লুরবা মতুংদা নহাক্কী খুৎ অদু মতম পুম্বদা সাপোন অমসুং ঈশীংনা শেংনা হামদোক্কদবনি।
• মীয়াম তিনবা মফমদা য়ারিবমখৈ চংলোইদবনি।
• ফ্লুগা মান্নবা অনাবনা নারবদি য়ুমদা লেংদনা লৈয়ু।

ইনফ্লুএঞ্জাগা মান্নবা লোক খুবা, নপ মহি চেনবা, হকথী খনবা অমসুং লাইহৌ হৌরবা মীওইশীংদগী য়ামদ্রবদা ফুট অনিগুম্বা লাপথোক্না লৈগদবনি।

• ফজনা তুম্মু, ফিজিকেল্লি এক্টিভ ওইনা লৈয়ু অমসুং পুক্নিং ৱাদনবা হোৎনগদবনি।
• ঈশীং মরাং কায়না থক্কদবনি অমসুং মচি ওইবা চিঞ্জাক চাগদবনি।

তৌরোইদবশীং

• খুৎ শোক্নবা, সোসিএল্লি কোন্নবা অমসুং চুপ্নবা, নত্ত্রগা অতৈ উন্নবগী গ্রিটিং শিজিন্নবা তোক্কদবনি।
• দাক্টরগা তান্নদনা হিদাক চাবা-থকপা তৌরোইদবনি।
• মপান্দা তিন শিত্তোক্লোইদবনি।
• অঙাংশীংদা এসপিরিন (Aspirin) পিজরোইদবনি।

H1N1 ভাইরস

H1N1 ভাইরসনা পৃথীবীদা লৈরিবা মীয়াম পুম্বদা অকিবা পোকহল্লি, অদুম ওইনমক মী শিহনবা ঙম্বা ভাইরস অসিনা নোর্মেল ইনফ্লুএঞ্জা অমগা মান্নবা কমন ওইবা লাইওংশীং উৎলি অমসুং মসি মখাদা পীরিবা ইচম-চম্বা খোংথাংশীং অসি লৌখত্তুনা থীংবা ঙম্মী।

কমন ওইবা লাইওংশীং

• ঋতু ওন্নবগী লাকপা ফ্লুগা মান্নদবা ময়াই ওইরপ কনবা লাইহৌ, অদুবু করিগুম্বা কেস খরদদি মসি উৎলক্তবা য়াউই।
• লোক থোক্তনা লোক খুবা (Nonproductive Cough)।
• নাতোন্দা নপ মহি চেনবা নত্ত্রগা ফুনবা।
• খৌনাউ নাবা।
• হকচাং চিকপা।
• কোক চিকপা।
• নিংথম চনবা।
• কা-হেন্না চোকথবা।
• ওনিংবা/ দাইরিয়া।
• হেন্না শাথীবা স্বাইন ফ্লু ইনফেক্সনগী খুদমশীংগী মনুংদা ন্যুমোনিয়া অমসুং রেস্পিরেটরি ফেলর অসি য়াউবা য়াই।

মাংজৌননা লৌগদবা চেক্সিন-থৌরাংশীং

মী শিহনবা ঙম্বা স্বাইন ফ্লু অসি মালেমগী মফম কয়াদা থোক্লখ্রবা মতুংদা হৌজিক্তি ভারত্তা য়ৌরকখ্রে অমসুং মসিনা মীওই কয়াগী পুন্সি মাংহনখ্রে। অদুম ওইনমক, স্বাইন ফ্লু অসি, অথীংবা খরা পীবদা লাইয়েংদুনা ফহনবগা চপ মান্নবা অদুগুম্বা মখলগী লায়না অমগুম্বনি হায়বসিমদি শেংলে। পাক-শন্না শন্দোক্লিবা লায়না অসিদগী ঙাকথোক্নবগী পাম্বৈ মঙা মখাদা পীরি।

• করিগুম্বা নঙোন্দা H1N1 ভাইরস অসি লৈরে হায়না খল্লবদি, য়ুমদা লেংদনা লৈয়ু অমসুং স্কুল অমসুং ওফিসকুম্বা মীয়াম তিনবা মফমদা চত্তনবা হোৎনগদবনি; খুদক্তা মেদিকেল কেয়র লৌগদবনি।
• নখুৎ য়াম্না তোয়না হামগদবনি: নখুৎ হাম্বদা এন্টিবেক্টেরিয়েল সাপোনশীং শিজিন্নৌ। মখোয়দু তোয়না হাম্মু অমসুং কোঞ্জিনগী ঈশীংদা (running water) য়ামদ্রবদা সেকেন্দ 15দি খুত্তু নোয়থোক্কদবনি।
• মপুং ফানা তুমগদবনি: ফ্লুগা মায়োক্নবা ঙম্নবগী মওংদা নহাক্কী ইম্যুন সিষ্টেম অদু থম্নবগীদমক নুমিদাং খুদিংগী পুং 8দি মপুং ফানা তুমগদবনি।
• ঈশীং মরাং কায়না থক্কদবনি: নহাক্কী হকচাংদগী হুশীং (toxins) লৌথোকখিনবা অমসুং ঈশীং মনিল (moisture) অমসুং নহাক্কি সাইনস (sinus)তা লোক (mucous) পুথোক্নবগীদমক নুমিৎ খুদিংগী ঈশীং গ্লাস 8 দগী 10 ফাউবদি থক্কদবনি।
• নহাক্কী অকোয়বদা লৈবা মীওইশীংদা ইনফেক্সন শন্দোক্তনবগীদমক্তা, মতম পুম্নমক্তা নহাক্কী নাতোন অমসুং চিন অদু টিসু অমনা লোক খুবা নত্ত্রগা হকথী খনবা মতমদা খুমজিন্নবা হোৎনগদবনি।
• ভাইরস শন্দোকপা থীংনবগীদমক নহাক্কী নমিৎ, নাতোন অমসুং চিন অদু য়ারিবমখৈ শোক্কনু।
• অনাবা মীওইশীং নত্ত্রগা ফ্লুগী লাইওং উৎলবা মীওই অমগা য়ারিবমখৈ শোক্ন-শম্নবদা চেকশিনগদবনি।
• নহাক্কী ইম্যুন সিষ্টেম কনখৎহল্লু: ফ্লু থীংনবগীদমক্তা নহাক্কী হকচাং অদু কনখৎহনবা, মচি ওইবা চিঞ্জাক চাবা অমসুং ইনফেক্সন থেংননবা শেম শাবা হায়বসি য়াম্না মরুওই। মরম অদুনা হৱাই-চেংৱাই, মনা-মশীং অমসুং ভিটামিন মরাং কায়বা উহৈশীং চাগদবনি।
• ঈ-পাউ লৌশিল্লু: পাক-শন্না শন্দোক্লিবা লাইচৎ অসি থীংনবগী মথৌ তাবা খোংথাং কয়া সরকারনা লৌখৎলি অমসুং মতম-মতমগী ওইনা লাইচৎ অসি শন্দোরক্তনবা লমজিং-লমতাকশীং খংহল্লি। চানবীদুনা খ্বাইদগী নৌবা ইনফোর্মেসন ফাউবা খংজিনবীয়ু অমসুং পুক্নিং ফাথনা থবক লৌখৎপীয়ু।

মরি লৈনবা রিসোর্সশীং

• তোয়না হংবা ৱাহংশীং – ইনফ্লুএঞ্জা এ (H1N1) (216KB)
• স্বাইন ফ্লুগী লাইয়েংগীদমক গবর্ণমেন্টনা ওথোরাইজ তৌরবা হোস্পিটালশীং (96.8KB)
• হেন্দ ৱাশ (457KB)
• স্বাইন ফ্লু ইনফোর্মেসনগী টোল ফ্রি হেল্পলাইন নম্বরশীং (141KB)
• তেক্নিকেল গাইদলাইন্স
• আয়ুরবেদা প্রোস্পেক্টিভ ওফ স্বাইন ফ্লু
• সিজনেল ইনফ্লুএঞ্জা (H1N1)- WHO
• SWINE FLUগী ওসেলটামিভির ফোর্ম্যুলেসন য়োন্নবগী ওথোরাইজ তৌরবা সেদ্যুল X লাইসেন্স লৈরবা আউটলেটশীংগী লিষ্ট